+- نادي الفكر العربي (http://www.nadyelfikr.com)
+-- المنتدى: الســــــــاحات العامـــــــة (http://www.nadyelfikr.com/forumdisplay.php?fid=3)
+--- المنتدى: قضايا اجتماعيــــــة (http://www.nadyelfikr.com/forumdisplay.php?fid=60)
+--- الموضوع: هل كل الناس هتخش النار ما عدا المسلمين (/showthread.php?tid=34153)
هل كل الناس هتخش النار ما عدا المسلمين - يجعله عامر - 07-19-2009
صباح الأنوار على الكل ونهاركم معطّر والدنيا هي الشابة وانت الجدع .. على رأي إذاعة الشرق الأوسط
الحكاية كالتالي :
من كام يوم اتخنقت شويه بالليل فقلت اتمشى ع النيل ، من ناحية كورنيش شبرا - عظّم الله أجر من كابد العيش فيها - وأنزلني صديقي منزلاً مباركًا على البحر ، كانت هناك مجموعة من الأصدقاء القدامى - لم أرهم منذ 7 سنين- يجلسون يروحون عن القلوب ساعة - بس ساعة شكلها معلّقه وواقفه معاهم- لاحظت ان ص منهم كان يدخن الحشيش ومصهلل ع الآخر ، وكانت ملاحظتي مغلوطه ، فالكل بفضل الله ونعمته كان مصهللاً ، لكن لكلّ "موده" الذي يعيش فيه ، قعدوا يهيصوا شوية ، ثم جاءت الأطروحات والسؤالات الفكرية ، والحشيش يجعل الدماغ صاحي -مش السلاح- نسيت أقول أن كل من في الجلسة -قدّس الله سرّهم- خريجي جامعة الأزهر ..
فجري الكلام على سورة الفاتحة وأن المغضوب عليهم والضالين هم النصارى واليهود
قلت : شغال انا أسيب الناس تحكي وخلاص واستمتع بالهيصة اللي هُمّا فيها .. وقد حدث لحد ما واحد منهم وجّه لي سؤال ولازم اسمع رأيك إنت مش بتقول رأيك ليه :
قلت طيب اسأل
قال إنت مخك شكله لحس .. طيب ليه بتقول كده ، مفيش سبب وقام سائل سؤال جامد
هو المسيخ الدجال هيجي ؟
قلت يا ابني أنا مليش رأي في هيك أمور وهيك وهيك
لكن أعرف إن مشايخ الأزهر القدامى لغوا مثل هذه الأفكار واستبعدوها ولا مسيخ ولا دجال ولا مهدي ولا كلام من ده ودي قصص تحدث أو لا تحدث لا تفرق مع المؤمن ، آخر شخص قال كده على ما أذكر كان الشيخ المسيّر الله يرحمه
قال : على كده عيسى مش هينزل يكسر الصليب
قلت : الله أعلم بس محمد عبده الله يرحمه وطنطاوي جوهري وشلتوت وأكثر من شيخ قالوا إن المسيح مات واستوفى أجله فإيه اللي هيستدعي إنه تدّب فيه الحياة وينزل من تاني ، وع العموم نزل / مات / رُفع .. بالنسبة لي لستُ منشغلاً بذلك .
قام قال مُحدثي : مش بقولك إنت مخك باظ
قلتله يا ابني هو انا بقولك كلامي ولا كلام المشايخ ، وبعدين رأيي مش تشغل بالك بالكلام ده
قام سأل واحد منهم طيب م الآخر هو فيه جنه ونار وحساب وكده ؟ واللا مفيش ؟
قلت طبعا يا ابني أمال الموضوع مولد يعني - مع خالص عزاءنا لمن لغلهم المولد ياللاه يبقوا يسرقوا السنة الجاية جثث المصريين لما تيجي أنفلونزا البشر وتاخدهم ولا تبقي ولا تذر-
قال طب الحمد لله شوف بقى إحنا ربنا أنعم علينا بالإسلام وبسببه هنخش الجنة ، مش زي النصارى ولاد ال### تيـــــــــــــــــــــــت واللا الكفرة .. الحمد لله
قلت طيب أنا بقى عندي سؤال :
قلت ليه يا جماعه الجنة للمسلمين بس
يعني العالم كله هيخش النار ما عدا المسلمين ؟ طيب لا اعتراض في حكمك يا رب ، بس هل ربنا قال كده بالفعل ، أنا اعرف إن فيه آيات في القران ذكرت يهود ونصارى ومجوس وصابئة وغير كده وقالت إنهم إذا عملوا أعمال صالحة فلا خوف عليهم ولا يحزنون
واحد قام قايل لا يا بابا حاسب دول ربنا بيديهم جزاء الخير في الدنيا لكن هيشتوا في نار جهنم
قلت طيب يا سيدي
بلاش أقولك فلان أو علان أو مؤسسة كلها ناس غير مسلمين ينفقوا على الفقير ويكفلوا اليتامي ، ويخصصوا جزء من اموالهم لميزانية التعليم في البلاد ! و...... أنا هقولك على شخص انت تعرفه : ابوطالب شوفت عمل ايه مع النبي صلى الله عليه وسلم إنت متخيل إنك انت مثلا قدّمت زي مقدم أبوطالب للنبي ، هل إنت متخيل بالفعل إنه ينتعل نعلين يغلي رأسه منهم نارًا ، ويكون في ضحضاح في النار ، وكده كمان مخفف عنه العذاب بسبب الحاجات الكويسه اللي عملها مع سيدنا النبي ..
قال آه طبعا مهو مقالشي الشهادة ولا آمن بالله
قلت : آمنت بالله
يا ابني انت مثلا عاوز تقولي ان المسلم مثلا فيه 99 في الميه من المسلمين كويسين مثلا ، لكن في واحد في الميه هنقول : بيسرق بيزني أخلاقه زي الزفت بيغش بينافق وي وي وي الواحد في الميه ده مثلا أحسن من هنقول الست "أوبرا اللي برنامجها بيجي ع الأم بي سي 4 مترجم" إنت مش بتشوف دي بتعمل ايه ودول بيعملوا ايه
قال واحد ولو بردوه مسيرها النار
واحد غريب مش اعرفه في القعده كان منتبه شويه قال لازم تؤمن بسيدنا محمد مع احترامي لكلام حضرتك
قلتله يا أستاذ انا مش بتكلم على هي تؤمن بإيه الآن أنا أتكلم إن مثلا دي شخص بتفاصيل معينه أخلاقه كويسه ، وممتازة بالفعل ، ليه إنت بتخلي مصيرها النــــــــــــــــــــــــار ..
قال طيب نمشي واحده وحده
قلت ماشي
قال إنت مؤمن وموحد بالله ومؤمن بسيدنا محمد
قلت الحمد لله مؤمن وموحد وبصلي ع النبي ليل ونهار وادي سبحه اهي اطول من السلسله مش بتفارقني وخرجتهالو من جبيبي زي الحاوي
قال الحمد لله
قال سيدنا محمد مش خاتم الأنبياء
قلت تمام
قال طيب لازم يؤمنوا بيه طالما أخلاقهم كويسه
قلت ممتاز
شخص مثلا بتفاصيل كويسه زي دي ، هيضيفله الإسلام إيه بجد ؟ أخلاق مهو عنده أخلاق ، شريعة تنظم حياته مهو حياته منظمة ، إيمان بالله مهو مؤمن بالله بس حسب عقيدته ، إيمان بيوم آخر مهو مؤمن بالحساب وباليوم الآخر بتفاصيله هو ، ولولا دفع الله الناس بعضهم ببعض مش ربك بالأساس رايد الاختلاف ده وإلا كان خلقهم كلهم مسلمين ، ومكنش حسّن أخلاق حد ولا وفقه لفعل الخير وهو غير مسلم
قال لا مهو بيعمل كده "فتنة" واختبار للمسلم
قال طيب ايه رأيك في البهائيين ؟
قلت هو احنا خلصنا كده يعني ؟
قال بس قول رأيك
قلتله البهائيين والقاديين والأشكال دي كلها نصابين خاصة اللي قابلتهم في مصر ، والبهائية يا ابني مش ديانة زي منتا متخيل دي حدوته كده هبقى اشرحهالك بعدين ، بس ان جيت للحق أنا بموت في شعر "قرة العين" اللي هي زمان أيام تأسيس الهرطقة البهائية كانت الداعية الأولى للباب ، حرقوها !!
قال طيب شوفت
قلت آه فعلا
تصدق كل العالم هيخش النار ما عدا المسلمين وقفلت الحوار ورضي عني الراجل
نفس السؤال قلت اسأله هنا
يعني العالم كله هيخش النار ما عدا المسلمين ؟
______________
اللي لفت نظري بالفعل من فترة طويلة
أي قعدة بقعد فيها مع حد تلاقيه بيتكلم في الدين
ناس بتحشش بتتكلم في الدين
ناس بترقص والله بتتكلم في الدين
نجارين مسلح وبايعين كبده بيكلموا في الدين
مسرحيين وفنانين بيكلموا في الدين
صحفيين بيكلموا في الدين
إيناس الدغيدي بتتكلم في الدين أم احمد غاندي اللي بتبيع حشيش بتتكلم في الدين ، بوش بيتكلم في الدين ، نجاد بيتكلم في الدين ، حتى محمد سعيد رسلان بيتكلم في الدين
الله يوفق عباده
يمكن ارجع أكمل باقي الحوار بس نشوف هل حد ليه جواب على السؤال
نهاركم معطر بالياسمين
RE: هل كل الناس هتخش النار ما عدا المسلمين - Albert Camus - 07-19-2009
صباح الخير يجعله عامر
رغم أني متأكد أن زميلنا نيوترال لن يقصر في توفير كافة الوصلات الممكنة لإجابة هذا التساؤل
فقريباً سترى رأي الحويني ولهيطة وأبو لهب وعباس الدكش وبرصيصة بشرطة...
بالصوت والصورة ، وباليد والرجل إن أمكن ، وهم يقنعونك برأيهم.
لكن مع هذا ، ورغم المعلومات الموسوعية التي سيوفرها نيوترال
أود أن أقول أن هذا الموضوع من أشد المواضيع التي أثارت حزني في وقت تأثري بالديانات السماوية.
وعلى خلاف ما توقعت عزيزي يجعله عامر..
كنت وأنا داخل إلى موضوعك هذا أنوي أن أكتب مشاركة طويلة جداً بخصوص هذا الموضوع.
ولكن فجأة لمع في ذهني سؤال..
سؤال واحد فقط ، لا أعرف من أي جاءت صيغته هكذا في ذهني.
وأعتقد أنه سيغنيني عن كتابة أي شيء سواه ، لأن هذا السؤال بصيغته التي سأكتبها
يختصر كل شيء ولا يخل بشيء مما أود قوله.
والسؤال الذي سأكتبه بنفس لون مشاركتك :
لا أفهم لماذا لا يمكن أن يقبل الله شخصاً لا يعرفه ولكنه يحبه ؟
RE: هل كل الناس هتخش النار ما عدا المسلمين - الحكيم الرائى - 07-19-2009
قبل انهيار الامبراطورية الرومانية ,كانت شوارع القسطنطينة مشتعلة بالجدلات الدينية فلو رحت تجيب جوز فراخ البياع هيسألك الروح القدس منبثق من الاب والابن ولامن الاب بس فلو قلته له ده منبثق من النيل سات هتبقى ليلتك سودة وموش هيبيع لك فراخ! ولو رحت تشترى عباية البياعة هتسألك هو المسيح له طبيعة واحدة ولاطبييعتين فلو رديت انه بينور بالضلمة هتلعن دين امك وموش هتبيع لك حاجة ولو كنت لو مؤاخذة نايم مع شرموطة قبل ماتنهى الدور هتقولك هل العذراء حبل بها بلا دنس ولا لا؟ فلو قلت لها لا حبلت فى الحلال هتزقك من عليها وتسيبك محسورا...كل هذا كان دائرا وجيوش محمد الفاتح تدق اسوار مدينتهم!
التاريخ يعيد نفسه ولكن هذه المرة بالعكس!
RE: هل كل الناس هتخش النار ما عدا المسلمين - Hameeduddin - 07-19-2009
اقتباس:اللي لفت نظري بالفعل من فترة طويلة
أي قعدة بقعد فيها مع حد تلاقيه بيتكلم في الدين
ناس بتحشش بتتكلم في الدين
ناس بترقص والله بتتكلم في الدين
نجارين مسلح وبايعين كبده بيكلموا في الدين
مسرحيين وفنانين بيكلموا في الدين
لا تنه عن منكر وتأتي .............................
وانت ليه حضرتك بتتكلم في الدين
لك اجازة من علمائنا بذلك
الاسلام مخطوف من الحمقى والزنادقة
وامريكا بتصنع بيه عصابات القتل والتفخيخ والاحزمة الناسفة
ونصارى العالم العربي بيصبو الزيت ع النار
وبترول واموال الحج بتنفق على فقهاء السوء
لو في امكاني لنقلت الازهر الى اسطمبول والكعبة ومسجد الرسول بالمدينة الى قم واعدت العربان الى وثنيتهم التي يتباكون عليها واعدت المصريين الى عبادة النيل وارمادا الكهنة الذين يتدخلون في ادق تفاصيل الحياة
عالم عربي لا ينتج ولا يعمل
عطلان بالسليقة
اعوذ باله
اللهم اخرجنا من هذه القرية (العالم العربي) الظالم اهلها آمين
RE: هل كل الناس هتخش النار ما عدا المسلمين - بهاء - 07-19-2009
يمكن لان الاحساس بالظلم والضياق والضيع , بيولد الوهم فى التفرد . يمكن لان الناس دى عدد فى الليمون بلا ذات او انجاز - فهى تبحث عن تقدير وتخصيص معاملة . عشان كده تنتشر فى المجتمعات المنهارة التفريق فى الدين ولعن بعضهم بعض , وكل واحد بيتوعد الثانى بالعذاب - وكان الههم اصبح رجل المنطقة الصايع اللى واقف على الئمة يتوعد كل من لم يسمع كلامه بنار تلظى ...
لاسف السؤال الاجابة عليه " نعم , كل من لم يؤمن بالله الاسلامى هيدخل النار " لان كل الاجابات من النصوص القرانية والاحاديث تؤيد هذا الرأى بكل اختصار
RE: هل كل الناس هتخش النار ما عدا المسلمين - قطقط - 07-19-2009
توقيعك جميل يا " يجعله عامر "
اللهم اجعل في قلبي نورا، وفي لساني نورا، وفي بصري نورا، وفي سمعي نورا، وعن يميني نورا، وعن يساري نورا، ومن فوقي نورا، ومن تحتي نورا، ومن أمامي نورا، ومن خلفي نورا، واجعل لي في نفسي نورا
آمين
RE: هل كل الناس هتخش النار ما عدا المسلمين - سيسبان - 07-19-2009
(07-19-2009, 11:11 AM)يجعله عامر كتب:
هنقول الست "أوبرا اللي برنامجها بيجي ع الأم بي سي 4 مترجم" إنت مش بتشوف دي بتعمل ايه ودول بيعملوا ايه
لو تفتكر يا عامر انى سألتك نفس السؤال ده قبل سابق و كان رد فعلى نفس رد فعلك
RE: هل كل الناس هتخش النار ما عدا المسلمين - إبراهيم - 07-19-2009
اقتباس:قال واحد ولو بردوه مسيرها النار
واحد غريب مش اعرفه في القعده كان منتبه شويه قال لازم تؤمن بسيدنا محمد مع احترامي لكلام حضرتك
سمعت مثل هذا الكلام كثيراً من المسيحيين المحافظين الغيورين على إيمانهم....والنمط يتكرر من دين إلى دين...
كل واحد يرى أنه أولى بالله وبفردوسه من غيره. وضعوا الله في جيبهم مع أن الله يطلبه الجميع ويعبرون عنه بطرق شتى. طرق متنوعة للوصول إليه أو يصل هو إليهم. لو أن هؤلاء الناس قرأوا كتاب "الوادي المقدس" للدكتور محمد كامل حسين لكبروا في وعيهم وتغاضوا عن التصابي الديني. لو شاء هو لجعلهم أمة واحدة. لكن للتنوع والتباين في الكون حكمة وهي سنة الباري في خلقه.
ستظل لنا تحفظات واعتراضات على هذا الدين أو ذاك ولكن من الغباء أن ننكر على الناس تعدد مشاربهم في وصولهم للمعبود ونظن أننا نفهم "أكتر" منهم.
RE: هل كل الناس هتخش النار ما عدا المسلمين - the special one - 07-19-2009
تحية لك عزيزي يجعله عامر ..
المشكلة اننا كاشخاص لم نعد نعرف من هو اللذي يفهم الاسلام الصحيح حتى نتعلم منه او
نتعرف عليه , وكما يقول نيوترال : جماعة اخرى تفهم الاسلام غلط !
ايمانك - على عيني - لكن المشلكة ان اهل الاسلام اجمعوا منذ قرون على ان الايمان
بمحمد وربه هو وسيلة النجاة المضمونة و الاسهل ولعلك سمعت بالمجرم اللذي قتل مئة نفس
ومن ثم تاب لله قبل الموت و ان الرحمن قرب الارض و شدها شدا - غريبة مافي اعجاز زغلولي
حول مسالة شط ومط الكرة الارضية بهذا الحديث - و بهذا يكون المجرم صار ملاك بريء
ولتذهب دماء من قتلهم هباء ...تساؤلك اعلاه هو السبب اللذي جعل الكثير يكفرون برب الاسلام وانا منهم , رب مريض نفسيا , اذا لم تسجد له اربعين مرة يوميا يحس بالنقص و يطلب من اتباعه ضرب الاطفال وهم في عمر الزهور اذا تكاسلوا عن ضرب وحوههم بالارض طاعة له ..
لفت نظري كلامك عن البهائي انه كذاب ودينه عبارة عن خديعة , صدقني هكذا ينظر غير المسلم للمسلم , وغير المسيحي للمسيحي , ولو انك ولدت بهائي لما قلت ذلك , فانت مسلم بمحض الصدفة والحظ , ليس اكثر , واما نسبة من يعتنق الدين عن قناعة ويبدل دين اجداده فهي مجهرية لا تقارن بحجم من ولدوا على دين الاسلام ..
مساءك سعيد ...
RE: هل كل الناس هتخش النار ما عدا المسلمين - إبراهيم - 07-19-2009
(07-19-2009, 05:14 PM)the special one كتب: تحية لك عزيزي يجعله عامر ..
المشكلة اننا كاشخاص لم نعد نعرف من هو اللذي يفهم الاسلام الصحيح حتى نتعلم منه او
نتعرف عليه , وكما يقول نيوترال : جماعة اخرى تفهم الاسلام غلط !
لو أردت أن تكون مسلم بشكل صحيح حضاري راقي فعليك بالكتاب التوانسة مثل الشرفي ومدرسته. عليك بالزميل "يجعله عامر" ولمساته التصوفية الإيمانية الجميلة.
أما لو أن تكوينك لا ديني من الأساس ولا يجنح للدين فهذه مسألة أخرى.
لكن لو أنت فعلا أردت أن تكون مسلم حضاري راقي جميل فهناك سبل لتحقيق ذلك.