أخونا المواطن قليل الأدب
عديم الربايه
وعنده مطالب سخيفة وعجب
ومـلهاش نهاية
وهايج على الدولة من غير سبب
وعامل حكاية ..
فاكر سيادته إنه عايش فـ طوكيو !!
مكفَّر سمايا ..
وقاعد ينظَّر فـ أحزاب معارضه
وحركة كفايه ..
وقال إيه .. بيرفض !
ووجعاه كرامته ..!!
وحاير بهامته
وقولة قفايا !!.

أخونا المواطن
حٌثاله إبن كلب ..!
مواطن خسيس
مسطول ليلاتي ..
فلاتي ومدب
مهوَّاش حسيس !!
تصوَّر ..!!
تصوَّر بيطلب
يكون فيه قانون !!!
ما يعتقش حد !
يحاسب حكومته
ويرفع طعون !!
وشرطه بجد .. !!
وكل إللي ينهب
يروح السجون !!
يا باي عـ الحسد !!
أخونا المواطن خلاص إتلحس
عيَّان فـ مُخه ..
أكيد إنتكس
وعايز وظيفة
ولقمه نضيفة
وعايز ماهية
ومكسب حلال ..
من غير مايسرق
ولا يرتشي
تكفِّي العيال ..
شبانه ومنال
ده غير أمهم !!
وعايز حكومة تشيل همهم !!
وعايز مدارس وفيها فصول
توسع مدارك ..
تنوَّر عقول
وعايز حاجات
ومستشفيات
وشقه لوحده بحمام خصوصي !!!
بصاله وفرانده وأودة ضيوف ..
وف العيد خروف !!
ويدي عياله البرايز عيديه ..
ويلغي الوسايط والمحسوبيِّه
وإعلان حضاري يصون الحقوق
ودولة تعامل جنابه بذوق !!
وناس تسمعه ..
وناس تدفعه
وناس لأجل بٌـكره ..
تقوم تجمعه
وناس بالمحبة ..
تشيل ترفعه !!
مواطن بلدنا فهم وإنسرع
عماه الطمع ..
حقيقي بهيم ..
ما يعرفش معنى مواطن يتيم
بكل بجاحة بيطلب نزاهة
بيطلب صراحة
أخونا المواطن
شديد الوقاحة
مواطن مٌدلل
طموحه خطر ..
كويتي سعادته .. !!
عديم النظر
وفاكر حكومته حكومة قطر !!
مواطن غتت ودمه تقيل
حُـثالة وعويل
تصوَّر ..
تصوَّر يحط حرامي غسيل
وشحات وحافي
وملعون صحافي
ونشَّـال حقير ..
مع البيه الوزير ..
في زنزانة زحمة ؟!
أخونا المواطن
معندهش رحمة .. !!
ولو تسمحولي ..
مواطن بلدنا
حقود إبن ( أ ح ؟ ه)..!