ينصر دينك يا بطل

ينصر دينك يا بطل
قتلت ناس عُزًّل كتير
ستات ، شيوخ وكمان عيال
ازحت عنا خطر كبير

دي ناس بتقول الله محبة
والمحبة دي شئ خطير
إقتل بطرس وإقتل مينا
اللي إخواتهم ماتوا في سينا
واللي ولادهم رقصوا فـي فرحك
واللي ميّتم بيعزّينا

إقتل ماري وطنط تريزا
دول ناس مافيهومشي ولا ميزة
دايمًا كده يبتسموا في وشك
ويقولوا اهلاً خطوه عزيزة

وإقتل برضه عمّك حنا
في اي خناقه بيحوش عنّا
غاوي يصّلح بين الناس
ولا يمكن يوّرد على جنّة

وإقتل سامي ناجي نجيب
اصل الإسم صراحه مريب
يمكن يطلع واحد منهم
او داقق على إيده صليب

ولا اقولّك ... إضرب شبرا
والكيت كات وميدان الاوبرا
فجّر واحدة في كل مكان
خلّي جيرانهم يصبحوا عبرا

لينا رب إسمه الكريم
ها يجي يوم تعرض عليه
تقف امامه ويسأل: الشخص ده عملك إيه؟
بأي ذنب تقتله؟
وفين ومين وإزاي وليه؟
إبقى قول لي يا بطل!
ها ترد يومها ... وتقول إيه؟


احمد فؤاد نجم