الموضوع له عدة شقوق
العقل الجميل بيقول الناس عاوزة تدور على أى حاجة للفرحة .. مش عارف ؟ يعنى هم فرحانين وعاوزين يعبروا عن الفرحة ؟ أم انهم حزانى ويبحثوا عن أى سبب للفرحة ؟

المفروض إننا نسعد لمجتمع جميل نعبش فيه يوفر كلمة الحق والتعليم الجيد والعمل النافع المثمر والأنشطة الإنسانية المختلفة والنظام العادل إلخ .. فإذا كان كل هذا غير موجود فما السبب ؟ ومن الذى يمنع الأوضاع السليمة التى تفرح الناس ؟

عدم وجود إنجازات فى حياتنا جعلت المجتمع يبحث عن إنجازات تافهة لإثبات وجود إنجازات ، وإثبات إننا نقوى على عمل شىء ما يثبت تفوقنا على غيرنا

حكاية حب مصر بتشجيع الكرة والإغانى !!؟؟ حب مصر يكون بالعمل للتخلص من الديون والإكتفاء من الأدوات والآلآت والطعام ، وعمل إنجازات تنفع البشر

أنا مش عاوز " هدف " زيادة فى ماتش .. عاوز " هدف " مليارات زيادة فى الإنتاج ، وهدف تقليل السرقة عدة مليارات ، وهدف ضغط النفقات عدة مليارات ، وهدف تقليل الديكتاتورية والظلم ونشر الحرية والإنسانية

أنا مش عارف أقولك ايه يا قطقط ..
إنت أصلك غريب قوي.

يعني إنت عايز الناس تحزن لما المنتخب يخسر ؟
و لا كنت عايزهم يبقوا عادي كده .. و نقضيها بلادة إحساس ؟

إنت فاهم إن الناس في دول العالم المتقدم هي بس اللي من حقها تفرح ؟
إنت متصور إن الناس في دول العالم التالت لازم تعيش مهمومة طول حياتها لغاية ما حال البلد يتصلح ؟
إنت تعرف إن أمريكا عايشة بالديون كدولة و كأفراد ؟

و بعدين هوه كل حاجة البلد ؟ كل حاجة مصر ؟
مفيش حاجة إسمها حياة خاصة و حيا فردية ؟
مصر مديونة لطوب الأرض لكن إنت حالك عامل إزاي ؟
إنت كمان مديون ؟
المصريين عايشين ديكتاتورية و ظلم لكن إنت عايش إزاي ؟
حد بيظلمك ؟
حد بيتسلط عليك ؟
حد ماسكك من رقبتك ؟
المصريين فرحانين مع إن مالهمش حق يفرحوا .. ماشي.
لكن إنت ايه اللي مزعلك ؟
ايه اللي مضايقك قوي و مخليك عايز الناس كلها متضايقة ؟
العقدة ديه جت منين ؟

مين قال إن المفروض إننا نسعد لمجتمع جميل نعبش فيه ؟
أيوة المجتمع الجيد حاجة تفرح و تخلي الناس حالها أحسن ..
لكن إنت فاكر إن كل الناس في أمريكا فرحانين و سعداء ؟
إنت فاكر إني لما بقولك إن السعادة مش واقفة على حاجة و إنك تقدر تكون فرحان منغير سبب, إني بغني عليك ؟

و لو مصر دولة متقدمة و حرة و الناس كلها أغنياء و متعلمين في حين إن حياتك إنت ملخبطة تبقى سعيد ؟

و بعدين إنت فاهم إن الإنجاز بييجي إزاي ؟
الإنسان علشان ينجز في حياته لازم يكون حاسس إنه قادر على الإنجاز و يعيش فرحة الإنجاز قبل ما ينجز ؟
لازم الأول البني آدم يصدق إنه بينجز و يقدر ينجز عشان ينجز ..

يعني لو إنسان ناجح في حياته لكنه مصدق إنه فاشل و دايما بينظر لأخطاؤه ستجد أن أخطاؤه تتزايد و إنجازه يقل و بالتالي يتحول إلي إنسان فاشل فعلا
مما يجعله يركز أكثر على أخطاؤه و يفشل أكثر و هكذا .. يدخل حلقة سلبية
لكن لو إنسان فاشل في كل حاجة في حياته لكنه بدأ يصدق إنه ناجح و دايما يركز على إنجازاته البسيطة ستجد إن إنجازه يتزايد و بدأ يتحول إلي إنسان ناجح فعلا
و بالتالي يصدق أكثر إنه ناجح و يركز أكثر في نجاحاته .. و يدخل حلقة إيجابية

في حاجة إسمها الإيحاء يا قطقط و ده أسلوب رائع في توجيه الإنسان لذاته و فعال جدا و انا مجربه

يعني بص :
لو الإنسان عايز حاجة تحصل قوي بيصدق إنها حصلت قبل ما تحصل و ده بيخليها تحصل فعلا.

أسمع كلامي : آمن فقط فتخلص
لو صدقت من قلبك في أي حاجة إيجابية هتحصل لك ..
و لو صدقت من قلبك في أي حاجة سلبية هتحصل لك ..

انت بتمارس الإيحاء مع نفسك بصورة سيئة جدا على فكرة ..
زي اللي داخل فرح واحد صاحبه و قعد يفتكر يوم وفاة أبوه بص لقا نفسه زعلان قوي و يبص للناس يلاقيها فرحانه يتغاظ و يفتكرهم ناس هبلة.

إنت فاكر مثلا إن اللي مخليك مش قادر تفرح هو ديون مصر .. مستحيل
مفيش إنسان على وجه الأرض يستطيع أن يتجاوز ذاته فينساها تماما و يفرح و يحزن لأسباب تجاوز ذاته .. إستحالة و ديه حاجة كويسة

أسباب زعلك شخصية و أتحداك ..
لما تكون زعلان عبر عن نفسك بصراحة لكن ماتفشش خلقك في حاجة تانية لأنك بالطريقة ديه مش هتعرف تصلح مشاعرك ..
الأسباب الخاطئة تؤدي لنتائج خاطئة ..
شوف إنت حياتك عاملة إزاي و إعرف ايه اللي مضايقك و صلحه ..
هتلاقي كل آراءك إتغيرت في كل حاجة.
ساعتها يمكن تفهم الكلام اللي بقولهولك
و ساعتها يمكن تنتقي آراءك بعين تانية لأنها ستؤثر عليك أيضا في حلقة أخرى.

يعني لما تبص للفرح بطريقة صعبة و تضع شروط كتيرة عشان تفرح هتبقى حياتك غم ..
قلل شروط الفرح هتلاقي الفرح أسهل.
يعني مثلا لو مشترط على نفسك إنك مش هتفرح غير لو كان معاك مليون جنية .. سهل الشرط شوية
خلي الشرط إنك هتفرح لو كان معاك مية ألف بس أو عشرة آلاف.

لو أصريت إنك تعيش و إنت معقد شروط الفرح مش هتفرح أبدا ..
و لو أصريت إنك تعيش حياتك و إنت معقد شروط النجاح مش هتنجح أبدا ..

لكن لو سهلتها على نفسك هتلاقي نفسك من فرح لفرح و من نجاح لنجاح ..
إنت فاهمني بقا ولا ايه ؟
أنا بكلمك عشان مصلحتك و إنت إعمل اللي يريحك.

أتمنى لك الشفاء العاجل :wr:

في مرة مميزة , فرح المصريون لشئ ( مصري )
و غضب المصريون على الفلسطينيين لانهم اهانوا شيئا ( مصريا )
و ربما لفت نظر قطقط ان الفوز المصرى ربما يحل محل تقدم مصر , ولا اظن ان لهذا علاقة بالمسيحية , و لعلكم تقرأون هنا ما يشابه

http://www.alukah.net/majles/showthread.php?t=12185
وقفات شرعية مع البطولة الافريقية

العقل الجميل
كلامك غريب قوى .. معقولة إننا احرار ولسنا عبيد ، وكل كلامنا وحركتنا بتيقى بالريموت كنترول وإلا يدوسنا القطر ، ماسمعتش عن كريم اللى كتب مقالين وراح وراء الشمس ، مابتشوفش اللى بيتظاهروا بيتمسكوا ويتعمل فيهم إيه ؟
أنا مش بأطالب كل واحد يفكر فى ديون مصر ، أنا بأقول الناس اللى بيطلعوا ويدعوا حب مصر بالأغانى وتشجيع الكرة ، ويظنوا إننا فتحنا عكا أو شابهنا اليابان لمجرد الفوز فى مسابقة
بأقولهم العظمة فى العمل والإنتاج ، لو عظماء صحيح كنا إشتغلنا ونداين الناس بدل ما الكل قاعد والديون بتزيد علينا ، وكله للتليفزيون والكورة والأغانى .. التليفزيون والكورة والأغانى ليسوا مصر العظيمة لكن مصر الضائعة المضللة
عموماً شكراً على النصائح الشخصية .. ما يهمنى هو التناقض الصارخ بين الكلام والفعل ، وموجة الهلوسة الجماعية بسبب فوز بكأس كرة !!؟؟
طيب الأرجنتين بطلة العالم هل بنحترمهم قوى لأنهم بيفوزوا فى الكرة ؟

براحتك يا قطقط ..
إزعل إنت عشان ديون مصر لكن أنا مش هزعل و مش هتفرق معايا.

هفرح و هنبسط عشان البطولة و عشان كل حاجة حلوة بتحصل حواليا.
و لو الناس نزلت شارع جامعة الدول العربية عشان ترقض و تغني هنزل معاهم و هرقص و هغني و ههيص و اللي يطق يموت :P

يا عمي أنا هعيش كام مرة عشان أقضيها زعل و أقعد أقرف في نفسي ..
قطقط : إنت ضار بالصحة زي السجاير .. لوسمحت لا تنشر كلامك للناس
إزعل إنت لوحدك :rose:
إنت تعبتني ع الفاضي.

إسمع كده الأغنية ديه بتاعت محمد منير يمكن يعرف هوه يغني عليك :

بحر الحياة

----------


الناس النكديين :

بحر الحياة غدار و إحنا لفين رايحين

شايل معانا الأسرار و إحنا معاه ماشيين

أيام تفوت و تروح و إحنا ولا حاسين

أحلام تعيش و تموت يا قلوبنا يا خايفين


محمد منير :

الطير بيهاجر و بيرجع و الشمس بترحل و بترجع

و الدنيا بتاخد و بتدي و الليل لو طول هيعدي


الناس النكديين :
في ليالي بنحلم و تعبنا و رجعنا لوحدنا بعذابنا


محمد منير :

حاول تتغير و مسيرك تقدر و بلاش نستسلم يوم للحزن مادام عايشين



الناس النكديين :

بحر الحياة غدار و إحنا لفين رايحين

شايل معانا الأسرار و إحنا معاه ماشيين

أيام تفوت و تروح و إحنا ولا حاسين

أحلام تعيش و تموت يا قلوبنا يا خايفين


محمد منير :

لو ينسى الواحد أحزانه هيشوف الورد بألوانه

لو نفتح للدنيا قلوبنا هتدق الأحلام على بابنا

الناس النكديين :

دي ساعات الدنيا بتوعدنا و نقرب منها و تبعدنا


محمد منير :

حبها من قلبك حبها هتحبك

إضحك للدنيا, الفرحة هتيجي فغمضة عين



بحر الحياة غدار الدنيا لسه بخير

شايل معانا الأسرار في حياتنا لسه كتير

أيام تفوت و تروح بكره هييجي أكيد

أحلام تعيش و تموت هييجينا حلم جديد







الدنيا لسه بخير









في حياتنا لسه كتير









بكره هييجي أكيد









هييجينا حلم جديد