بعد ما تقطع الشارع إلى الجهة الثانية ستجد على الزاوية محل بيع كنادر، والغريب في الموضوع أن سعر الكندرة عنده ما بين 30 و60 دينار، وهذا شيء غريب جدا في الزرقا لأن الشعب هناك ما بيعرف هيك أرقام!!! لأنه الواحد لما بدو كندرة كل راس مالها ينزل على سوق الخاوة ويقعد يفاصل ساعتين زمن بجيب أزعم كندرة ب8 دنانير:D

المهم، ما علينا من هالحكي الفاضي وخلونا نكمّل المسيرة، بتمشي شي مترين بتلاقي صيدلية وبجانبها تماما محل لبيع المشروبات الروحية، وهنا ذكاء الفكر الزرقاوي يبرز تماما، لأنه الواحد بيفوت على المحل بيشتريله ربعية وبيسكر عليها، بعدين بيعمل طوشة مع صاحب المحل عشان الربعية الثانية اللي بدو ياها ببلاش وبيروح فيها تشطيب وترقيع، بخش عالصيدلية بيشتريلو بتلات أربع ليرات اسبيرتو ولزقات جروح وبيطلع، بالتالي هنا نجد أن الفكر الاقتصادي عند أهل الزرقا مُتقدّم جدا :D ... بتكمل المسير عشان تمر جنب البوفيه، والبوفيه هو محل بيع القهوة والشاي والشاي بحليب للمحلات المجاورة، وفي هظاك المحل بتلاقي واحد ما شاء الله أربعة بأربعة، وطبعا هو إضافة إلى عمله بيلعب حديد ويبدو بيشارك ببطولات، طبعا عند المرور راح تسمع صوت هيفا وهبي أو وديع الصافي أو غيرهم بيصدح بأعلى صوت من داخل المحل وبتسمع كل شوي صوت واحد بيقول "عصفووووووووور، زبطلي واحد قهوة وسط وواحد شاي بحليب، حصتي جاييتني وبلعن &$%$%# إذا ما بتجيبهم بسرعة" :D....

بعد ما تستمتع بكاسة قهوة نص نص، بتكمل طريقك عشان تمر بجانب مخابز الشرق، هون يا معلّم بتلاقي الخبز اللبناني الصح والساخن، أو بتلاقي الصرافة إذا معك ليرة وحابب تصرفها قروش عشان ما ينصب عليك كنترول الباص:D

ما علينا، بتفوت بتخطفلك كيلو خبز سخن وبتبلش حش فيهم وانتا ماشي ... بعد شوي بتمر بجنب مطعم حمص وفول وخلافو وببيع عصير كمان، بس سيبك منه لأنه مش ولا بد وأكمل طريقك ... هنا تبدأ سلسلة محلات الملابس الستّاتيّة، وبتلاقي كل محل واقف على بابه شب الجل بنقّط من راسه من كثر ما هو عاجقه وحامل بإيده كاسة قهوة وبالإيد الثانية سيجارة، وطبعا لازم تكون سلسلة المفاتيح طالعة من جيبتو ومربوطة بعروق القشاط خوفا عليها من النّشل، وطبعا إذا كنت شب وداخل عالمحل مع أختك أو حبيبتك فلازم تحط الشرف على جنب لأن شغلة أنك تسمع حكي عن جنب وطرف مضمونة وتحصيل حاصل لكن راح تكون عالخفيف والساكت مراعاة لشعورك (شايفين الاحترام!!!):lol22:... أكمل طريقك يرعاك الله وراح تمر بجانب محل "فراس فون" وهاظ أشهر محل تسجيلات موسيقية في الزرقا، وبتلاقي عنده أحدث الأغناي والألبومات لمصطفى كامل ومحمد عبده وأبو وديع وحمادة هلال ومصطفى قمر (طبعا بتكون نازلة بعمّان قبل ما تنزل بالزرقا بسنة) وبتلاقي عنده أفلام ومسرحيات وأي شيء ممكن ينسمع أو ينشاف إلا الأغاني الأجنبية، ما عندهمّش غير أغنية Usher اللي اشتهر فيها وكام أغنية اللي غنوها اتوفّوا من زماااااااااااااااااااان....

أكمل الطريق يرعاك الله، لفوق شوي راح تلاقي مطعم فارد بسطة على بابه وببيع دونات وحلويات غربية، طبعا حبة الدونات شبه قرص الفلافل وشكلها من النوع اللي إذا أكلتو راح تقضّي أسبوع على الأقل داير على دكاترة لمحاولة معرفة شو صار بشعرك وليش كت فجأة!!! فا نصيحتي الابتعاد عنه، وكمّل طريقك من فم ساكت يا ولدي أو يا بنتي ... بتطلع شوي بالشارع راح توصل للبنك الإسلامي وبجانبه البنك العربي، هناك كل آخر شهر إذا حابب تلاقي حد أو تلقط واحد بدك منه فلوس راح تلاقي الزرقا كلها صافة على البواب وعلى الATM بتسحب رواتب، وكل واحد من هظول المسخمطين خايف على العشر ليرات اللي سحبهم حاكم المساكين الواحد فيهم حامل كريدت كارد صحيح بس ما فيش بحسابه في البنك غير خمسين ليرة :D:

دعونا نكمل....

لما توصل عند هذه المنطقة ستجد أيضا بسطة الدخان التي يديرها واحد أصم وأبكم، يعني شراء باكيت دخان سيأخذ أطول من المعتاد لكن دخّانه عادة نظيف ودائما كنت ألاقي عنده ما أريده أيام ما يكون مقطوع من السوق بزيادة عشر قروش!!!

خلونا نخش بالمهم، على السايد المقابل (الجهة المقابلة من الشارع) يصطف القاضي والسهل الأخضر وهاظول أشهر محلين حلويات في الأردن ومن زمان موجودين، طبعا الآن صار فيه حبيبة، وما بعرف إذا عرفات عتيق والا لأ بس ما فيش منو في الزرقا ... ما علينا، كمان في طارق سنتر وهاظ فيه الإنترنت كافيه اللي كنت معسكر فيه ليلا نهارا أيام ما كنت في الأردن وما كانش عندي إنترنت وهو موجود في الطابق الثاني واسمه "دريم كافيه"، طبعا الطاولات مهرتكة وماكلة روح الخل والكيبورد بتلاقيها عبارة عن نفّاضة سكاير، والماوس مشلفة بتحرّكها يمين بتروح شمال وهلمّ جرّا، لكن الخدمة خمس نجوم وكل شوي في لفّة شاي مجانا للشباب القاعدين والساعة بنص ليرة (يا بلاااااااااااااش :aplaudit: ).....

من أبرز المعالم على هظاك المربع هو البغّال بلازا، أطول مبنى في الزرقا وأكثرها تطوّرا حاكم فيه أصانصير :D إرتفاعه 7 طوابق بحالهم، ولا تستخفّوا بالموضوع حاكم أهل الزرقا شايفينه ومش مصدقين، عنّا أبراج يا جماعة :aplaudit: وهناك فيه بتلاقي صيدلية إسمها "الزرقاء الحديثة" وهاي يا جماعة عبارة عن منجم ذهب، يعني يمكن بتطلّع بالشهر أبو 100 ألف دينار أو شيء مثل هيك لصاحبها، أيضا بتلاقو على الزاوية المقابلة محل ببيع حفّايات وكنادر بلاستيك وشنط مدرسة ومن هالحكي هاظ، طبعا هو وظيفته النهارية هي مساعد مدير في مدرسة إعدادية (على ما أذكر مدرسة القاسم اللي هي مدرستي كانت ) زلمة محترم عالآآآآآآآآآآآآآآآآآآخر، بالله تجبروا خاطره بشي حفّاية لما تنزلوا عالزرقا:D

شو كمان يا ربي؟؟؟؟ آه، بتلاقو على الجهة الثانية عرباية قهوة على شكل قارب، وهاي من أشهر العربايات في الزرقا كلها حاكم موجودة على أكثر مربع مُكتظ بالعواطلية والدواوين واللي حابين ياخدولهم تمشاية برّه المحل، وقهوته منتازة وشغل كيف وأظن ببيع دخان فرط كمان بس ما علينا، بإمكانك بخطفلك كاسة قهوة (مع انّك شارب تحت بس لازم تتعرّف على كل شيء) وتشتريلك سيكارة "فايسوري" بشلن أة إذا حبّيت تتبعزق بتعطيها مارلبورو أبيظ ببريزة :cool:

هسّه المهم، تفضّلوا صور من هظيك المنطقة :aplaudit:


في الصورة أعلاه عمارة البغال


وأعلاه بتلاقو المربع الشهير ... بس عرباية القهوة مش موجودة للأسف، كان يوم عطلته :D


أعلاه، يافطة القاضي:D

على مهلك ...وقف عندك..انتا "خربطت إتبلش":angryrazz:

حلويات القاضي والسهل الاخضر حديثة جدا مقارنة مع حبيبه..

القاضي في الثمانينات

السهل الاخضر في اول التسعينات..

واشهر محلات الحلويات هو حبيبة ...في الاربعينات!!

اما عرفات . . افتتح فرعه الوحيد بعد نابلس في عمان ـ دوار المدينة المنورة بعد عام 2000 .وكل الفروع الاخرى - بالمناسبة - مزورة:closedeyes:

شوف يخوي يا عاصي:D

الشعب الزرقاوي مرجعيته هي الزرقاء والزرقاء فقط، التاريخ يبدأ وينتهي في الزرقاء ولا نعترف بأي شيء آخر:Dالقاضي والسهل الأخضر موجودين في الزرقاء بعشرات السنين قبل حبيبة وليس لهم فروع أخرى مش زي حبيبة اللي نص العيلة فاتحين محلات وبطل الواحد عارف مين الأصل فيهم:barfy:

ألذ كنافة على الإطلاق هي كنافة فرع القاضي الأصلي والأوحد على باب حسبة الخضار في الزرقاء، إن لم تتذوقها فأنت لم تتذوق كنافة :aplaudit:طعم الكنافة ممزوجة بعبق البقدونس والكزبرة، وعطر اللحم الطازج من اللحام المجاور، وعبير البهارات والزعتر ، لا يضاهيها شيء في العالم كله:cool:

الواحد "بده حسه يما بده رغيف يعسه" ؟

يعني كلامك إذا لم يصاحبه مذاق، لا ينفع ولا يضر....

يجب أن تبعث بالدي إتش إل سريعاً قطعة حلوى لكل من شارك في الموضوع.... :D

أبا إبراهيم أنت استبقت الأحداث:D

هلّق أحلى تحلاية لعيونك وعيون الشباب:aplaudit:

وين وصلنا؟

آه ... هاظ يا سيدي بالمنطقة اللي وصلنا ليها راح تكون طلعت روحك وجاي على بالك شوية تحلاية بعد الشاورما والعصير وبتكون ركبك سابت بسبب نقص السكر، فا عندك خيارين صعبين، يا إما بتفوت على القاضي أو السهل الأخضر، بالنسبة لي القاضي أطيب ... المهم بتفوت وبتطلب نص ناعمة أو نص خشنة (نص يعني نص أوقية، بس بمصطلح السوق اختصروها لأنهم كما قلت سابقا جماعة عمليين :D) وبتقعد تستنى بطلبك حاكم المحل بكون مليان ويا دوب تلاقيلك شي طاولة تقعد عليها، الناعمة المفضلة لي عند القاضي بتكون طرية لأبعد الحدود وبتحس الجبنة بتذوب في ثمّك كأنك تأكل الشهد، أما عند السهل الأخضر فطعم الجبنة أقوى وظاهر أكثر من عند القاضي وأنا بحكم عدم صحبتي مع الجبنة بفضّل القاضي عليه، كمان كنافة السهل الأخضر أنشف من عند القاضي ومش طازة على طول مثل القاضي :cool:

بعد ما تخلّص بتكون هفت نفسك على سيكارة، فا بتروح بتنط عند صاحبنا في الجهة الثانية من الشارع وبتفاصله بلغة الإشارة على سيكارتين فايسوري (هي فايسروي، بس الزرقاوية بيقولوا فايسوري حاكم ثقافتهم ألماني :D ) بعدين بتعطيها كاسة قهوة فوق الوسط (يعني وسط على زيادة شوية صغيرة سكر) لأن حلاوة الكنافة بتخلي اللي أقل من هيك علقم، وبستدين ولاعة من الشباب المتجمهرين عالمربّع باللهجة التالية: "بالله يا أبو الشباب ولعة لو سمحت"، فا هو بيتشهمن وبيقلب أبو زيد الهلالي وبيولّعلك ياها بنفسه، فا لما تخلّص لازم تتقيد بالبروتوكول الدواويني القائل انك لازم تدق على إيد الشب دقّة خفيفة معناها خلص ولعت السيكارة وبعدين بتسحب نفس وبتقول "على راسي يا معلم"، وهو برد عليك "حبيب قلبي" :cool:

هنا بنكون خلّصنا ثاني مُربّع في شارع السعادة وانت طالع باتجاه شركة الكهربا، فا بتقطع الشارع للجهة الثانية، بس خلوها لبعدين علشان ما تختلط الأمور عليكم

تفظّلوا الصور اللي راح تطلع عيونكم عليها...





كنافة ناعمة ... سدر طاااااااااااازة



ما بعرف شو هاظ ... يمكن اللي بيحكوله عش البلبل


أنا بسميها كنافة أصابع، عاد شو الإسم الفني ما بهمنيش لأني ما بحبها


خشنة


بين نارين


فطاير ... شوفوا اللون، شغل ينكتب فيهم شعر :9:

يحرق حريشك يا كمبيوترجي، تتحرقنا الشهوة عندما نرى هذه الصدور (بلا معنى)..... :aplaudit:

كنت أنوي تقديم بعض الحلويات العربية التي أنتظرها من سوريا لبعض مدعوي، لكن للأسف لم تصل....

سأحفظ هذه الصور، وأعرضها عليهم على نية "شم ولا تذوق".....
:D