+- نادي الفكر العربي (http://www.nadyelfikr.com)
+-- المنتدى: الســــــــاحات العامـــــــة (http://www.nadyelfikr.com/forumdisplay.php?fid=3)
+--- المنتدى: فكـــر حــــر (http://www.nadyelfikr.com/forumdisplay.php?fid=57)
+--- الموضوع: يوميات مواطن مفروس :الرئيس على الطريقه اليمنيه ! (/showthread.php?tid=14793)
يوميات مواطن مفروس :الرئيس على الطريقه اليمنيه ! - Truth - 09-24-2006
يوميات مواطن مفروس
محمد الرفاعى ( صوت الأمه )
الرئيس على الطريقه اليمنيه !
26/6/2006
العرب .. جرب .. و أهل بداوه و غباوه و تناحه , فهم أول جنس فى التاريخ اخترع مبدأ الرئيس ولى من أولياء الله الصالحين اللى مكشوف عنهم الحجاب , و الرئيس اللى تعرفه حتى لو كان مش قد كده لا مؤاخذه يعنى أجدع من الرئيس اللى ما تعرفوش , و يؤمنون بأن تغيير الرؤساء كل شويه فال وحش و بيقل بركة البلد و بيقلق منام الناس , خصوصا ان الرؤساء العرب ربنا يا أخى مطول فى عمرهم بشكل غريب , ما تعرفش بيعذبهم ولا بيعذبنا احنا , يعنى الواحد فيهم يلبد فى الكرسى ما يطلعش بالطبل البلدى , ولا حتى بالزار , و يفضل قاعد على قلب الوطن لحد ما السر الإلاهى يطلع , أو ربنا يرزقه بإبن لبط صايع يخليه مسافر ولا نايم , و يفقعه الزومبه اللى هى , و يقعد مكانه و هو يغنى " يا عبدالله ياخويا سماح .. و سيبك من اللى عدّى و راح " .
و يبدو ان كرسى العرش له سحر غريب ولا السحر الافريقى الأسود و منيّل بستين نيله , يعنى الحاكم لو حب يقوم يتمشى شويه , ممكن يتشل , أو تطلع له العفاريت بالليل , و لذلك يظل جالسا فوق العرش ليس حبا فيه لا سمح الله , و لكن خوفا من اللعنه التى ستطارده حيا و ميتا , و لذلك لا يتصور أبدا و لو للحظه واحده أن يترك الحكم و يجيب لنفسه الكافيه و المرض , زى الجنرال فرانكو عندما كان على فراش الموت , و قالوا له إن الشعب قد جاء ليودعه فقال قولته الشهيره : ليه ؟ .. هو الشعب مسافر ؟!
خاصة و أن الشعوب العربيه وشّها فيه السماحه و القبول , وتبقى أمّه داعياله اللى يحكمها و يعكمها من رقبتها , و يسحبها وراه زى البهيمه الفطسانه , و العرب هم أول من اخترع المبايعه و "بايعنى بايعنى .. بعادك لاوعنى "
و "اخترناك اخترناك .. و اتبهدلنا وراك" .
لكن الأخوه اليمنيين ابتكروا طريقه عبقريه للمبايعه , طريقه لم يتوصل إليها اخواننا بتوع سبعتلاف سنه حضاره و خساره و خيابه , و الذين رفعوا شعارات خايبه جابت الكلام للسيد الرئيس بدل ما تخدمه , زى حكاية الجنين فى بطن أمه يبايع الرئيس , و اختارك الله فلماذا لا نختارك , و الخيره فيما اختاره الله , و كام فتوى مضروبه من مشايخ الفتّه و الكوارع , إن الجبان ابن الجبان اللى مش ها ينتخب الرئيس كافر , وربنا ها يحرقه فى نار جهنم .. إلى آخر هذه البواخه و الهبل , مع إن الرئيس كان ناجح ناجح , بس تقول إيه بقى فى الحراميه اللى عاوزين يسرقوا من ورا الحكايه دى .
لكن تعالى اتفرج بقى على العبقريه اليمنيه , فقد خرج بعض الاخوه اليمنيين و بعد جلسة قات معتبره , و أعلنوا أنهم سوف يرفعون دعوى قضائيه ضد الرئيس اليمنى على عبدالله صالح اذا لم يرشح نفسه للرئاسه !!
شفتوا الرواقه و المزاج بجد ؟!
يعنى الأخ الرئيس اليمنى لو تعب ولا حاجه ــ و مش بعيد على ربنا يعنى ــ و حب يرتاح .. هيلاقى نفسه متهم و واقف فى القفص , و جايز كمان لو ركب دماغه و أصر على عدم الترشيح يخبطه القاضى عشر سنين سجن بتهمة اهانة الشعب اليمنى , لأنه ها يبقى شكله وحش قدام الشعوب العربيه , و ها تعايره بإنه ما عرفش يتمسك برئيسه .
و نحن طبعا لن نطالب بإدخال القات مصر , عشان نبقى آخر حلاوه و سطل , و نعرف نتمسك بالسيد الرئيس , و اللى حوالين السيد الرئيس , و أنجالهم طبعا , لكننا سنطالب بتطبيق تلك الفكره العبقريه , اللى جت لنا على الجاهز , فإذا فكر السيد الرئيس فى التخلى عننا , نقوم برفع قضيه ضده, و ساعتها بقى مافيش نطع من الأنطاع ها يقدر يفتح بقه , و يقول كفايه كده على الرئيس لأنه تعبان , فقد أصبح رئيسا بحكم المحكمه , و طبعا الداخليه ها تساعدنا فى تنفيذ الحكم , و فى حالة يعنى ما الرئيس زهق مننا و من قرفنا , و البعد عن خلقتنا غنيمه .. أو إذا كان الرئيس بعافيه .. فمعلش يستحمل شويه عشان خاطرنا , ماهو بوتفليقه أهه صحته متدهوره , و غيّر الدستور عشان يستمر فى الحكم , و ما يقهرش شعبه و يشحططه و تبقى سيرته على كل لسان , و الريس برضه مننا و علينا , و ما يرضاش نتبهدل و نتفضح وسط اللى يسوا و اللى ما يسواش , صحيح احنا شعب غلاّوى و رزل , و زى القطط ياكل و ينكر , بس معلش .. استحمل معانا شويه يا ريس , و سيبك من العيال الصيع السمّاويه اللى كل شويه يقولوا لك الريس بيقبض 450 ألف جنيه فى الشهر , طب ما يشوفوا الفرخه بكام .. ولا كيلو اللحمه بكام !!
و ربنا يوقفلك ولاد الحلال يا ريس و يكفيك شرّنا .
يوميات مواطن مفروس :الرئيس على الطريقه اليمنيه ! - Raheel - 09-24-2006
[B]ياسلااااااااام يا ولداااااااااه ويبقى رئيس بحكم محكمة
رئيس وحب يفلسع من الحكم
زهق ياجدعان
بصراحة كده نظره وصحته هاتضييييييييييييع
جتنا الأرف شعوب غم برضه ماسكين فيه بايدنا وسنانا ........
المهم بقى ده مجرد تصور بسيط لحضرة صاحب الفخامة الرئيس بحكم المحكمة
أولا هنلاقى فيه شاويش شرطة بييجى بالليل يصحى سيادة الرئيس من نومه علشان يمضيله على شهادة المراقبة انه راح قصر الرئاسة النهاردة الصبح وخرج بكام بيان واصدر كام توجيه وانه بينام فى قصر الرياسة وكله فى الدفتر موجود ومتسجل
وطبعا لما يتقابلوا الرؤسا العرب فى مؤتمر ولا حاجة تلاقي واحد منهم عاوز يذل التانى يقوم يقوله : انت خلصت المراقبة اللى عليك ولا لسه ؟
ولو ماخلصهاش مش يتدارى لا لازم يطلع علشان يورى المحكمة انه بيشتغل رئيس اهوه وبيسمع كلام المحكمة وممكن كمان يطلع ببيان شجب وإدانة ولا حاجة لزوم الحبكة الدرامية
وطبعا قرايب الريس مش هايعرفوا يدخلوا كليات عسكرية علشان قريبهم رد محاكم وواخد حكم محكمة " والحكم مخل بالشرف "
ويبقى السيد الرئيس من المشتبه فيهم اللى كل شوية يجرجروهم على الاقسام فى اى قضية وباى تهمة وممكن بقى لو حابب يريح دماغه يقوم يشتغل مرشد للبوليس " شيكو يعنى " ويبلغ البوليس ويرشدهم عن اى محافظ او وزير او اى صاحب منصب فى الدولة عاوز يعمل خدمة لاهل البلد ويسيبهم -أو حتى رئيس دولة تانية عاوز يعملها أبو زمل يعنى- ويقوم البوليس يلحق العملية قبل مايظهر التنحى وناخد وقت على مانرفع قضية ونرجعه بحكم محكمة وممكن كمان يلحق يسافر برة البلد قبل ماناخد الحكم وتضيع علينا فرصة اننا نخليه يحكمنا بالعافية
وحيات الماما بتاع الأنا إحنا عالم مانستهالش سيادة الريس " متقال " حتى ....
أعتذر للهجتى العامية ولكنها لم تكن سوى تقزز شديد من الكلمة التى ذكرت آنفاً
ويجعله -الوطن العربى- عامر