مساء الخير عليكو

احنا دلوقت في فصل الخريف
و ده فكرني بمسلسل كوري اسمو "الخريف في قلبي" (Autumn in My Heart)
و له برضو اسم تاني و هو "حدوتة الخريف" (Autumn Fairy Tale)

المسلسل ده اتعرض على التلفزيون المصري سنة 2004
و هو مسلسل رومانسي في منتهى الروعة , سواء في القصة او الاخراج او التمثيل , ده حتى الموسيقى بتعتو ملهاش حل , شوفو كدة : http://www.youtube.com/watch?v=vKJnFpvdWaI
و البطلة كانت رقيقة بشكل مش ممكن , و البطل كمان كان بيمثل كويس جدا
و دي تفاصيل اكتر للى عايز يعرف :
http://en.wikipedia.org/wiki/Autumn_in_My_Heart

و بالرغم من كل ده , لكن للأسف كان المسلسل المناسب في الوقت غير المناسب !

اذ تزامن عرضه مع وقوعي في الحب (من طرف واحد )
و المشاعر الكتيرة اوي اللى في المسلسل مع المشاعر الكتيرة اللى جوايا عملو مع بعض إنتر أكشن مؤلِم جدا

و البطلة اللى في الحقيقة كانت كل يوم تعمل تسريحة شعر مُختلفة
مرة تجيبو على جنب , مرة ترجًعو لورا , مرة ترفعو لفوق , مرة ديل حصان و مرة سايب
و طبعا ما كانِتش عارفة ايه اللى بيحصلي مع كل الحركات دي
ما كُنتِش عارف الاقيها منها و لا من البطلة اللى في المسلسل

العجيبة ان السنة دي بالذات كانت أصعب سنة في الكلية

و يا ريت بقى مؤلف المسلسل كان يرحمني
انما ابدا , إذ انتهي المسلسل بنهاية حزينة جدا
ده غير طبعا المسلسل الحقيقي اللى كنت عايشو و اللى كان حزين من بدايته اصلا
يعني لا اتنصفت في الواقع و لا حتى في المسلسل

ما علينا
المهم انو كان مسلسل جميل جدا
فلو كنت من هواة المسلسلات الرومانسية و ما كُنتِش اتفَرًجت على المسلسل ده , فانصحك بمشاهدته
هو على اليوتيوب بس بدون ترجمة (لا عربي و لا انجليزي ) .