mankoul


البوكمال .. دير الزور … و الأمن ….. ماذا بعد ؟؟

السلام عليكم إخوتي الثائرين في داخل و خارج سوريا
أول شي لازم أعتذر منكم عن شغلتين بشكل مسبق :
تأخر التقارير اللي عم اكتبها لأن ما عندي انترنت بالبيت و كوني مضطر أروح على مقاهي النت مشان أرسل التقارير … و كمان المشاكل اللي عم تصادفني بالنسبة لبرامج التشفير اللي عم استخدمها لأنها ما بتساعدني كثير …. و كمان عن طول التقارير لأاني بحب استوفي المعلومات و اتأكد من صحتها … و المعلومات اللي مالي متأكد منها رح نبه عليها …
هلأ تقاريري مانها تقارير عاجلة لأنه ببساطة هي شغلة القنوات الإخبارية و مواقع التنسيقيات … أنا رح أعطيكم الوقائع من وجهة نظر الشارع و أحاول تفسير الأحداث الملتبسة قدر الإمكان …. استبينا ؟؟؟
خلونا نحكي عن أحداث البوكمال يوم السبت … الساعة شي 2 العصر و ما كان في لا اعتصام ولا مظاهرات و الناس شي بالأسواق و شي بمحلاتها و شي بالبيوت لأن الحر كان ما بينطاق … فجأة بتنط من بين العالم سيارة و من نوافذها الأربعة بتطلع الروسيات وبلش الرش … و اتبين بعدين إنو الجماعة من أذناب جامع جامع مدير الأمن العسكري بالمحافظة … شنو هو إلو كتير أذناب .. العدد اللي متأكدين منو هو 3 شهداء و الجرحى فوق العشرين … هي الأخبار أكيد سمعتوها على القنوات الإخبارية ..

اللي صار على الأرض إنو الناس بالبوكمال خلال نص ساعة كانت كلها بالشوارع و الساحات …
و بلشت التظاهرات و الاعتصامات … و لاحظوا إنو على الرغم من بعد البوكمال عن الدير فردة الفعل كانت وحدة تقريباً … الاختلاف الوحيد كان هو حمل السلاح … لك إيه سلاح … روسيات وبي كي سي و حتى قاذفات صواريخ …
هلأ هدولي بالكن و خليني اشرحلكن و تفهموها مني أحسن ما ينضحك عليكن بكم كلمة مو صحيحة … و الحكي موجه لجماعة منحبك و لفرع المعلومات و لجيش أبو شحاطة الالكتروني و إلكون يا جراثيم على حد سواء ..

البوكمال مدينة حدودية و متل كل مدينة حدودية التهريب فيها على المكشوف … الفرق بالنسبة للبوكمال هو العشائرية … أهل البوكمال كلهم قبائل عرب و في قسم منهم أكراد و هاد الشي كان لصالح تكاتف المدينة بكاملها على الرغم من اختلاف و تنوع الأعراق و الأديان و العشائر … و البوكمال لهاد السبب أكثر عمليات التهريب الناجحة فيها هي عمليات تهريب السلاح … و اللي مفكر إنو دير الزور فيها سلاح يروح يشوف البوكمال شو فيها … يعني شغلة إنو يكون عندك مسدس أو روسية هي ما بيخلى منها أي بيت …و بدي ياكون تركزوا معي إنو البوكمال رغم كل هالسلاح اللي فيها صرلها أكتر من شهرين ما انضربت فيها طلقة على الرغم من بحور السلاح اللي فيها و على الرغم من استمراية الاعتصامات و المظاهرات فيها ليلية أو نهارية … ماذا نستنتج ؟؟؟
و طبيعي لما تكون حياتك و حياة عيلتك و أقاربك مهددة شو بتساوي ؟؟؟ الشباب حملوا سلاحهم و كل خمسة ستة وقفوا على مداخل الحارات و الأحياء … هاد ما عدا الناس اللي ماشية و مسدسدتها على خصورها …. ولاحظوا معي إنو رغم كل هالتسليح ما صار شي للأمن بالبوكمال !!!!

هلأ أبو البيش كان باعت لعنا عالبوكمال شي 25 دبابة … اليوم الجنود لما شافوا هيك قالوا يلعن روحك يا حافظ و روح هاللي خلفتهم و انضمت شي 4 دبابات – ماني متأكد لكن أقل عدد هو اللي شفناه بالفيديو وهو 4 – مع عتادها و طواقمها و أسلحتها للثوار السلميين … و صار في محاولة لاقتحام المدينة من قبل الأمن العسكري والشبيحة تحت غطاء الظلام بسبب قطع الكهرباء عن المدينة … لكن انقلب السحر عالساحر و صار انشقاق بالأمن العسكري و العدد بحدود المية و خمسين عنصر …اشتهيت شوف وجه جامع جامع لما سمع الخبر !!

الدوريات تبع اللجان الشعبية الأهلية – مو لجان أبو حافظ – عم تعمل دوريات و الناس متأهبة و عم تغلي غلي و صار في حكي إنو يا أخي قلعوا الأمن من هالمدينة هاد إذا ما شطناهم من المحافظة كلها … هالحكي رح وصل له شوي تانية ..

نجي على دير الزور … أخوكم كان نايم من الـ2 الظهر للـ6 العصر لأني عم روح عالنادي و حاول خفف وزني –آخر مرة وزنت حالي كانت يوم الثلاثاء الماضي و كان وزني 101 كغ … آخ من النت و الدراسة آخ –
فأنا ما سمعت شي لحدود الساعة تسعة بعد ما طلعت من النادي – احمدوا ربكم ما كنتوا جنبي … كنتوا انصابيتوا بأذية رئوية – إنو صاير قتل و ضرب بالبوكمال … الدير مظاهراتها طلعت بعد العصر و كمان بعد العشاء و الشعار هو : بالروح بالدم نفديك يا بوكمال … الأعداد بالبوكمال ما عندي فيها شي قطعي لأن المدينة كلها خرجت ببساطة يعني شي 90000 شخص …أما بدير الزور فكان العدد فوق 150000 شخص .

هلأ الناس بالدير انقسمت قسمين : قسم طلع بعد صلاة العشاء مباشرة و تظاهروا بالشوارع و راحوا على دوار المدلجي و هدول كانوا عم يصيحوا بالشعارات المعتادة … و القسم التاني هو الأصغر و هدول كانوا بفاتحة الشهيد عامر عبد العزيز الحسن – اللي قتلوه الأمن العسكري يوم الإضراب الخميس – و اتأخروا شي ساعة عن بقية المظاهرات لكن تظاهروا … و هي المظاهرة اللي كنت فيها …بس أنا بلشت اسمع شعارات غريبة عم تنقال : حربية حربية ما ظل ما ظل سلمية … أنا يا جماعة انخلع قلبي من مكانو … إنو ثورتنا كلها سلمية معقول كلها تنخرب هلأ … و على طريق المظاهرة في مركز للأمن الجنائي ( القسم الغربي ) … و بعيد عنو شي 200 متر و بالعمق داخل حارة تطل على مسار المظاهرة في فرع المخابرات العامة – ماني متأكد شو اسمو الفرع لكن هو فرع مخابرات و كلهن من نفس البالوعة -
… اتصوروا شو كان صار لو الناس هجمت عالقسم الغربي أو حتى على فرع المخابرات مشان تطلع المعتقلين … نحنا ساوينا حواجز بشرية قدام الأمن الجنائي و كنا مستعدين للتصرف في حال كان حدا بدو يقرب على فرع المخابرات ….
مع ملاحظة إنو في مندسين بيناتنا بالمظاهرات – رح احكيلكون قصتهم بالتقرير القادم ( الأمن في دير الزور ملاحظات و تعليقات ) – … العمى يا جماعة إنو الدمية و الاستخبارية ما كذبوا بهالشي … لكن المشكلة ما حددوا من أي فرع مخابرات هدول المندسين !!

لكن الحمد لله ما صار شي و صدقوني حسيت بالخجل كوني أسأت الظن بأهل مدينتي … لما وصلنا على دوار المدلجي – مكان الاعتصام المسائي – فاعلين الخير نبهوا التنسيقية و صار في تأكيد على هالشي … و رح انقل لكم الأفكار اللي وردت بكلامهم : ” ثورتنا ثورة سلمية … و حساب المفسدين و المغتصبين و القتلة سيكون بعد انتصار الثورة … لا نريد التخريب أو العنف … و لن نسمح بهما من أي طرف ” .
و مشان أكد على هالكلام اتذكروا إنو الشهداء ارتقوا بحدود الساعة 2 العصر لكن ما صار شي للأمن للآن …

لكن هاد الكلام ما بيعني إنو نحنا لقمة هنية لكل مين بدو ياكلنا … و على رأي المثل : اللي بيدق الباب بيسمع الجواب ..
و هالمرة الجواب رح يكون أكبر من أي شي بيتوقعوه … نعم ثورتنا سلمية … لكن لما يكون وجود الأمن في محافظتنا إلو تهديد على حياة الناس فراح نشوطهم برات المحافظة … و الشعارات اللي قالوها الناس اليوم بإمكاننا نعتبرها الإنذار الأخير للأمن … انقشطوا من محافظتنا يا إما نحنا رح نقشطكم من هالوطن كلو …
و الخلود لاندساسنا المقدس