+- نادي الفكر العربي (http://www.nadyelfikr.com)
+-- المنتدى: الســـــــــاحات الاختصاصيـــــة (http://www.nadyelfikr.com/forumdisplay.php?fid=5)
+--- المنتدى: أقــلام ســاخـرة (http://www.nadyelfikr.com/forumdisplay.php?fid=82)
+--- الموضوع: تضرب شو كريك (/showthread.php?tid=43065)
تضرب شو كريك - بسام الخوري - 04-30-2011
https://www.facebook.com/notes.php?id=253989512240
لاءات في حارة العوران
von تضرب شو كريك, Samstag, 30. April 2011 um 20:25
شوما عمتشوف شو عميصير، ليش ما عمتحكي ، شو خايف؟ هيك نهرني بعض الاصدقاء عالصفحة. والحق يقال اني خايف ، لا بل مرعوب ومخريط، وازا بتمشي بشوارع البلد شبه الفاضية بتلاحظ انو هادا انطباع شبه عام ممزوج مع حالة من الغضب ورشة من الفوتان بالحيط عند الشارع السوري، أنا مالي محلل سياسي بس الله من عليي بالولادة بهالمنطقة الرائعة من العالم يللي غايصة بالللل طين من عشرات السنين، يعني بتابع الاخبار من وقت ماكان عمري خمس سنين اكتر من افلام الكرتون متلي متل باقي المواطنين يللي بيفطرو وبيتغدو وبيتعشو سياسة،
انا ما بدي احكي عن السلطة والمتظاهرين لانو اكيد ما رح غير شي كونو هنه عميعملو الوقائع عالارض وانا بس عماتفرج، انا بدي احكي عن الاصطفاف بين الناس نفسها يللي عميعبر عن حالو بخناقات ما بتخلص وكل مرة بفوت عالفيسبوك بشوف اطنان من الغباء السياسي والاجتماعي :المتظاهرين متآمرين، وبدهن يخربو البلد ، طيب مدلي رقبتك شوي لورا وشوف وضع البلد قبل الاحداث ، المحروقات حرقت الناس، والضرايب هرت نعمتهن، واتزكرلي كيف كان مجند ما بيعرف يفك الخط يضرب طلاب الجامعات بالقشاط واحيانا كفوف ويسبها عباب شعبة التجنيد مشان يصفو بالدور ويجي ابن ابو يامن ينط من فوق كل الناس، واتزكر الرشاوي والبطالة والفقر بيبين معك انو الامور مو بحاجة لمؤامرة
وبيكفي شرارة متل الاحداث يللي صارت بمصر تشعل المظاهرات. طبعا هالشي ما بيلغي انو في كتير اطراف عمتحاول تستغل الازمة للضغط على سوريا بالموضوع الخارجي.الجزيرة: يعني هالقناة لحالها صارت اساس كل البلاوي بالبلد، وكل الناس مستلمة قناة الجزيرة ونسيانة الاموات من المعارضين ورجال الجيش والامن، لك يا اخي الجزيرة حقيرة وكزابة وبتنلق بالصرامي بس هية حالة طارئة عالمشكلة مو اساس المشكلة، هادا ازا تجاهلنا انو مو مسموح الها ولا لغيرها بتصوير شي. وبرأيي المتواضع ما عمتسيء للنظام اد قنوات فلينستون
تبع الامطار تغزو سوريا.الجبناء: بعض الاخوة المعارضين يللي عميطالبو بالديمقراطية نازلين سفئ بالناس القاعدة ببيوتها وعميوصفوهن بالجبن وببعض الاحيان نقصان الوطنية، والقصة قطعت من كونها شخصية لتصير مناطقية بغيضة، بيعير فيها اهل المناطق يللي طلعت اهل المناطق الهادئة، طيب ازا انتة اول مطالبك الديمقراطية شو رأيك تحترم رأي هالناس القاعدة يللي ما بدها تغير النظام.
الحق على مين: ازا بقعد للصبح عمقول الحق على مين ماحدا رح يقتنع، واكيد بعد كل هالحكي رح تجي عشرات التعليقات من كل طرف باتهام الطرف التاني والقاء اللوم عليه. بس القصة قطعت من الحق على مين لوين رايحين،
يعني بالعراق ماحدا بيتزكر على مين الحق بس كل الناس بتتزكر مشاهد الدم والتفجيرات و بلبنان ما حدا بيتزكر بوسطة عين الرمانة قد ما بيتزكر 15 سنة من الحرب والتدمير .. عرفت يا رفيقي ليش انا خايف، عرفت ليش شعبك معظمو خايف.عوران: البلد صايرة متل حارة العوران يللي كل واحد فيها بيطلع بالتاني وبيشوف عينو المسكرة، وبيقللو هيهييييي ، انتة يا حبيبي مو شايف شي، روح الله يعينك، وببعض الاحيان الله ياخدك. وازا ضلو العوران عميخبطو بعض، المفتحين رح يضطرو قريبا انو يقلعو عين من عيونهن او رح يروحو بالدوكة. وبعد فترة رح يصيرو كلهن عميان
لاءات: بالآخر متل ماقلت بالاول هادا الحكي كلو مابيعمل شي عالارض ومستحي كتير احكيه لانو تافه قدام الدماء يللي عمتنزف، بس اضعف الايمان نكون نحنا القاعدين شو ماكان موقفنا متفقين على 3 شغلات:
لا للتخوين، لا للطائفية، لا للتدخل الاجنبي .
وانشالله كون اجدب
ومخاوفي كلها بلا طعمة وتمرق هالازمة واعفيكن من هالمحاضرات المعتة، ويستر عرضكن لا تتناتفو عالحيط متل الديوك
رسالة في قارورة ( يعني قنينة) !
von تضرب شو كريك, Samstag, 26. März 2011 um 04:14
هي يا شباب مو موعظة ولا خطبة، ولا دليل مستخدم ولا كتالوغ وطن، وما بدي غير رأي حدا لانو كل واحد عندو رأي متمسك فيه بحكم تياسة العقل البشري التاريخية والمتجلية في أطنان التحذيرات على بواكيت الدخان ووجود مليارات المدخنين. هي ببساطة فشة خلق، لا بدي صلح من وراها البلد، ولا بدي احفر اسمي بحروف من ذهب، ببساطة بدي فرغ شوية طاقة.وحس بشوية راحة ضمير. اذا كنت من القلة يللي بتحب تقرا بوطننا العربي الجميل كملها، واذا كان مخك بيدخن وبتنفث البخار من ادانك لما تشوف كتير حروف مصفوفة فلك ان تنعتها بالعلاك المصدي وتتركها.
أنا حزين للغاية، ومبسوط للغاية،خايف ومتفائل. زعلان عالدم يللي عمينسفح عالطرقات، مقهور من المحتفلين بالشوارع والناس عمتموت بالصنمين، مطموز من ولاد المسؤولين يللي عميطلعو يسكرو شوارع البلد بسياراتهم الفارهة بدون ادنى احساس بانو هالحركات جزء كبير من المشكلة، ممغوص من الاعلام السوري يللي لساتو بالعصر الحجري، ومن اعلام الجزيرة والعربية يللي مسمي حالو حر وكلنا منعرف وين مربوط، ومن اعلام الفيسبووك يللي بيحط شي صار وشي ماصار واحيانا شي اسخف من التصديق. وبيهلل لظهور القرضاوي ذو الخطاب الطائفي البشع . زعلان من المؤيدين يللي مقتنعين انو المتظاهرين كلهم خونة ومدسوسين، ومن المعارضين يللي مقتنعين انو كل شي مؤيد هوه خايف او جبان، من قسم المعارضين يللي الو انتماءات عائلية وابعاد اقليمية، ومن قسم الموالين يللي الو منافع ومكتسبات. خايف على 18 طائفة واعراق مختلفة بتشكل وقود لتسيير اعظم مركبة او وقود لاحراق اكبر بلد. خايف من بعبع اسمو اسرائيل، كل الناس بتعرفو منيح وزعلان من يللي بيحاولو يقزموه من المعارضين ويللي بيحولوه لاصل كل المشاكل من الموالين. وبنفس الوقت فرحان كتير، فرحان لانو لاول مرة بينحكى عن قانون الطوارئ ولو كانت دراسة، فرحان لانو الناس عمتطلع تعبر عن المها وتعبها، فرحان لاني اول مرة بتناقش مع اهلي بالسياسة وكل واحد منا برأي ومؤمن بمخاوف التاني وبآمالو. فرحان لانو الله لما خلق البشرية خلق لكم من انفسكم ازواجاً ، وهلق صار عندكم من مواطنيكم ازواجاً ، مع وضد.
وبالآخر انا متفائل انو هالزواج بين طرفي الشعب رح يولد وطن اكثر صحة وعافية وليس طلاقاً ابدياً .
ملاحظة : صرلي ساعة متردد بنشر هذه الرسالة لاني بعرف مقدار القفلة المخزون عند حضراتكن وانو رح استقبل اطنان من التعليقات الساخرة من نمرة: الكريك السياسي .. يا زلمة شو هالرومانسية، حسيتك كاساندرا . بس يللا .. لنبق هالبحصة