مملكة دبس و طحينة !!!

يا عمي حتى الدبس و الطحينة صاروا بالنار.


قرار من مجلس الوزراء:
يمنع منعا باتا افتتاح المعامل و غيره من المصالح اللي بدر دخل عالشعب الا بالشروط التي تضعها بلدية كل مدينة على حدا.
خلى القطاع الخاص يشبرق.

طيب.
النقل العام و الخاص:
ممنوع تركب دراجة نارية.
ممنوع دخول البيك آب الى نص البلد.
ممنوع دخول سيارات المازوت الى مناطق معينة.
ممنوع تجديد محرك المازوت.
ممنوع تركب غاز.
ممنوع فان سياحي خاص.
ممنوع, ممنوع, ممنوع.....

طيب بدنا نركب حمير.
ممنوع: تشويه الوجه الحضاري للبلد.؟

طيب يعني لازم ننبعص بالمكرويااااات.

ألك شحاطتك أو سيارة سياحية. و بدك تدفع رفاهية عا كلا النوعين.

طيب.

فتح النقل العام للقطاع الخاص:
يسمح للقطاع الخاص بالعمل على خطوط النقل العام الذي كانت مستلمتو الدولة.

عطوهون كل باصات النقل الداخلي خلي القطاع الخاص يتحرك.
كانت الأجرة 2 صارت 5.
و فوقها: ممنوع عمل ميكروباصات الأفراد على الخط.
يعني قطاع خاص نوعين.... واحد قوي و مزبط حالو,, و التاني كشوا ** أمو.
مو مشكلة.... عجلة الاقتصاد عم تكبر كل يوم و الدخل عم بيزيد.

- كانت دار السكن معفية.
- يعني هالاء شو؟
- منحسبلك اذا كنت مستأجر شو كنت دفعت؟ و منحسبك وفرت هالمبلغ و مناخود ضريبتو.
- شو هالحكي؟ كنت مستأجر ببيتي؟
- نعم. ليش مستغرب؟
- لا ولا شي.

- معاليك ليش بدك تزيد المكوس؟ الشعب مبسوط و ماشي الحال...
- يا وزير: ما تناقش.
- بتأمر.

- شو الوضع هالاء؟
- يا معاليكون الناس تأففت.
- بس هيك..؟
- بس هيك.
- زيد المكوس كمان....
- يا مولانا؟
- زيدا.
- تأمروا.

- شو الأخبار؟
- الناس زادت بينا المشاحنات و الخصومات و عم تمشي بتقاتل دبان وجها.
- بس هيك؟
- بس هيك !!
- زيدا الضرائب كمان.
- بس يا سيدنا!!!
- و لو شو بتنق و بتحكي.
- طيب, طيب....

- شو عندك يا وزير؟
- و الله يا مولانا شفت العجب العجاب.
- هات لنشوف:
- الناس بها الحواري و الشوارع ما عندا شغل غير أنو ترقص و تدبك و تغني. و عم يعملو حفلات رقص بالهواء الطلق و رحل عالجناين و مجدرة و مقالي. و حويقات حويقات... كلو عم يضحك و الأمور على أحلى ما يكون.

- هه هه هه .... هالاء الشعب فلس.