جقل
عضو متقدم
![]()
المشاركات: 678
الانضمام: Oct 2004
|
تغيير......"مشهد"
التغيير....مشهد
المكان: " بناء حديث و نوافذ لامعة , لوحة كبيرة معلقة على المدخل كتب عليها وزارة الداخلية مخفر - شرطة المغبره , توقيع الخطاط حداد يظهر بوضوح أسفل اللوحة , على جدار المبنى و بخط عريض وواضح كتبت عبارة الشرطة في خدمة الشعب".
تدخل الكاميرا الى داخل المبينى و تستقر داخل غرفة رئيسية , على مكتب معدني بصدر الغرفة يجلس مساعد القسم أمامه على المكتب بقايا طعام و عدة المدته , المساعد يقرأ جريدته بإهتمام و يصب الماء في كأس المته بشكل ألي دون أن يرفع بصره عن الجريده ..أصوات جلبة تعلو و تنخفض يصيح المساعد بنزق و قد أنزعج من الجلبه"
المساعد:...أبو عطا.....و لك يا أبو عطا...شو هالصوت..
"يدخل أبو عطا رقيب القسم يقف بتكاسل أمام المساعد"
أبو عطا : خير سيدي..
المساعد : يا أبو عطا قول للشباب يوطو صوتن شوي..إذا بدن يلعبوا طرنيب مو مشكلة بس بدون صوت..و أوعك يلعبوا عن شرط ما بدنا نرجع للنظام القديم الله يرضى عليك.....يلا يا أبوعطا ما بدي أسمع و لا همسه..... "يخرج أبو عطا".....
"يعود المساعد الى قراءة جريدته بإهتمام شديد..... تتخافت أصوات الجلبة...ثم يرن جرس الهاتف ,يتناول المساعد سماعة الهاتف ....
المساعد : ألو ...." يأتي صوت نسائي من الطرف الآخر"
الصوت النسائي : ألو..قسم شرطة المغبّرة
المساعد : نعم هون قسم شرطة المغبّرة..خير
الصوت : دخيلكن يا أخي تعوا بسرعة..جيرانا دبحوا بعضن
المساعد : كيف دبحوا بعضن يعني؟؟!!
الصوت : عياط و صوات..و هلق عم يطلع صوت قواص سماع..مانك سامع....؟؟؟
المساعد : طيب..طيب..شو اسمك..
الصوت : أم زينب فلاحة...
المساعد : طيب يا أم زينب..قديش عمرك
الصوت : يا أخي ..شو عمري و ما عمري...الناس رح يدبحوا بعض..
المساعد : يا أختي ما بيصير هيك..لازم آخد كل البيانات, هلق تغيّر كل شي زمان أول تحوّل لما كنتو تكتبو تقارير و شكاوي و ماحدا يسأل و يروحوا الأبرياء بين الرجلين خلص, هادا ما بقا في منو أبدن......قولي بسرعة قديش عمرك؟؟
الصوت : يعني..شي 43..
المساعد : رقم هويتك..
الصوت..الله يرضى عليك يا أخي..عم قلك القواص صار رشا.....مانك عم تسمع..و جاي تقلي رقم هويتك
المساعد : لا تعطليني يا أختي..لازم كل شي يتسجل بدقه..بسرعة..قديش رقم هويتك
الصوت : سجل عندك......
المساعد : متجوزه؟
الصوت : متجوزة..متجوزة و عندي خمس ولاد...خلصني بقا..
المساعد : طولي بالك يا " آنسه" لازم كل كل شي يتسجل بدقه...شو اسم جوزك..؟؟
الصوت : ......
المساعد : شو بيشتغل جوزك؟؟؟
الصوت : ......
المساعد : و شو...؟؟؟
الصوت :
المساعد : و قديش...؟؟
الصوت : ....
المساعد : و منين؟
الصوت :
المساعد : و كيف...؟ يا أختي طولي بالك...لازم كل شي يكون أصولا..آخر سؤال..أخر سؤال..
الصوت :.....
المساعد : " يغلق سماعة العاتف و يهب بسرعة صائحا".........يا أبو عطا..حضّر الدورية بسرعة..ست عناصر بسلاح الميدان الكامل بواريد , خوذات , جعب , كمامات , ذخيرة...بسرعة يا أبو عطا ما بدي تأخير جهزلي الشباب خلا ل دقيقتين..
تتحضر الدورية بسرعة هائلة يخرج المساعد بعد أن يعتمر قبعته و يضع مسدسة و يغادر مسرعا, يتفقد السيارة و العناصر و الأسلحة و الخوذ و الجاهزية..., يصيح بالعناصر كي يرفع من معنويالتهم القتالية ويغنوا جميعا "بكتب أسمك يا بلادي....."...و ينطلق ليركب في المقعد الأمامي بجانب الساق..يصيح بالسائق .
المساعد : يلا...يلا يا أبني تحرك بسرعة
السائق : ينظر ببلاهه الى المساعد " لوين سيدي"
المساعد : " يضرب بيده على جبهته بشدة"........ العمى نسيت أسأل عن العنوان
موسيقا معبره....أو غير معبره.
|
|
| 05-21-2006, 07:33 PM |
|
{myadvertisements[zone_3]}
{myadvertisements[zone_3]}
{myadvertisements[zone_3]}
بحث
قائمة الأعضاء
التقويم
وثائق المساعدة
