+- نادي الفكر العربي (http://www.nadyelfikr.com)
+-- المنتدى: الســــــــاحات العامـــــــة (http://www.nadyelfikr.com/forumdisplay.php?fid=3)
+--- المنتدى: فكـــر حــــر (http://www.nadyelfikr.com/forumdisplay.php?fid=57)
+--- الموضوع: عن زيف شائعة إفلاس مصر (/showthread.php?tid=45337)
عن زيف شائعة إفلاس مصر - fares - 10-06-2011
يعني ايه إفلاس الدولة ؟؟ و يا ترى ده حصل قبل كدة ؟؟ و ازاي ممكن يحصل في مصر ؟؟؟ إيه هو إفلاس الدولة اصلا و بيحصل ازاي ؟؟
أولا الدولة و بكل بساطة لها موارد و عليها مصاريف و قد يحدث عجز و هذا وارد و حتى في أكثر الدول إنتاجا و عملا و لكن متى يحدث الإفلاس ؟؟؟ و ما أثره على المواطنين ؟؟
نتيجة تراكم عجوزات الميزانية العامة للدولة قد يصبح تراكم العجز كبيرا للدرجة التي يتجاوز فيها إجمالي الإيرادات المتوقعة للسنة المالية و هنا نكون قد عبرنا خط الإنذار الأول لأننا في السنة القادمة سنظل نتجاوز هذا الخط و كأننا نحرث البحر و لكن الخطر الحقيقي الذي يؤدي بالدولة إلى إشهار الإفلاس هو أن يكون إجمالي المبالغ واجبة الاستحقاق و السداد عن العجوزات المتراكمة و الإلتزامات السابقة فقط - خلال السنة المالية يفوق الإيرادات المتوقعة هنا تشهر الدولة إفلاسها
طيب عشان نبسط الموضوع هناخد مثال بسيط
لتكن هناك دولة ما و لنسميها بالدولة س
هذه الدولة بدأت منذ عام 1991 بتحقيق عجز بالموازنة العامة يبلغ 100 مليون وحدة نقدية في حين بلغت ايراداتها 900 مليون وحدة و بلغت مصاريفها 1000 مليون وحدة و من هنا نشأ العجز و من أجل سد العجز فإن الدولة تلجأ إلى طريقة من اثنين إما الإقتراض بفائدة عن طريق الاقتراض المباشر او أذون الخزانة الحكومية و إما منح موارد طبيعية او امتيازات تنقيب عن الثروات بأسعار بخسة
او تلجا لفرض الضريبة و لكن بيستبعد هذا الجراء لما له من مخاطر اجتماعية تتمثل في احتمالية التعجيل بنشوب انقلاب او ثورة
المهم نرجع للدولة س هي لما اخدت قرض بال 100 مليون وحدة عشان تسد عجز الموازنة فهي هترد القرض ده مثلا 110 مليون وحدة و هي هنا بتراهن على تقليص العجز في السنة المقبلة لكن العجز مش هيقل لان الدولة هتخفض التوظيف و تجفف بنفسها منابع ايراداتها في اطار التقشف و ده بينتج عنه زيادة العجز فمثلا الموازنة في سنة 1991 هتكون مصاريفها 950 مليون وحدة و ده كويس لاننا خفضنا المصاريف خليناها 950 و لكن ايضا الايرادات هتقل وهتصبح 850 هتقول طب و فين المشكلة ماهو العجز ثبت هاقولك لا طبعا في مشكلتين اولا مشكلة حسابية و ثانيا مشكلة اجتماعية المشكلة الحسابية ان نسبة العجز زادت فبقسمة 100 اللي هي مقدار العجز على 850 اللي هو مقدار الايرادات تحصل على نسبة عجز تمثل 11.76% من ايرادات الدولة فيما نفس مقدار العجز عند مستوى ايرادات 900 مليون يمثل نسبة عجز 11.11% فقط من اجمالي ايرادات موازنة الدولة الى جانب الخسارة الاجتماعية المتمثلة في توقف فتح فرص عمل برغم زيادة عدد السكان و زيادة المسموح لهم بدخول سن العمل نظرا لبلوغهم السن القانونية التي تسمح لهم بالعمل و ده بيؤدي لزيادة البطالة و التضخم لكن دي سكة معقدة سيبنا منها و خلينا في سكة الايرادات و المصروفات دي نسبة العجز و مقدار العجز 100 مليون الى جانب قسط القرض بتاع السنة اللي فاتت اللي هيكون مثلا 10 مليون لكنه هيستبعد من المصاريف لان في عجز و يرحل الى السنة القادمة و غالبا سيتم ترحيله لحين اجل استحقاقه مع زيادة الفائدة و حين يحين اجله يمدد عقد القرض بفائدة متزايدة و هكذا دواليك
اما العجز في الموازنة فيظل متراكما يعني اول سنة حققت 100 مليون تاني سنة 100 مليون تالت سنة هيزيد يبقا 105 مثلا و هكذا لو بصينا على مدار 10 سنوات مع افتراض ثبات مقدار عجز الموازنة عند حد ال 100 مليون و ايضا ثبات الايرادات و المصروفات و عدد السكان - حالة وردية تماما - فانه في خلال 10 سنوات ستحقق الدولة عجزا يوازي ايراداتها المنتظرة يعني ايه ؟؟ يعني في 10 سنين سيبلغ العجز 1000 مليون وحدة نقد و هو ما يكافئ ايرادات الدولة هنا يبدأ دق ناقوس الخطر لان السنة القادمة سيبلغ العجز 1100 لإإن لم تبلغ الايرادات هذا المبلغ فاننا بصدد افلاس الدولة في السنين المقبلة اذا أن في نقطة ما سيصل حجم المستحق المدفوع على الدولة لسداد التزاماتها السابقة و اللاحقة اكثر من ايراداتها و عندها تفلس الدولة تماما
نشرحها ببساطة دلوقتي انت عندك عجز متراكم 1000 مليون و ايراد = 1000 مليون يعني نفس المقدار و عليك التزام بسداد العجز ده ليكن مثلا 100 مليون سنويا فانت كدة بتعيد الكرة من الاول تاني و لكن المرة دي عليك 900 مليون و انت بتبدأو هتبتدي تقترض تاني و تعيد نفس الكرة الى مالا نهاية لكن نقطة الحرج الحقيقية هي انك تقترض لسد العجز و تيجي في سنة مالية تلاقي ان مخصصات السداد للقروض تخطت الايرادات المتوقعة و عندها تفلس الدولة تماما و يحدث شلل لحركتها المالية لان هيبقا عندها التزامات و مصاريف - بخلاف القروض- لكنها ليس لديها إيرادات لتغطيتها و هذه الالتزامات و المصاريف حالية وواجبة السداد ولا تحتمل التأخير - اجور مرتبات خدمات و مرافق و خلافه - اي ان الدولة تقف موقف العاجز و هنا يحدث اشهار الافلاس و الإنهيار المالي للدولة
تعالى بقا نطبق اللي فات على مصر
بادئ ذي بدء بالصلاة على النبي كدة مصر فيها ايرادات كتيرة مابتخشش موازنة الدولة و محدش يعرف عنها حاجة و على رأسها الصناديق الخاصة و الله أعلم ببعض مناجم و موارد التعدين في البلد اللي مبنسمعش عنها ولا بنعرف ايرادها بيروح فين
السؤال دلوقتي لك انت يا خايف من افلاس الدولة
لو احنا عصابة عندنا 100 دكان ايجار في ارض مساحتها تشيل 10000 دكان
و احنا قلنا للضرايب ان عندنا بس 20 دكان و مكتمين على 80 و بنخبي ايرادهم من الضرايب و جت حصلت مصيبة هتؤدي لاغلاق الدكاكين ال "20" و افلاسهم و اغلاقهم و بالتالي سحب سيطرتنا على ال 100 و على ال 10000 المحتملين فكرك اول تصرف لينا كعصابة هيكون ايه ؟؟؟
ببساطة هنعلن عن ملكية دكانين تلاتة او حتى عشرة و يمكن عشرين من اللي عندنا و ندخلهم كايرادات عشان نحافظ على باقي سبوبة ال 10000
ده ببساطة اللي بيحصل في مصر
كل ما تقترب الدولة من نقطة الافلاس النهائية هتلاقي مصدر ايراد مكنش مدرج قبل كدة يخش موازنة الدولة من مصادر الايرادات السرية اللي منعرفش عنها حاجة و ده من اجل الحفاظ على هذه الدولة اللي بتحقق مصالح معينة و اياضا ابقائها في وضع مثقل بالديون عشان لو العملية باظت خالص المواطنين يتحملوا النتائج بدون اي التزام على المنتفعين القدمى
طيب الاثر على المواطنين هيكون ايه
اولا اكبر فئة مضارين هم العاملين في القطاع الحكومي باشكاله المختلفة قطاع عام و اعمال و استثماري و العاملون بالدولة
لان دول لهم مرتبات و اجور لن تصرف في هذه الحالة و الدولة تتفادى الوصول لهذه النقطة بتصفية العمالة رويدا رويدا
ثانيا سوق العمل نفسه هيتاثر لان هيحصل تضخم رهيب و بالتالي هيزيد المعروض من عنصر العمل و تقل الاجور
ثالثا تسهيلات ضريبةي مفتوحة لكبار المستثمرين مع زيادة فرض الضرايب و الاتاوات - طوابع الدمغة و الخدمات - على عموم المواطنين
رابعا عدم السيطرة على الاسعار و ازدياد التضخم
خامسا اللي جرى على الدولة هيجرى عالمواطنين يعني هيوصلوا لنقطة يشهروا افلاسهم فيها لكن الدولة مكتمة على موارد و اعلنت عن 1 او 2 منها لستر موقفها المواطن عنده ايه ؟؟؟ ماهو لو عنده مش هيختار انه يجوع مثلا
المحصلة النهائية المواطنين هيكونوا فقراء للغاية و مفلسين و الدولة هترهبهم باشاعة الافلاس و تحميلهم الديون بالاقتسام عليهمو ده طبعا هيخلي ضهرهم للحيطة طول الوقت يعني نار تحت الرماد
و ممكن حضرتك تقارن البنود من اولا و حتى خامسا باللي بيحصل من دولة و حكومات مصر تجاه شعب مصر من بداية سنة 1997 المالية و حتى تاريخه
و يا ريت بقا تفوق من وهم و فزاعة افلاس الدولة لان من الآخر و من النهاية العصابة المتحكمة في شئون البلد على استعداد ان تضحي بما يوازي القيمة السوقية لايرادات البلد حتى من اجل الحفاظ على الدولة بهذا الوضع من اجل التكويش على الموارد الاخرى من الاخر مستحيل عمليا مصر تفلس يا سادة يا محترمين
http://alkomi.blogspot.com/2011/10/blog-post.html
ايه رايكم في الكلام ده ؟
الرد على: عن زيف شائعة إفلاس مصر - K a M a L - 10-06-2011
أنت عيان ؟
أيه الخرا اللي أنت كاتبه ده؟
RE: الرد على: عن زيف شائعة إفلاس مصر - fares - 10-06-2011
(10-06-2011, 10:06 AM)K a M a L كتب: أنت عيان ؟
أيه الخرا اللي أنت كاتبه ده؟
كلك ذوق يا كمال باشا
الخرى ده موش أنا اللي كاتبه
أنا قريته في مدونه و الرابط بتاعها أسفل المقال
أنا بسأل إيه رأيكم في الكلام ده حتى لو كان خرى ممكن تقولي هو خرى ليه ؟
الرد على: عن زيف شائعة إفلاس مصر - الحوت الأبيض - 10-06-2011
قلنا لكم ألف مرة تكتب خرا (من الكلمة الفصحى خراء).
الرد على: عن زيف شائعة إفلاس مصر - بهاء - 10-06-2011
كاتب المقالة بيفكرنى بحملة جورج بابا أندريو فى اليونان قبل ترشحه للرئاسة 2010 وكانت فى وقتها حكومة اليمين بتقول ان البلد مفيهش فلوس وتقترب من حافة الأفلاس , ألا ان اليسارى بابا أندريو معتمداً على نغمة الأطاحة بالفساد وتوفير الأموال رفع شعار الحملة " الفلوس موجودة ". وبعد ما بسلامته وصل لمنصب الرئاسة , هو اللى أعلن بنفسه ان اليونان هتفلس - لو محدش لحقهم بقرض خارجى .... وبقية القصة معروفة ومعاناة تعيشها اليونان حاليا وتهدد الاتحاد الأوروبى كله ويمكن الأسواق العالمية !
كلها كام يوم وتبدأ تسمع اخبار عن أختفاء أموال طائلة بالمليارات من الموازنة ومحدش يعرف الفلوس دى راحت فين , وكأن مشهد اليونان يعيد تكرار نفسه وخطيئة بطرس غالى وزير المالية - اللى تلاعب فى الموازنة وكان بيضع مبالغ طائلة وهمية فى الموازنة حتى لا يظهر العجز الحقيقى . ولما ده هيحصل , هتخرج المظاهرات فى الشوارع تتطالب بعودة الأموال المنهوبة والمسروقة والملطوشة ومحدش هيصدق ان الفلوس دى كانت مجرد حبر على ورق وتلاعب محاسبات وانها لم تكن ولن تكون فى يوم من الأيام.
ده أحنا ماشيين على سيناريو اليونان بالحرف
RE: عن زيف شائعة إفلاس مصر - هاله - 10-07-2011
هناك نقطتان مهمتان:
الحسبة اللي وردت كمثال ليست دقيقة لأنها لم تحسب قيمة الفوائد على القروض. نسيتها و لم تضفها الى قيمة العجز الاجمالية. يعني نتيجة تلك الحسبة مفروض أن تكون أسوأ!
و بالمناسبة كل التفاصيل و المترتبات الاجتماعية على العجز نراها تتجسد في حالة اليونان .. و البقية تتبع .. و الاضطرابات الاجتماعية و القمع بدأت already في أوربا و أمريكا و القادم أنكى.
النقطة الثانية
حسابيا و بالأرقام لا علم لي و لا لغيري ربما بقيمة "المنهوب المخفي" في مصر. لكن منطقيا نجد أنه في دول الاستبداد المقترن بالفساد على الأرجح أن يكون كلام الكاتب صحيحا. فالفساد كغول انطلق مع الانفتاح و احسبوا كم سنة ورا سنة.
و على راي احمد فؤاد نجم و عزة بلبع:
البقرة حلوب .. تحلب قنطار
لكن مسلوب .. من أهل الدار
و ليس الحال بأفضل في بقية ربوع قمعستان و فسادستان التي قامت فيها الثورات و في غيرها أيضا.
الرد على: عن زيف شائعة إفلاس مصر - بهاء - 10-07-2011
لو هنعتمد على كون هناك أموال منهوبة من عمو نجم وان البقرة بخير وانها حلوب , وأكتشفنا انها لا حلوب ولا نيلة - لو عصرنا رقبته مش هتنزل خمسة ساغ ! هالة , الشعب المصرى بطبيعته عنده أحساس بأن هناك مؤامرة عليه وان كل الناس حرامية وان البلد مسروقة ومنهوبة وان لما يجيى الرجل البركة محدش هيسرق حاجة ...
اللى يمشى وراء المصريين , يروح فى داهية
RE: عن زيف شائعة إفلاس مصر - هاله - 10-08-2011
اقتباس:الشعب المصرى بطبيعته عنده أحساس بأن هناك مؤامرة عليه وان كل الناس حرامية وان البلد مسروقة ومنهوبة (...)
اللى يمشى وراء المصريين , يروح فى داهية
طيب انا فلسطينية و رايي من راي المصريين دول
بالتأكيد هناك مؤامرة و تآمر متواصل من حكومات الندامة ضد شعوبهم و الا لما قامت معارضات و لا ثورات و لا يمين و لا يسار و لا مندسين و منحبكجية
و لا ولا ولا ولا لأنها مصالح متناقضة بتدفع حفنة قوية انها تتآمر على كثرة أضعف حتى تعرف تبتلعها و تشحتها الملح.
تآمر يبدأ من الاقتصاد و يمر بكل بنى المجتمع مارا بالتعليم و الصحة و الدين و القانون و الفن وووو .مبيعتقش. و بيستمر في مسلسل التآمر ما وسعه الاستمرار الى أن تفقع مع الشعب و يوقفه بثورة.
اقتباس:وأكتشفنا انها لا حلوب ولا نيلة
هناك امكانات هائلة مهدروة في مصر. و امكانات كبيرة لم تستغل و أخرى أوقف استغلالها. ما يردد في الاعلام الرسمي و أبواقه منذ عقود ليس هو الحقيقة و الاعلام عمره ما كان محايد.
اقتباس:لو عصرنا رقبته مش هتنزل خمسة ساغ
و ليه لما عبد الناصر عصرها نزلت ذهبا؟
لأن فيه حكومات بتضع سياسات تنموية وطنية التوجه تصب في صالح البلد ككل و حكومات بتفتحها سداح مداح مستباح لعصابات "متآمرة" في الخارج تمتصها عن طريق عصابة "متآمرة" في الداخل. و بيقولوا لك تنمية و تنمية و تنمية و هو ما فيش الا تنمية الفقر في مصر و غير مصر. فالحال ينطبق حتى على أكبر دول الأوبك السعودية. الحكاية مش قلة موارد أبدا. بل ايدز في الضمير الوطني .. على افتراض وجوده .. و بعض الظن sin
و الصين هي الصين و ماليزيا هي ماليزيا و غيرهم .. فكيف تحسنت اقتصاداتهم لولا انه التخطيط الاقتصادي و توجهاته اتغيرت.
فيه مصطلح اقتصادي هو "الفائض الممكن" يعني غير "الفائض الفعلي" أو الواقع. و هو يعني تعبئة و استثمار الامكانيات و الموارد المتوفرة و غير المستغلة الى أقصى حد ممكن في عملية التنمية. و هذا اجراء تقدم عليه الدول التي تضع استراتيجيات معاكسة تماما لاستراتيجية الانفتاح التي ابتليت بها مصر منذ السبعينات. و لا أريد تحويل الموضوع الى سياسي و لكن تغيير التوجه الاقتصادي و السياسات التنموية قضية كبرى ممكن تسيل فيها دماء و تقوم حروب.
الرد على: عن زيف شائعة إفلاس مصر - طنطاوي - 10-13-2011
الكلام فيه عيب خطير وهو انه يعتمد علي نظرية المؤامرة في اساسه .
لا يا عزيزي ، سيناريو الإفلاس وارد وعلي العاقلين وضعه في حسبانهم .
الرد على: عن زيف شائعة إفلاس مصر - yasser_x - 10-17-2011
لما يتجاوز سقف الدين العام ترليون جنيه يبقي في مشكله كبيره فعلا ,,,
ولازم يعاد النظر في كذا حاجه بسرعه وكبدايه :
1 - شروط التعامل والاقتراض من صندوق النقد الدولي .
2 - المرتبات الحكوميه "بتاعت الربع والنص والمليون جنيه" .
3 - العمل علي اسقاط جزء من الدين الخارجي من بعض الدول .
4 - ايقاف الاقتراض من اجل مشاريع طويلة الاجل والاعتماد فقط علي جلب استثمارات خارجيه .