مرحبا بكم في مشروع العلم العراقي الشامل



في البداية يجب ان نحجي شوية عن اسباب التفكير في عمل مشروع للعلم العراقي الشامل

اول شي لان اكو ناس ضايجة من العلم العراقي الحالي و موغفين منه اشد توغيف , بحيث اذا شافوا العلم العراقي الحالي بالحلم راح يفزون من النوم ... ومن شدة خوفهم و خرعتهم من هذا العلم صدروا قرار لتنزيل العلم العراقي ..

طبعا اني مراح اجيب اسماء لان اخاف بس كلكم تعرفون منو هذولة الي مخروعين من العلم العراقي .. بس اني راح اسميهم اسم خاص من اختراعي .. اسم من بنات و اولاد افكاري , راح اسميه السيد جلعود الطرزاني , اسم حلو و مرتب و يجمع اسماء شخصيتين بأسم واحد ..

السيد جلعود الطرزاني المحترم يكوووووول .. والعهدة على الكايل , انه هذا علم الرجال الي بالسجن و مايشير الى مكونات العراق

اني كلتله والله عمي حقك , انت كل كلامك حجي , و من تتفلسف حيل تتكلف فعلا علم لا يمثل طوائف الشعب العراقي , لان قبل الشعب العراقي جان شعب واحد

من الشمال للجنوب , كلهم عراقيين و كلهم علمهم واحد ..

بس هسة طبعا صرنا امم و طوائف و علكت علكة للستار ... فلازم نسوي علم يمثل اطياف الشعب العراقي

سألته للسيد جلعود الطرزاني , يابة استاذ جلعود ترة انت قبل كم سنة اجيت على هذاك الرجال الي بالسجن و بست جتافه وكلتله عمو عمو الحكلنا ترة لاعب البرازيل كاكا هجم علينا واني راح انعلس ... فالرجال المسجون هسة دك على صدره وكله مو تدلل , وراح جيش هذاك الرجال وهو يرفع راية الله اكبر من اجل ان يحرر ارض جلعود الي راح ينعلس .. وفعلا تم تحرير ارض جلعود من جيش كاكا المحتل ..

وبعد ما دارت السنين و افترت الايام , وجوي الامريكان الحبابين الورود الكتاكيت الي يخبلون حتى يحررونا من ظلم هذاك الرجال , وانسجن هذاك الرجال و جوي كومة ناس مدري منين , لملوم حتى يحكمون العراق ويجيبولنا الديمقطاطية والشفافية

وشائت الاقدار ان يصير لاعب البرازيل كاكا حاكم علينا , ويصير جلعود رئيس على جماعته ..

وهسة الافندية كاعدين بقصور الرجال المسجون الي يموتون منه ومتنعمين ,

زين يا جلعود اذا انت هيجي تضوج من علمنا لويش اجيت توسلت بهذاك الرجال و لويش هسة كاعد بقصوره ؟؟

كالي السيد جلعود حجاية حلوة عجبتني , كالي عيني احنا ندور مصلحتنا اولا وبعدين موضوع تغيير العلم و فكرة الفدرالية و من بعدها الانفصال ترة هذي مو افكاري اني وحدي , وانما صديقي الكاوبوي و صديقي الي عايش بتل ابيب هو الي دينطيني الاوامر , اني رجال انفذ تعليمات ..

كلتله حقك عمي معذور ..

وره ما كملت السوالف وية جلعود و قنعني بضرورة تغيير العلم العراقي الحالي , وصارت عندي قناعة انه مو مهم الامان , وطز بالخدمات و تف على الكهرباء والماي وكلشي , المهم يتغير العلم ..

ترة شغلة بيها نظرة وجه ..

رجعت اني للبيت , صفنت بالسالفة شوية , مخمخت بيها

رحت كعدت بغرفتي وشعلت شمعة , اقشمر روحي على اساس اني احب الاجواء الرومانسية مو لان الكهرباء مطفية صارلها 4 ايام وبانزين للتايكر ماكو ..

المهم اجتني فكرة حلوة كلش

كلت احنا لويش دايخين بالعلم , ترة سهلة

هواية ناس عراقيين شرفاء و طنيين , شيعة وسنة و مسيحيين و تركمان واكراد وغيرهم, يحبون العلم العراقي الحالي الي كلنا نعرفه

وهذي صورته






ولان دخلوا ناس من وراء الحدود ولازمين مناصب جبيرة , اكبر من خشمي هذولة هم يريدون حصة بالعلم ومستحيل يكون علمنا الحالي هو نفس العلم الي انرفع بالفاو و ام الرصاص ,

وهمة بداخلهم يردون و يتمنون انه ينرفع علم دولتهم الاصلية على ارض العراق الي هوة هذا العلم





فاني فكرت انه اخلي علمنا يمثل العراقيين الاصلاء , و يمثل الناس الي جايين من خارج الحدود فلزكت العلمين وطلع عندي هالشي




شفت اشو هذا شكله فاول وهوسة , فسويت مزج للالوان الفوك و الجوة وصار عندي هالشكل الحلو الفيوكي




فرحت كلش كلش ... كلت واخيرا صار عندي علم يمثل العراقيين ومحد يضوج منه , رحت ركض على جلعود

اشو هذا ضاج و انعقج , كالي هذا شنو

كلتله العلم مالتنا الجديد , تصميمي , حلو يخبل مو ؟؟

كلي لا ما حلو , احنا حصتنا من العلم وييييييين ,

اني بصراحة انجر بوشي , وكمت ارجع باك فاير وافتر عندي الديلكو , كلتله يابة مو انت العلم مالتك دمجت الوانه , اشو هي الاعلام كلها بيها احمر و اسود و اخضر وهذا العلم يحمل مزيج الالوان ..

كالي لا لا .. ما يكفي , اريد شي مضبوط , اذا تريد حط صورتي بالعلم

كلتله لا يمعود يا صورتك , النوبة من وراك علمنا يصير ممسحة مال قنادر ... كلي ما اعرف اني هاي مشكلتك

اخذ العلم مالتي و اصفن و سويلي شي بيه خير

فاني شسوي .. مضطر , اخذت العلم مالته الي هوة هذا




رحت مخمخت بيها للسالفة , شفتها سهلة

كلت الالوان خبطناها , بقت بس الشمس نحطها وية النجوم وهاهية

اصلا يصير فد شي يخبل لان اني متأكد انه هذا العلم راح يخلينا نشوف النجوم بعز الضهر

واخيرا و بعد جهد جهيد , طلع عندي علم عراقي يجنن , يخبل

ما ادري شلون اوصفه , مشكل يا لوز على كوكتيل ما اتصور احد راح يتعرض عليه

علم يمثل العراقيين الاصلاء الشرفاء , الي همة الشيعة و السنة و المسحيين و التركمان و الاكراد و كل واحد يحب هذا العلم

ويمثل الناس الي جايين من ورة الحدود لان لازم الهم حصة بالعلم ..

ايضا يمثل جلعود و جماعته

وصار عندي هذا العلم



والف عافية عليكم العلم العراقي المشكل يا لوز .... واني بدوري اهدي ثمرة تعبي في تصميم هذا العلم الحلو الى كل واحد ضايج من علمنا الحالي ..

اني بالنسبة الي احب علمنا العراقي الحالي , لان فتحت عيني عالدنيا وهذا علمنا , و 25 سنة اني اخذ تحية لهذا العلم , من جنت بالروضة الى ان كملت الكلية و لبست عسكرية .. ياما وياما رفعته بأيام الخميس باحتفالية رفعة العلم .. وجنت بالروضة اغنيله علمي علمي زاهي المنظر , رفرف رفرف كلُ يحظر ... احب هذا العلم , الي رفعه المنتخب العراقي بكل مباراة .. مو بيدي احبه

بس بنفس الوقت ما اعتب على الي ما يحبوه ويريدون يغيروه ... لان كلنا نعرف انه ليس على المجنون حرج ..

بس يضل اسم العراق عالي وغصب عن الي يكروه

ويضل علم العراق عالي غصب عن شيب الي خلف الي يكروه

وشكرا



اخوكم
Agent007

نسيت ان اقول للأخوة الاعضاء من الذين تعصى على فهمهم احدى الكلمات انا حاضر للترجمة !!!!!!!!!!!!! والتوضيح.
ولو ان اتوقع ان يعصى فهم كلمات المقال بأكمله على اغلب الاعضاء الكرام

:lol2:

مجهود جميل ......

احسن حل !!
مازال خلصت كل المشاكل ولم يبقى الا العلم لكي يختلف عليه العراقيون .. (f)

ولكن من هذا الكاتب الجديد العميل رقم 7؟؟
كاتب اخر بعد شلش وجحا العراقيين

المقال كلششششششش حلو :D

هذا مقال كتبه واحد طائفي سني صدامي موتور .

اين ذهبت ارواح الابرياء التي تريقونها كل يوم الاسلام الصدامي السني الوهابي المتحجر!

سادية الدماء تقتلون الاطفال كل يوم وضحايا الابرياء!!

جفف دماء الضحايا الابرياء اولاً الذين اراقتهم طائفتك ودينك ثم تحدث عن العلم بعدها

اقتباس:  طنطاوي   كتب/كتبت  

مقال جميل والرد ادناه ساخر:

هذا مقال كتبه واحد طائفي سني صدامي موتور .

اين ذهبت ارواح الابرياء التي تريقونها كل يوم الاسلام الصدامي السني الوهابي المتحجر!

سادية الدماء تقتلون الاطفال كل يوم وضحايا الابرياء!!

جفف دماء الضحايا الابرياء اولاً  الذين اراقتهم طائفتك ودينك ثم تحدث عن العلم بعدها

كلامك الذي تقوله صحيح 100% واود ان اضيف اليه المثل الذي ينطبق عليهم مليون بالمية .

ضربني وبكى .... سبقني واشتكى .