كاتب مصري ساخر يكتب اسبوعياً في صحيفة المصريون الالكترونية

اليكم نموذج لكتاباته فيها اسقاطات على الواقع المصري

الفِردة ...!


-ربنا ع الظالم والمفتري وابن الحرام!

هكذا ارتفع الصراخ في مترو الانفاق فالتفت الركاب الى مصدر الصوت وكانت المفاجأة حين جدوا رجلا مفتول العضلات يمسك بخناق شاب عاجز النظر ومشلول فوق كرسي متحرك ويكيل له الضربات:

-ياااااااد قب بالمعلوم أحسن أقطع خبرك!!!

-هوه أنا عاد حيلتي حاجة يا معلم !! ما انت قلبتني وأخدت الل وراي والل قدامي!

فواصل الفتوة ضرب المشلول بلا رحمة فتدخل الركاب لفض الاشتباك فاخرج لهم الفتوة مطواة قرن غزال وصرخ بصوت كالرعد:

-اللي ح يقرب مني ح أشرحه!!! ده ولا مؤاخذة الصبي بتاعي!! وأنا ولامؤاخذة حر فيه!!! أضربه وأربيه واعمل ما بدا لي فيه!

-ايوه يا معلم بس ده واد غلبان ومشلول ومكسح وعاجز النظر!!!

-انشا الله يكون ميت وبيطلع في الروح!!!! انا اللي يغلط معايا مالوش عندي غير الضرب على قفاه!!!!!!!

وهنا تدخل كبار السن بشيء من السياسة:

-معلهش يا معلم سامحه عشان خاطرنا ويا بخت من قدر وعفا!! وانت باين عليك راجل جدع وابن بلد وده مهما كان زي ابنك!!! وعموما ده عيل طايش وغلط !

-عليا الطلاق بالتلاتة لو كان ابني لكنت شربت من دمه!!!!!! يرضيكم يا جدعان الواد الجربوع ده يغالطني في خمسة جنية؟!!

وهنا اتضحت ملامح المسألة ... فالمشلول مجرد متسول في مترو الانفاق والفتوة هو معلمه الذي استشاط غضبا حين اكتشف ان الولد خدعه وحاول خنصرة جزء من الايراد!

-لا ما لكش حق يا بني!! ازاي بس تغالط المعلم بتاعك في الحساب؟؟ ده حتى عيب!!! يعني مشلول وحرامي وايدك طويلة؟؟!!

-يا اخوانا ده راجل بلطجي وملقح جتته علينا وعامل على كل واحد فينا فِردة ميت لحلوح كل يوم!!

فخيم الصمت على عربة المترو وشهقت النساء من الدهشة وتساءل الرجال :

-معقولة يا معلم عامل فِردة على واد مشلول وعاجز النظر !؟ وكمان ميت جنيه حتة واحدة كل يوم؟؟؟؟

-حلوة اوي !! أمال ح اعيش ازاي انا والاربع نسوان بتوعي واورطة العيال!! وح ندلع نفسنا ازاي ونمنجه روحنا؟! ده انتو كده ح تخلوني اعمل فردة عليكم انتم كمان والراجل فيكم يعترض ويشوف انا ح اعمل فيه ايه!!!

وعلى إثر هذا التهديد أصبح الجبن والنذالة والانانية سادة الموقف وتراجع الركاب الى اماكنهم تاركين المعلم يضرب في المشلول براحة راحته:

-قب ياااااد بباقي "الغلة" بتاعت النهاردة أحسن عليا الطلاق بالتلاتة لأدبحك في المترو ده زي البهيمة وأشرب من دمك!!!

وهنا أخرج المشلول عملات ورقية كان يخفيها في الكرسي المتحرك:

سايق عليك النبي يا معلم تسيب لي اتنين جنية اشترى بيهم حاجة آكلها انا وأمي واخواتي!!!

-وحياة امك!!! عايز تسرقني يا له في خمسة جنية واسيبك تاكل انت وامك واخواتك!! يااخا هأوووووو!!!انشا الله ما عن اهلكم طفحتم!!!!!!!

-ابوس رجلك يا معلم!!! طيب سيب لي لحلوح واحد أشترى بيه عيش حاف!!!

-يا للا يا شاطر على بيتكم ومالكش من النهاردة شغل في المترو ده!!! ومن بكرة تشوف لك حتة تانية تشحت فيها!!!وابقا قابلني لو لقيت حتة تاكل فيها عيش!!!

وبعد أسابيع من الحصار والمطاردات وقطع الارزاق فاجأ المعلم المشلول على احد خطوط اتوبيسات الضواحي:

-فاكرني ياااااااد مش ح اقدر أوصلك هنا!!! ؟ عليا الطلاق بالتلاتة لو شفتك ع الخط ده تاني ح أشرب من دمك!!!

-طيب أشحت فين بس يا معلم!؟؟ المترو وسيبناه والشوارع ومواقف الاتوبيسات والميكروباسات وسيبناها!! وقدام الجوامع ممنوع!!! آكل عيش ازاي بس يا سيد الناس ؟!!

-انشا الله ما عن اهلك أكلت!! انا يا ابني اللي ما يدفعليش الفِردة بتاعتي مالوش أكل عيش في البلد دي نهائي!!!!!

ثم التفت المعلم لباقي الشحاتين الذين كانوا في الاتوبيس وهو يلوح لهم بالمطواة قرن الغزال:

-أنا باقول لكم أهو!!! عايزين تشحتوا وتاكلوا عيش يبقا لازم تدفعوا الفِردة وكل واحد حاطط في بقه فردة جزمة قديمة!!!! فاهمين يا باشاوات والا مش فاهمين؟!