+- نادي الفكر العربي (http://www.nadyelfikr.com)
+-- المنتدى: الســـــــــاحات الاختصاصيـــــة (http://www.nadyelfikr.com/forumdisplay.php?fid=5)
+--- المنتدى: أقــلام ســاخـرة (http://www.nadyelfikr.com/forumdisplay.php?fid=82)
+--- الموضوع: إعلانات زياد الرحباني (/showthread.php?tid=19362)
إعلانات زياد الرحباني - أبو عيسى - 03-29-2006
نص الإعلان رقم 2.. زياد الرحباني
حضرات المستمعين والمستمعات
تحية وبعد،
ربطا بالإعلان رقم واحد اليكم الإعلان رقم 2: السلام عليكم وعليكم السلام.
رحمة الله على جميع الشهداء، وآخرهم شهداء العام 2005 وأولهم الرئيس الشهيد رفيق الحريري.
يا حرام. يا حرام. لنو كل واحد راحت عليه وحدو. مع الأسف الشديد الانفجار. (موسيقى) بأمان الله نبدأ بالعناوين (جينغل نشرة أخبار صوت الشعب بتوزيع مختلف بشكل طفيف ترافق صوت الرحباني على طريقة تعداد العناوين) اولاً الرقم 14، ثانياً فندق البريستول، ثالثاً قاضي التحقيق الأول رشيد مزهر، رابعاً الثورة في يوم واحد، خامساً حادثة الأشرفية في 5/2/2006، سادساً الطموح اللامحدود حسناته وسيئاته، غونداليسا معوّض، سابعاً لبنان اولاً في 2 شباط 2006، ظاهرة تحسن نوعية تسجيل صوت أيمن الظواهري في بياناته، تاسعاً وأخيرا وليس آخراً: أين هو مركز القاعدة في العالم، المركز الرئيسي. وهذا بمثابة حزورة الإعلان رقم 2، ولمن يود الاتصال ممكن الاتصال على أرقام صوت الشعب أو بالشهيد الحي. (جينغل نهاية العناوين وبداية النشرة).
<<دأبت إذاعة صوت الشعب وعلى مدى يومين على بث إعلان بعنوان إعلان رقم واحد، وفيه ما يقول <<منعاً للوقوع في التشويق الرخيص>>. هلق بالفعل انبث هالشي على مدى يومين، انبث الإعلان.. كثير يمكن، بس ما كان المقصود التشويق الرخيص. إنما، بتعرفو اكيد كلكم، شو يعني انو اوقات الواحد ما يعرف منين بدو يبلش. مثلاً إذا عم يزق بيت، عم ينقل من بيت لبيت منين بيبلش، أو إذا موظف متراكم عندو كمية معاملات، او إذا قالتلو مرتو لواحد احكيني صراحة بشو أنا مقصرة، منين بدو يبلش؟ فكيف اذا بدو يحكي كمواطن عن شو عم بيصير؟ أكيد مش كلمة لبنان اولا بتهَدّيه. ولا كليب <<حرية سيادة استقلال>> بتقيمو او بتقوم فيه. لأنو مثلاً صح انو <<لبنان اولاً>> بس شو هوي، إذا <<لبنان أولا>> شو هوي الثانياً؟ آه؟ لازم تكون اولاً وآخراً،ناقصها آخراً، ولمزيد من التنوّر ممكن مراجعة مقالة الصديق والرفيق جوزف سماحة نهار 16/2 المنصرم مثل الأكثرية النيابية. وهيدا بجريدة <<السفير>> لأنو شرَح وشرَّح كلمة <<لبنان اولا>> وما رح فينا ولا بأي شكل نشرّحها أكثر منو. نحنا فينا نقول: سامعين بالخبز؟ أكيد. يعني هيدي اولاً ما بتطعمي خبز. وإذا سامعين بالخبز بتكونو يعني سامعين بالقمح. فهيدي ..وقمح! (موسيقى)
قبل الدخول في العناوين جاءنا الفاكس التالي: ما معقول يكون السفير الروسي بيحكي عربي أحسن من الأستاذ كارلوس ادّة. يعني خاصة انو الأستاذ مشترك بثورة لبنانية. وبس نقول بتعرف تحكي عربي؟ بيكون قصدنا بتعرف تحكي لبناني. أو انو يحكي عربي من النائب نايلة معوض استاذة النائب سولانج الجميل باللغة العربية، كما وهي أستاذة رشيد الشرتوني السرية الله يرحمو. وهيدي معلومات ما بيعرفوها لا جمهور 14 آذار ولا 8 آذار. طيب ليش بدو دايماً يصاقب هالفريق اللي كان اسمو اليمين اللبناني، عربيتو ضعيفة؟ هلق حدا قايل انو الفينيقي ما كان يحكي عربي يا ترى؟ ما على علمي. ولا سعيد عقل الله يطول بعمرو. طيب كيف كان يتاجر هيدا اذا ما كان يحكي عربي؟ وكيف كان عم يفتح العالم؟ ما هوي مفروض محتكر الحرف، ومصدّرو كمان! ربما صدّرو بس هوي ما عاز يجربو؟.. في شي مش راكب هون، تاريخياً. بعدين أي حرف منن صدّر؟ ما بعرف. لست أدري. بس اللي اكيد انو نجحت معو هالبيعة. لأنو انتشر وتم استثمارو من شعوب كثير بالعالم، وخاصة الشعوب العربية، باستثناء فندق البريستول. هذا بحسب الفاكس اللي وصلنا. شكراً. (جينغل فواصل صوت الشعب)
بالعودة الى العناوين <<الخبر الأول الرقم 14. تجددت وتزايدت في السنتين المنصرمتين الأربعتعشات بشكل ملفت وذلك في حياتنا السنوية. هل هي مجرد صدفة؟ وما سر هذا التطابق ومن يعرف كم 14 أصبحنا ننتظر في العام الواحد؟ بالعودة الى الذكريات: 14 السيئ الذكر هو اغتيال الحريري. وهو بنفس الوقت عيد العشاق الذي لم يحصل. وحسناً. لأنو هيدا عيد جديد علينا مثل البيئة.. اخبار البيئة. 14 آذار الثورة العظيمة ولنا عودة اليها. هلق في رقم منّو 14 بل سبق الأربعتاعش اسمو 8. وكان 8 آذار تحديداً. هلق بجمع بسيط بين 14 و8 بيطلع معنا اتنين وعشرين. هل هالرقم بيعني لحدا شي على صعيد الوطن؟ هوي بالتشارين بيحصل عادة. ولكن، حتى اللي بيعرف شو يعني هالعيد منقللو: الويل لأمة لن يحصل فيها ذلك. هلق عنا كمان جفت للصيد مش 8 و14. وما بيقدي لهالمناسبة العظيمة. بتفرق يوم. وعنا لعبة اسمها 14. وهيه أسوأ ما في الأربعتاعشات كلون. لأنها لعبة، بالنهاية، لعبة ورق، والإعلان اليوم مش بقصدو ابداً لا يدافع عن لعب الورق، لانو بيعتبر انو هيدا كما يقال شرعاً: ميسر. وهالاعلان ضد الميسر وضد الربا وضد الفايدة. وبالتالي ضد اللوتو وضد اليانصيب بعزاهم. (جينغل نهاية الخبر) الخبر الثاني: فندق البريستول. عن فندق البريستول فندق من الدرجة الأولى وهو عريق ومصنف بعدة نجوم، لكنه مؤخراً زاد نجوماً وكان ذلك في 2005 وبداية 2006. فقد أصبح يرينا نجوم الظهر، بوضوح. فهي منقولة حتى على التلفاز، وهي نجوم الظهر اليمينية، أو اليسارية الخلاسية، لكنه ما زال فندقاً مرموقاً، رغم ان إدارته لا تعرف ماذا يفعل بالزبط هؤلاء الثوار المجتمعين وبشكل مربع، وقد بدأوا ينقصون. وتراهم إدارة الفندق كما نراهم على التلفاز يضحكون أكثر مما يتجهمون، رغم جذرية وقطعية المواقف.(فاصل) منيحة جوقة البريستول شو بدك(ضحك) خاصة مع وليد عيدو والياس عطالله. وعاملة ثورة بيوم واحد!
جاءنا عن قاضي التحقيق الأول وبعتقد الأخير، السيد رشيد مزهر انو شغلو لفوق راسو: صحيح ومؤسف. لأنو بعتقد رح يزيد شغلو لسوء الحظ، لسوء حظّو وحظنا. مع أنو معروف القاضي رشيد مزهر بالنزاهة وبالعدل بس مش عدل إطلاقاً يتسلم هالقد قضايا بنفس الفترة. بركي شوي بيقدرو يخففوا عنو الدرك؟ أو الدرك المدنيين الجدد. انا هيديك الليلة وقفنا شخص، كنا شخصين بسيارة، مدني بالليل قال: الشباب.. تصورت بدو يقول منين؟ او هويات. قال <<الشباب لبنانية؟>>. قلنالو <<لحظة>>، وبلشنا نسحب الهويات. قال <<لأ، لبنانية؟>> ما بعرف إذا هيدي منيحة، بس جديدة.(فاصل)
<<نعتذر لعدم متابعة تفصيل عناوين الإعلان لضيق الوقت. بس بالنهاية بحب بس قلك، لتتذكر يعني: انو بس تبقى عم تقرا جريدة الخميس، بتكون عم تقرا أخبار الأربعا. كيف؟ أقرأ جريدة الأربعا تلاحظ أنها جريدة التلاتاء. ما في جريدة الأربعاء نهار الأربعاء يا خروق! فيك تطلّع هيك جريدة وبحالة واحدة: إذا كنت رامسفيلد او وولفوويتز أو بولتون. وجريدتك بدها تكون عم تحكي عن كابول وبغداد وخارطة الطريق لفلسطين.
أسعدتم اوقاتاً. إذا وللتذكير، حزورة الإعلان رقم 2: أين هو مركز القاعدة الرئيسي؟ أبقوا معنا وإلى اللقاء مع الإعلان رقم 3، ومع مختار الرميلة في 87 / 88 ونائب طرابلس في 2005 ..أووووه. جخة! ومع عوانس رئاسة الجمهورية، يا الله، اللي طلعو من القرنة وفوق ذلك فطمهون البطرك>>.
إعلانات زياد الرحباني - أبو عيسى - 03-29-2006
نص الإعلان "رقم 3" .. بقلم : زياد الرحباني
<<عودة للعناوين اللي بقيت عالقة من الإعلان رقم 2 بسبب ضيق الوقت: 1 حادثة الأشرفية في 5/2/2006 سفارة الدنمارك. 2 الطموح اللامحدود، حسناته وسيئاته. 3 ظاهرة تحسن نوعية تسجيل صوت أيمن الظواهري في بياناته الأخيرة. واخيراً حزورة الإعلان:
أين هو مركز القاعدة في العالم. (موسيقى) على فكرة: إجا كثير اتصالات. وأخيراً: آخر معلومات رئاسة الجمهورية الأمنية الأستخباراتية المغلوطة، إنشالله ما يداهمنا الوقت قبل ما نوصل لها. (موسيقى)
الموضوع الأول. واحد: حادثة الأشرفية في الدنمارك. من المؤكد انو في رجعة قوية للأديان بالعالم كلو، من وقت انهيار الاتحاد السوفياتي. هلق مين وراها؟ حديث طويل مش لليوم. وإجت وتتوجت بأحداث 11 أيلول، وما تلاها من تصريحات، لسيدنا المسيح الجديد غير المهدي ولا المنتظر جورج بوش. وانكتب كثير كتب عن هالموضوع، وقبل وبعد، وأكثر واحد يمكن صار شعبي <<صراع الحضارات>>. كمان مش لليوم الدخول بهالموضوع. اللي بيهمنا من الموضوع، هالرجعة العاصفة للأديان. واللي بشهادة كبار رجال الدين بالعالم، ما الها علاقة بالدين نفسو. هلق المشكلة بتزيد بس كل واحد على دينو الله.. بيعينو! ما بعرف إذا مزبوطة هاي بس انشالله لأ. لأنو في شعوب جاهزة من دون أي إعانة، فكيف إذا هالإعانة إلهية؟ بتصير تجوّهر!
هلق إذا رجعنا للبنان، هون.. نحنا؟ دقوا ع الخشب. وع الحطب. وفيكم تدقوا ع النكل، ع الألمنيوم، ع المازونيت. حتى إذا عالبلاستيك والتنك دقيتو، نحنا السباقين بتلبية النداء. منبيّض الوجه، ومنرفع الراس، وبلا دف منرقص. يعني منعجبك، بس أنت ما بتعجبنا. لأنك عم تسترجي تحكي عن الأديان من برات الأديان.
كانت الأشرفية على موعد مع مسيرة، جربوا بعض التلفزيونات يصغروّها بالتصوير، إنما عادوا اختشوا، ووسّعوا كادر الكاميرا، لأنو انشلّ البلد، وبمناطق بعيدة عن الدنمارك اللي بالأشرفية، ونهار أحد، صار تسكير طرقات مثلاً بالحازمية وبالمنصورية. وينك ووين الأشرفية!
كانت الأشرفية على موعد مع حوالى عشر آلاف بني آدم، كلّهم الله وكيلك: سوريين وفلسطينية وحزبُ الله! إيه والقرآن. طاحمين عليهم بسبب إساءة صارت للنبي محمد بكاريكاتور بالدنمارك. هلق إصرار الدنامرك على عدم الاعتذار أو التخفيف من حدة هالرسوم المهينة، انتشرت فجأة بعد اعتراض المملكة العربية السعودية عليها، وكان مارق.. يعني صرلو تلات أشهر طالعة. هلق مش مهم. أهالي الأشرفية بأكثريتهم طبعاً، ناس من غير نوع صراع حضارات. يعني طاحمين وبلشوا يكسروا عن أبو جنب على فكرة <<أبو جنب>> هو مسؤول بالقاعدة يعني أهالي الأشرفية ما كثير فرقانة معهم إذا سنة ولا شيعة. هلق في فريق حزبي اسمو القوات اللبنانية، وبعض آل الجميّل.. قال، كان بيتمنى مش كشارع إطلاقاً، الشارع مرعوب كقيادة، يكونوا أصحاب النشاط، حزب الله. لأنو صار في قناعة انو كل تطرف عم بيرد ع تطرف، لازم يكون وشرعاً: شيعي! ع أساس ما في سنة بالبلد إلا كتلة المستقبل ودار الفتوى. وهالجماعة حفظوا <<أبانا الذي في السموات>>، وهني حفظوا الفاتحة بهالدورة المكثفة اللي عملوها على ضريح الرئيس الحريري على امتداد الألفين وخمسة. وشبكوا الهلال بالصليب، وتصوّروا، وأصروا يكونوا حاملين ولاد. يعني لدرجة ما انتبهوا ببعض اللقطات التلفزيونية <<الفتحة>>، يعني انو طلعت شبكة الهلال والصليب إذا وَلد محملينو إياهم، متل المطرقة والمنجل.. تبع شو؟ تبع أكثر شي بيكرهوه، منذ انهيار الاتحاد السوفياتي. (فاصل موسيقي)
المهم يا سيدنا، لأ، طلعوا مش شيعة. طلعوا اللي طلعوا ع الأشرفية من أهل السنة. هولي جماهير، وموجودين وبكثافة. وقللهم الوزير السابق سليمان فرنجية: طيب لاقطين 35 او 65 او 125 مواطن سوري، وعلى 45 فلسطيني، طيب وهوليك العشرة آلاف، إلا.. هول، مين بالله؟ ما هولي اهلنا ومن الشمال ومنعرفهم. ولحقو الجنرال ميشال عون قال لهم: بما انو شو ما كانوا خيي: سوري، تتري، بدوي. ما هولي عايشين بهالبلد وخاضعين لقوانينو، أيه أما لأ؟ وهيدا كلام اكثر من سليم. هيدا صار سليم الحص، لو بيسمعوه شويه اكثر الناس. بسن نحنا صايرين ما منحب انو حدا هيك معتدل وموضوعي ورايق. ما في. منحب الزعران، لأنو منحضر اميركاني.
في جملة إلو دهر بيعيدها الدكتور سليم الحص <<نحنا منحب الحرية كتير، لدرجة صار عنّا كثير حرية وقليل من الديموقراطية>>.
هلق بمحصلة أحداث الأشرفية في ملاحظتين بالنتيجة. أول واحدة: كان للقوات اللبنانية اللي تجمعت بشكل رئيسي بمنطقة <<أوتيل ديو>> نسبة انضباط وحكمة. هيّ منهم، هيّ من تكاثر عناصر الجيش اللبناني؟ يعني، بالحالتين، بيشكروا عليها. والملاحظة التانية: طلعوا كجولة اولى، السنيين المتطرفين، أقوى بتكسير الأزاز من الشيعة. هيدا لحد هلق. هلق بالمستقبل اللي هوي جزئياً لألهم هوي وأزازو خاصة السّنة اللي بكتلتو لهالمستقبل، رح نعرف ب14 آذار الجايي، وقريب صار، بس تحصل مباراة فعلية، بلشوا يعني جميع الملل يعلنوا عنها ونحنا منهم. نحنا انتبهوا لا سنة ولا شيعة.. مخلطين اجلّكم، بدكم لا تواخذونا.. متل البلا أصل يعني بس تحصل هالمباراة قريباً جداً، رح نعرف مين الأقوى بتكسير الأزاز. (موسيقى)
سوليدير ركّت كتير ع ديكورات الأزاز. يمكن إجا الأزاز مع كلمة الشفافية؟ ما بعرف، وضواحي بيروت.. ضواحي سوليدير عفواً، من جميزة لمونو.. للي بدكم، قلدتها. وصار دارج ع أساس، سبحان الله الأزاز ما بيعطي قيمتو لحدا! هلق بكرة بيعطي قيمتو لحدا؟ بيعطي قيمتو للي بدو يرجع يصلحو. هلق يمكن بكرة المباراة هيدي يربحوها الشيعة. لأنو عددياً واحد، ومتحدين أكثر من غير طوايف. هلق يمكن ما يوصلو للتصفيات، بس إذا ضلوا مدعومين من التيار الوطني الحر و<<الخونة>> الباقيين كالمردة، والحزب الشيوعي وحركة الشعب وهيدا مرجح خذوا ع لبن.. وع أزاز.
أنت متصوّر واحد، jeune يعني، من جامعيي اليسار الديموقراطي القلال، أشّر بإيدو لشوفير سرفيس سني بيروتي مكحكح ع الخطوط كلها، ومعو طبعاً محرمة بيسفقها ع رقبتو بالصيف وبالشتي، وقللو: ع السنتر فيل . شو معقول يجاوبو او كيف معقول يتطلع فيه؟ او إذا سني معاصر الموارنة، عفواً: معاصر الموارنة عن جديد، قللو بلغة استعمارو الأم، قللو بالعربي الفصيح يعني عالداون تاون تيهونها عليه. بعتقد على عجقة الزمامير اللي رح تصير وراه، وهوي أنجق عم يسترزق، رح يقللو: <<أطلع وبعدين منتفاهم ولو خيي>>.
أيه شي.. ساحة الحرية، ايه شي.. ساحة الأرز، ايه شي ساحة الاستقلال، ايه شي ساحة 14 آذار، ايه شي ساحة الشهيد رفيق الحريري.. ولو عيني؟ هاي كان اسمها البلد. كنا من حيالله منطقة نوقّف سرفيس يعني، من أنطلياس مثلا، نقللو: عالبلد؟ ينتع راسو صوب الشمال أنو طلاع. وهيدا البلد.. ما عاد موجود! (موسيقى)
بموضوع الطموح اللامحدود: حسنات وسيئات.
ما ممكن لأي إنسان يكون ضد إنسان عندو طموح لا محدود. بالعكس بتصور بُيعجب فيه وبيجرب يكون متلو. حلو الطموح اللامحدود. حلو يكون موجود عند إنسان. بس مش إذا كان هالإنسان معالي الوزير نايلة معوّض. بيصير هالطموح مخيف. مهول ومجهول.. العواقب. بدها تتقبل هلق معالي الوزير لغتنا وألفاظنا، لأنو إلنا فترة كمواطنين مش زغرتاوية عم نتحمل كلمات وألفاظ.. منها، ومع صوت وصورة! غير.. طريقة لفظها، وغير تصنيف نوع ذبذباتها الصوتية على الدين (الأذن)، وحتى دينان (آذان) جماعة 14 آذار نفسهم. منتمنالها هلّق، تكون بهالديموقراطية اللي ما انفكت تبل إيدها فيها ع الطالع ع زغرتا وع النازل من بكركي، وهلق بس فلّو <<السوغيية>> (السوريون) حصلت عليها بشكل.. سحري. جاكوزي.
انا برأيي طموح السيدة نايلة معوض عارم. ما بقى بالوزارة. والأرجح ما بقى برئاسة الجمهورية لأنو مضمونة هيدي.. قطّعتها. طموح مش بس جامح، الكلمة مش كفاية، انا بيتهيأ لي انها بتشعر بينها وبين نفسها، بتشعر أنو ليه لكونداليسا رايس وزيرة خارجية؟ شو فيها هيدي المرا؟ ليش مش هيه؟.
أعزائي المستمعين رح نقارن النقاط اللي لصالح السيدة نايلة معوّض وضدها، بالنقاط اللي للسيدة كونداليسا رايس وضدها، لتكون ليش هالمخلوقة تولّت هالمنصب؟
أولاً: السيدة نايلة معوّض بتحكي عربي أحسن من السيدة كونداليسا رايس. بكتير.
تانياً: مواقفها للسيدة نايلة معوّض قاطعة بشكل فاضح ويعني شاسع، بينها وبين كونداليسا رايس. اللي من نقاط ضعفها أنو كونداليسا رايس ساعة بتهدد سوريا وساعة بتغازل سوريا. الست نايلة مثلاً بالمقابل، ما عندها هالقصص. دغري..
رابعاً: الست نايلة زوجة الشهيد رينيه معوّض. ما ألها فضل يمكن بس، التاريخ حكم وهيك صار. هيديك رايس شو تاريخها والله مين بيعرف عنها شي؟ بيقولو كانت تتعاطى شوية بشركات البترول. وعيب ينحكى بالبترول بوجود إنسان عانى متل الست نايلة معوّض.
خامساً: الست نايلة معوّض كل عشر دقايق بتدعي الرئيس لحود يستقيل. او <<يحل>>، أو <<يفل>>، أو <<يخلصنا>>، أو <<يحسّ بقى>>. يعني جريئة كتير. وهيدا مش متوفر برايس. رايس اند سبايس. كونداليسا رايس بس يحكي جورج بوش بتوقف على جنب وبتحط راسها بالأرض. بعدين ظروفها.. أنو واسطة. محسوبية. الله يلعن الفساد حتى بأهم دول بالعالم. انو تعرفت عليه.. من هون لهون، جابها. أنو امراة سودا بيرضي فيها السود، وبتعرفو يعني هالحسابات الأميركانية. هيدي نايلة معوّض ما بتفوت فيها. وإلا كانت قبلت هيك منصب من زمان.
(فاصل الأخبار على صوت الشعب)
قريباً وإذا طالت الحرب على الإرهاب، والأرجح انها ستطول. رغم الصواريخ الذكية الأميركية التي يُشرح عنها وتصوّر على كل الأقنية الغربية، ليرعبونا ويكرسحونا: انو كيف بتخرق كذا طبقة أرضية بتورا بورا مثلا. وإذا صاروخ على سبيل المثال مثلا موجّه على بن لادن، وطلعلو بالغلط أيمن الظواهري او الزرقاوي بوجهه، بيمرق بكل خفة ولياقة بيناتهم، رغم وزنه وخرقه لهالكذا طبقة. بيروح صايب على بن لادن. هلق: في احتمال ما يلاقيه، بيرجع من مطرح ما إجا، بدون ما يقتل ولا أفغاني، ولا باكستاني، ولا حدا من طالبان، لأنو هيدا ذكي. بهالإطار، رح ينزل سي دي قريباً لأيمن ظواهري، إنتاج <<طالبان بيكتشرز>> مرفق ب<<دي في دي ساراوند سيستم>>، أي بإحاطة خماسية الأبعاد، <<فايف بوينت وان>>، وهو يهدد إنكلترة بمزيد من العقاب.
(فاصل موسيقى الأخبار)
بما يتعلق بموضوع: أين مركز القاعدة الرئيسي في العالم؟ صراحة إجا من 250 ل300 اتصال، رغم انو ما اعلنّا عن أرقام <<صوت الشعب>>. يعني في ناس تعذبت لتلاقي الرقم، وكان متوقع يكون عدد المتصلين أكثر. بإحصاء للأجوبة طلع معنا بشكل مفاجئ، خمسين بالمية، اللي هيه الأكثرية حددت واشنطن والبعض منهم حدد أكثر البيت الأبيض. هلق في خمسة بالمية منهم حدد <<السي آي آيه>>. في نسبة 15% حددت الرياض في السعودية. وفي أقلية تعتبر بالنسبة لهول برأيي، اللي هيه 30% تقريباً حددت انو أفغانستان أو ربما باكستان.
هلق أكثر جواب حدد عنوان محدد وغريب من نوعه قال انو مركز القاعدة الرئيسي هوي مركز اليسار الديموقراطي ع المزرعة فوق <<الهوا تشيكن>>. هيدي طبعاً الاتصالات رح نبعت منها نسخة للنائب السابق فارس سعيد ليتمم ملفه اللي بدو يبعتو على الأمم المتحدة ويتشكى فيه على المخيمات اللي عم يدربو فيهم المردة.. القاعدة بالشمال، ونسخة لوزير الداخلية بالوكالة أحمد فتفت لأنو عم يقللو: لأ يا خيي مش مزبوطة.
بلكي ربما هالمعلومات بتساعد.
كما انو على سيرة مركز اليسار الديموقراطي ع المزرعة، بدنا نتوجه للسيد الياس عطا الله، يعني مختار الرميلة السابق ونائب طرابلس، بحب ذكّرو أنو عملتو جمعة بالأسترال، بأواخر الألفين وأربعة لليسار الديموقراطي، وبتعرف أديش كان فيها.. طليعة. يعني.. شو بدي قلّك؟ وقعتّو رفيق الحريري الله يرحمو بخبرية، وأخذلكم مركز. ماشي الحال. بنفس الشهر عملنا، الحزب الشيوعي عمل بالأونيسكو ذكرى ثورة أكتوبر، وبتعرف أديش كان في ناس.
ما راح فيكم تجمعوا الناس يا الياس.
إعلانات زياد الرحباني - أبو عيسى - 03-29-2006
نص الإعلان رقم 4 بقلم : زياد الرحباني
مستمعينا الكرام اليكم في ما يلي الإعلان رقم 4.
وفي العناوين:
1 الخلاف، الطاولة، الحم...، الحوار عفواً، النتيجة.
2 السيادة والحرية والاستقلال.
3 اسأل مجرب.
4 التحيّتين.
وفي التفاصيل.
اولاً، طلع احد نواب الأكثرية من فترة صباحية على التلفزيون لأنو الظاهر ما كان عارف شو بدو يعمل، يمكن، و<<ساءب>> اتصلوا فيه <<معاليك فينا نستضيفك اليوم او بكرا؟>> قلن اليوم. لف ورجع دغري لعندن قد ما انبسط. تلفزيون! مش انو راديو.
المهم من ضمن اللي طمنا فيه، جملة وكررها. قال إذا كان في خلاف وما عم نقدر نوصل لنتيجة المفترض نعود للحوار لنوصل لنتيجة وما يعود في خلاف. هون انتهى تصريحه.
هالشي فعلاً كتير تصريح صحيح (موسيقى). ورجع سئل، طيب اذا انتهى الحوار استاذ وبقي الخلاف وما صار في نتيجة؟ جاوب بمعنى ما منتمنى ذلك، منتمنى نوصل لهالشي لأنو... ما منتمنى نوصل لهالشي لأنو اذا ما صار في نتيجة بيبقى الخلاف وما بيجوز لأنو نحنا بدنا نتوصل لنتيجة. ما لشو بالضبط الحمار. الحوار عفواً.
أعزائي المستمعين بفتكر هيك رح نقضيها (موسيقى).
أنا رح أعرض شي تاني فيكن تسمعوه. إذا كان في خلاف وما عم نقدر نوصل لنتيجة خلينا، اولاً نوصل لنتيجة وما يعود في خلاف، هي أعظم شي بالعالم.
هي عادة بيوصلوا لها لسوء الحظ أسرع شي ناس ما في بيناتهم خلاف ولا بعود بدهم طاولة للحوار... ولا للحمار.
او ثانياً، خلينا نوصل لخلاف وما نطلع بنتيجة ونقول الحقيقة، هلق شو بيترتب عليها. حرب اهلية، هبوط اسهم سوليدير، عدم انتعاش بالسياحة... بيكون هالشي طبيعي لأنو ريحتو بتطلع واللبنانيين بيتدبروا متل ما تدبروا من ثلاثين سنة. هيدي هلق حدّدوها ثلاثين، وبِرَغلْجُوَا على هالاساس.
هلق ثالثاً، خلينا نقول بأقصر الطرق طلعنا بعد طاولة الحوار بالنتيجة، والنتيجة هيي خلاف. ساعتها... شموع. نوع شموع مظبوط. ونستعد نحنا واياكم يا اخوتي لكل الاحتمالات. Au revoir et merci
ثانياً، هلق بنهاية المطاف انسحب الجيش السوري من لبنان وانسحبوا مخابراته. وافق على ذلك الامين العام للامم المتحدة كوفي أنان. طبعا فارس سعيد ما وافق ولا الياس عطالله ولا الوزيرة نايلة على الغصون، معوض.
بس هني انسحبوا وكمان بإشارة من كوفي انان، والأهم والأفعل، بامتعاض سني وتحديداً بيروتي سعودي. ولولا هذا الامتعاض الاخير ما كان في شي بيسحبهم. لا مليون ولا مليون ونصف. أساساً القرار 1559 من اي متى طلع وما انسحبوا. وصار شي، واحد، هو انو تم اغتيال الرئيس رفيق الحريري.
يا اخوان، اخوان الصفقة، يا اخوان بالوطن، يا اخوان المسلمين، يا اخوان السامعين، يا اخوان اخوات ستين الف اخوات كذا، يا اخوان الاخوة، يا اخوان البلية، يا ايها الضالين والضالات.
في سؤال، هلق بيتوجه لأكثر من إنسان، بس نحنا رح نوجهه لشخص لأنو كان قائد ميليشيا. يعني مسلحة، منظمة وكان إلها سيطرة بفترة كبيرة على احدى المناطق اللبنانية. هل بيرضى رئيس الهيئة التنفيذية في القوات اللبنانية، يشوف الطيران السوري عم بيقوم كل يوم بطلعات بالأجواء اللبنانية؟ اكيد لأ. يا عيني، يا عيني ركبت. اذاً كيف بيقبل، الطيران الإسرائيلي يرتكب هالشي.
ومن وقت ما خلق أنا ما بقبل، انو هو يقبل. خاصة كونه مقاوم لبناني تاريخياً لأي غريب، ومع السيادة وبعدين بيجو هوديك الحرية والاستقلال، لوقتها. بس السيادة.
لا زم يجند ميليشيا القوات اللبنانية، اللي ما عادت منحلة، وبلشت تعمل حواجز على طرق الارز الى جانب، بحسب تصنيف جوقة البنتاغون والامم المتحدة المشتركة، ميليشيا حزب الله. <<حزبو الله>>. خاصة انو سيد او سيّد من نادى بالسياسة. غيره (موسيقى).
ثالثاً، بيقول متل من امتالنا، سآل مجرب وما تسأل حكيم. هالمثل اليوم صار بينضفلو. سآل مجرب ولا تسأل حكيم خاصة اذا كاين صرلو محبوس من 11 سنة. وكلنا طالبنا انو يفرج عنه. انا شخصياً طالبت بال97 على تلفزيون ولا الو هلق، بيقولو اسمو ال LBC، ببرنامج معروف، بإنو مش مفهوم ليش محبوس هالشخص وحده. بس يعني اليوم لازم ينترك له وقت تيرجع يصير مجرب وشوية وقت اطول ليصير عن جديد حكيم. هيدا طبعاً بسبب اللي قضاه بهال 11 سنة. يا ريت بيعطي حاله هالوقت، شوية وقت لنعرف بس يحكي شو بدنا نجاوبه. (موسيقى).
ما بدنا نرجع نبلش من الاول (موسيقى).
رابعاً: التحيّتين.
تحية وبعد. عفواً عن جديد، تحيتين وبعد.
تحية للنائب الجنرال عون وللأمين العام السيد حسن نصرالله. ليه؟ لأنو بنصر الله وعونه، النصر لنا.
الإمضاء: شيوعي فردي، بيعتقد ما عدا منير جنبلاط بركات، انو كل الشيوعيين الرسميين، مع ما ورد هلق (موسيقى) مل يسارك، تأهب، استرح. لأ. قف. واستعد لكل الاحتمالات.