من يرجع ابو اسراء خابروني
شلش العراقي

دولة رئيس الوزراء سافرلتركيا وقضية خطف الجماعة ظلت معلقة بالداخلية ، ويكولون ( يقولون ) التحقيق جاري على قدم وساق ، وماكو واحد بالثورة ميندل ( لا يعرف ) وين تم حجز المساكين، بس الداخلية لايمكنها الدخول الى اعماق حافاة المياه (مسلس ياباني قديم عرض من تلفزيون بغداد نهاية السبعينات عن ثوار صينيين ضد الامبراطورية الصينية ) والتحقيق هناك ..عيني بولاني تريد ادليك (ادلّك ) على موقع الاعتقال ، لو خاف تعتقلني وياهم واني مابيه حيل ومتكسر وما اكدر اشيل روحي ..يالله كلهم ميطلعون تسعين واحد ، نمونة (كلمة تركية تقصد عينة وتستخدم باللهجة العراقية العامية عن شيء لا يستأهل ثمنه او مكانته او قيمته) ، فدوة للسيد قحط عراقيين ، اشو مزبلين ، حتى بمصر كاموا يبيعون فلافل على المصريين ، والله دنيا العراقي يبيع فلافل ،وين بمصر ، ذكرتوني بالمصريين من اجوا للعراق وجنا زغار ونروح للمطعم وناكل فلافل من المعلم ، نسيت اسمه ، بس يمكن اسمه حسنين ، لان نص المصريين بالعراق جان اسمهم حسنين والنص الباقي جانو دبلوم تجارة ..ايام زمان جان اذا مصري حط عينه على عراقية نكوم نرجف ونصاب بالحمى ومنام الليل ، جانت الناس تستحي وتخجل وتعتبر العرض واحد ، هسة وين صارالعرض ، عدنا مليون رجل دين وخطيب ومعمم ومعكَل بس الشرف راح ، راح بالرجلين ، والله نوبات اسمع سوالف يشيب منها شعر الطفل ، طفل مال كبل مو مال هسة ، هسة اطفالنا كاموا يحششون بفضل الجمهورية الاسلامية ،والله اكو طفلة يمكن عمره ثنعطش لو شوية اكبر ، بباب الشرجي (الباب الشرقي وسط بغداد ) اربع وعشرين ساعة محششة والالفاظ البذيئة متفارك ( لا تفارق) لسانها ،بس احلى شي بيها من تصيح عليها دكلك(تقول لك) عيني ديمقراطية ، عاشت الديمقراطية وعاشت التكنوقراطية وعاشت الشلشقراطية..شتريدون الديمقراطية واجتكم لباب البيت ، وكل واحد صار بكيفه ، وين ماكو جربوع ابن جربوع صار قائد سياسي ويطلع بالتلفزيون ويكول هاي مخالفة دستورية ، والله لو اسوي امتحان بالدستور ولا واحد من مجلس النواب ينجح حتى الكتبوا الدستور نسوه، اما الشعب فميعرف من الدستور غير الورقة الحطها بالصندوك حتى السيد ليشور بي ( اي لا يصيبه مكروه كون العامة بالعراق تعتقد ان رجل الدين وخصوصا" الشيعة عندما يغضبون من احد يصيبونه بمكروه !!!!!!! )، ابو اسراء كلي تركيا شلونها ؟ ابراهيم طاطلس شلونه ؟ بعده مريض لو صار زين ،اذا شفته بشرفك سلملي عليه ، كله شلش يكول صاحبته الحلوة وين صارت خو ما تحجبت وصارت مديرة مدرسة بدر الكبرى وكامت تحلف بشرفها ، ست نورية مو عليج هذا الكلام بشرفي ، لان انت اشرف وحده شفتها بحياتي خاصة من تحجبتي وجبرتي ( اجبرتي) الطالبات يتحجبن صدك كبرتي بنظري ، ولو انت جبيرة بنظري من زمان ، من زمان ست نورية ، الله يرحم ايام زمان ، جان بطل البيرة بربع دينار والناس تكرع ( تشرب)،هسة بطل العرق بالفين دينار والناس هم تكرع ،اسماعيل ابن الحجي يكول لويصير البطل بمليون هم اكرع ، ها ست نورية تذكرتي اسماعيل ابن الحجي، والله اسماعيل اكبر شريف شفته بحياتي ، ولو لحد الان ما تحجب ، بس بعده جبير بنظري لان كل متكله عمي لتشرب يومية يكوم يضحك ويكول اني انتخبت مثال الالوسي لان مثلي يلط (تعبير شعبي عن شرابة الخمر )ابيض ...شوكت يرجع المالكي حتى نحجي جديات ، بالله من يجي خابروني بشرفكم

خابروه يابا خابروه.
عيني خابروه حين يوصال أبو اسراء.

اقتباس:، وين ماكو جربوع ابن جربوع صار قائد سياسي ويطلع بالتلفزيون ويكول هاي مخالفة دستورية ، والله لو اسوي امتحان بالدستور ولا واحد من مجلس النواب ينجح حتى الكتبوا الدستور نسوه، اما الشعب فميعرف من الدستور غير الورقة الحطها بالصندوك حتى السيد ليشور بي ( اي لا يصيبه مكروه كون العامة بالعراق تعتقد ان رجل الدين وخصوصا" الشيعة عندما يغضبون من احد يصيبونه بمكروه !!!!!!! )،

ولادة اي قائد الان في العراق الجديد عملية سهلة واسهل منها ماكو *

يكفي ان يباركه السيد ( طبعا السيد هو وكيل للسيستاني ) ويقول السيد السيستاني باركه .. وستهرول الجموع المغيبة للاحتفاء بهذا القائد الجديد

الشعب لايعرف من انتخب
الشعب لايعرف مايحويه الدستور
ومع هذا شارك بالانتخابات وشارك بالاستفتاء على الدستور ويطلع لك كل جربوع يقول الشعب انتخبني وانا لن اتنحى كما حصل مع الجعفري


الشعب لايعرف سوى ان السيد قال يجب ان تنتخبوا قائمة 555
واخرجوا بيها فتوى عن مزايا هذا الرقم السحري ومن اجل سحر هذا الرقم والخزعبلات التي يضمها هذا الرقم في طياته وباسم السيد وضع الامّيون ورقة الانتخاب بالصندوق

والسيد قال صوتوا على الدستور فصوتوا ولطموا همين *

على ذكر أعتقاد العامة الراسخ عن كون رجل الدين عندما يغضب من احد يشوّر فيه ( او يصيبه مكروه ) فالكثير منهم يكفر بالله ولايخاف يقول انه لايشور مثل رجل الدين والخوف كل الخوف من رجل الدين .. ففي مثل هذا المجتمع يريدون تطبيق ديمقراطية , اي ديمقراطية حديثة ؟؟


* ماكو يعني لايوجد
* همين يعني ايضا

اقتباس:  طيف   كتب  
ولادة اي قائد الان في العراق الجديد عملية سهلة واسهل منها ماكو *

يكفي ان يباركه السيد ( طبعا السيد هو وكيل للسيستاني ) ويقول السيد السيستاني باركه  .. وستهرول الجموع المغيبة للاحتفاء بهذا القائد الجديد .

ليس بالضرورة ان يباركه السيستاني فالسادة اصبحوا اكثر من الشعب فلكل مواطن يوجد ثلاثة سادة .
هذا يذكرني بكثرة الضباط ايام صدام فلكل جندي كان هناك ثلاث ضباط ؟

اقتباس:  طيف   كتب  
الشعب لايعرف سوى ان السيد قال يجب ان تنتخبوا قائمة 555
واخرجوا بيها فتوى عن مزايا هذا الرقم السحري ومن اجل  سحر هذا الرقم والخزعبلات التي يضمها هذا الرقم في طياته وباسم السيد وضع الامّيون ورقة الانتخاب بالصندوق

فعلا" غريب اختيارهم لهذا الرقم وهم يعرفون نكات العراقيين حوله وارتباطه بالمرحوم سعدي الحلّي الاّ اذا كانوا الجماعة من مريدي سعدي الحلّي !!!!!!!!!