بهاء
ممنوع 3 أسابيع
المشاركات: 3,112
الانضمام: Oct 2004
|
الى أيمن نور . أرحمنى يرحمك ربنا
كنت قاعد لا بى ولا على وبتصفح الجريدة حتى فؤجئت بخبر ( ان ايمن نور هيبلغ الحكومة المصرية قريبا خبر انه عايز يكمل سجنه , وان الافراج الصحى عنه يجمل صورة الحكومة ولا يفيده فى شئ ) . وذكرت جريدة الفجر ان الخبر تم نشره فى صحف امريكية - واصاب اشخاص بالاحباط داخل وخارج مصر ! وهنا لابد من وقفة عشان انا فاضى شبر ويجيلى سكتة قلبية من الجدع ده . ولهذا اوجه لسعادته رسالة " أرحمنى يرحمك ربنا " :
أستاذ ايمن نور من غير لا سلام ولا كلام , تعالى كده نقعد مع بعض على القهوة او على الكورنيش ونتكلم كلمتين مفيدين . دلوقتى يا عم الحاج انت عايز تبقى رئيس لـ 70 مليون نفر , والطريقة الوحيدة انك تكسب اصواتهم انك تنزل الشارع وتتكلم مع جماعات صغيرة وتعمل حراك اجتماعى . واوعى تفكر ان الشعب المصرى ده بيفهم او عنده استعداد يفهم , هو يا باشامهندس " شعب موظفين " يعنى لو حاسوا فيك بالقيادة والقدرة على السيطرة على مقاليك الامور , وخد بالك من الكلمة دى ( تخفيض الاسعار ورفع المرتبات ) هيرفعوك فوق اعناقهم ويووصلوك ان شاء الله البيت الابيض او الاخضر او اى مكان تقدر تحكم فيه البلد .
لكن يا باشا هتقعد فى التليفزيون وتكتب شوية تصريحات فى الجرنان , وتروح تلم شوية ناس عبيطة تمشى بيهم فى الشارع وتعملى مظاهرة - فالكلام ده مش بيجيب همه دلوقتى . ومن الواضح لسعادتى انك مش على دراية نهائياً باهمية المعركة القادمة أمام جمال مبارك وشلته . الناس دى كونت دوائر فساد عميقة جدا فى السلطة ولن يتنازلوا كده بالساهل عن ترشيح واكساب شخص موال لهم ومصالحهم . يعنى مثلا لو كنت حضرتك " عم محمد " وعندك كشك , وفى الحتة واحد صايع بيفرض على الناس اتوة - وجه واحد محامى قالى يا جماعة لابد من تطبيق القانون و المواطنة وان ما يفعله الصيع هؤلاء مخالف للدستور الى اخرته من الكلام الفارغ ده ... دلوقتى حضرتك عم محمد وعندك وضع قائم , الا وهو ( ادفع تسلم , ما تتدفعش انت حر ) فلازم تتدفع عشان الامور تمشى ويفضل عم محمد اللى هو انت طبعا محتفظ بالكشك بتاعه وبيرجع كل يوم لعياله بالاكل والغذاء ...
عم محمد اللى هو انت وانا وبقية الشعب المصرى مش بيفهم فى الكلام الكبير بتاع "العلمانية " و" حقوق الانسان " و " دولة قانون ومؤسسات " , هو بيفهم انه لما بيروح مستشفى حكومة مش بيلاقى دكتور يساعده , بيروح يرفع قضية امام القضاء الوراثة هما اللى بيكملوا المشوار وتترفض الدعوى فى النهاية بعد ما الراجل يكون مات وشبع موت , بينزل الصبح شغله بيندفس فى اتوبيسات غير صالحة للاستهلاك عشان يوصل شغله ( هو ده اللى عم عبده , وانا وانت بنفهمه ) . عم عبده ده اصل راجل ذكى وبيدور دائما على مصالحته , عشان لو مدورش على مصالحته وجاع محدش هيأكله , فالناس بقت كتير والخير قل وانت واخد بالك من الكلام الفاشل ده . ايه كمان اللى مزعل عم عبده ؟ ان ابنه طول دقنه وبقى عمال يقول قال الله وقال الرسول وبقى بيتكلم فى الجهاد وماشى مع ناس شكلها لحست مخه ؟ وعايز يسافر افغانستان عشان يحارب الكفرة هناك .
ينفع الكلام ده ؟
عشان كده عم عبده كان نفسه يكون فى شاغل تانى , يعنى نادى يلعب فيه لعبة - نشاط سياسى يشترك فيه , او اى مجال اخرى من مجالات تنمية الشباب . نفسه يلاقى مكتبة ابنه يروحها , او جامعة او مدرسة تحتويه بانشاطتها المختلفة واللى بتاثر فى الحياة ويحس فيها بجد انه بيعمل حاجة - مش زى الهطل اللى بيعملوه فى المدرسة بتاع كل سنة , اكتب بحث عن 6 اكتوبر او سوزان مبارك ومشروع الطفل او اى كلام فاضى هو احنا ناقصينك .
يعنى انت لو عندك مشروع محترم تشرح فيه لعم عبده كيف انه هيقدر يكسب من وراء كشكه بدون دفع اتاوة او تحسين الشارع بتاعه عن طريق مد الصرف والخدمات الانسانية فيه هتكسب عم عبده ومراة عم عبده وعيال عم عبده , لما تعرف بجد تروح تكلم طالب الكلية - انشاء الله بغرفة على الانترنت , وتمشى فى شوارع مصر على رجليك من قهوة لقهوة , ومن تجمع الى تجمع وتكلم الناس انشاء الله واحد واحد هتفهم مصر اكثر وهتكون اهل انك توصل للحكم على رقبتهم . وهما من سيحملوك ازى حاسوا فيك بجد ان قادر على فعل شئ , وانه بيخرج من عينك !
لكن يا ايمن اللى انت بتعمله ده تهريج فى تهريج , فمصر للن تتغير عن طريق المؤتمرات الصحفية لساعدتك ولا بالمقالات الصحفية - عم عبده مش بيعرف يقرأ ومعندوش وقت يقرأ , ولو كان بيعرف وعنده وقت فهو مموش فلوس يشترى بيها جرايد يقرأ فيها كلام اهبل بيسمعه على القهوة من الواد برايز فى النشرة المسائية قبل ما يقفل القهوة .
فيا مولانا يا تنزل تلف على رجليك وتقنع المواطنين بأهليتك لتشرح لمنصب رئيس الجمهورية , يا اما جمال مبارك هيكسب الانتخابات باصوات الموظفين ويقنع عم عبده ان محدش غيره يقدر يدير الحارة ! وعم عبده هيضطر انه يديله صوته , ويصل الى الحكم ...
ده فى حالة انك كنت بجد عايز تكون رئيس , انما لو كان شئ غير كده فارحمنى يرحمك ربنا
وشكراً على سعة صدرك ووقتك اللى مضعش لانك مقرأتش حاجة اصلا
وردة
|
|
| 05-25-2009, 12:16 AM |
|
{myadvertisements[zone_3]}
{myadvertisements[zone_3]}
{myadvertisements[zone_3]}
{myadvertisements[zone_3]}
{myadvertisements[zone_3]}
{myadvertisements[zone_3]}
|
بحث
قائمة الأعضاء
التقويم
وثائق المساعدة
/
الى أيمن نور . أرحمنى يرحمك ربنا
