بعد دخول التقنيات الحديثه المجال الزراعي اصبحت المحاصيل الزراعيه وخاصة المحاصيل النقديه ( القمح , القطن , الفول , قصب السكر , الذره ...) وخاصة تلك التي نعرفها في مصر , اصبحت عبئا علي الفلاح وليست مصدرا للدخل كما كانت في الماضي , لان الميكنه الحديثه مكنت الفلاح في دول اخري ( اوروبا امريكا كندا استراليا ) من زراعة مساحات شاسعه وبأقل تكلفه ممكنه , وبذلك يخسر الفلاح المصري مع المحاصيل النقديه في مواجهة اسعار السوق العالميه , وهديك امثله علي الكلام ده

القمح ( محصول شتوي من العائلة النجيليه وتجود زراعته في الجو البارد ) بعض الدول مثل روسيا وكندا تزرعه مرتين في العام والزراعه تكون ميكانيكيه (بالسطاره مثلا- او حتي رش بالطائرات ) والري يعتمد علي المطر والحصاد يكون ميكانيكيا ايضا , بينما الفلاح المصري لا تتوفر لديه الميكنه الحديثه ولو توفرت فهي تصلح للمساحات الكبيره ( والتخين في بلدنا عنده 5 فدان ) ولو تم استخدامها في المساحات الصغيره فستكون مكلفه وبدون مردود اقتصادي كبير بالاضافه الي انها سترفع البطاله , والري يتم يدويا او بالحيوانات او ماكينات الديزل وليس بالمطر كما دول اوروبا وامريكا التي يجود فيها القمح ويحقق انتاجيه اعلي بسبب برودة الطقس وارتفاع الحراره في مصر

ولذلك اتجه الفلاح في مصر لزراعة الخضراوات والفواكه لانها تحقق من وجة نظره ربح اعلي من القمح والقطن والذرة والفول ... الخ , وان كان في الفتره الاخيره قد عاد لزراعتها بعد ارتفاع اسعارها عالميا

زيادة عدد السكان في مصر لم تؤدي فقط الي زيادة استهلاك القمح فقط (النبات) ولكن ادت ايضا لزيادة استهلاك اللحوم ( الحيوان) ولان القمح والبرسيم يزرعان في موسم واحد اصبحت المواشي تشاركنا في مساحة الارض الزراعيه في مصر ولم تعد ما تنتجه الارض خالصا للأنسان بل والحيوان يقاسمنا انتاج الارض ( انا عارف انك طول السنه صايم ومبتاكلش لحمه بس دي مش ذنبي انا برضه ) :mellow:

بعد بناء السد العالي , توقف الفيضان والذي كان يجدد خصوبة الارض الزراعيه بالطمي الذي يخلفه بعد انحساره , مما يضطر الفلاح انه يعوض هذا بالاسمده الكيماويه ( نعود لارتفاع التكلفه مره اخري) :closedeyes:

ارتفاع الجمارك وانخفاض قيمة الجنيه ادي الي ارتفاع اسعار السيارات والميكنه بشكل مبالغ فيه في مصر , يعني الفلاح بيروح الغيط ماشي علي رجليه واحيان كتيره بتكون مسافه طويله بتاخد ساعه مثلا رايح وساعه جاي , واذا كان موسر فبيبقي عنده حمار بيختصر له نص الوقت, والعمل اللي بيعمله في 3 ايام ممكن بالميكنه يعمله في نص يوم , يعني مثلا تفتكر فيه فلاح امريكي معندوش جرار ومحراث ودراسه وسيارة ؟ وانا ليا تجربه في الموضوع ده , كان عندي 17 سنه وكنت بشتغل فني صيانه في شركه وكان اخو المدير بتاعي عنده اخوه من شباب الخريجين واستلم من وزارة الزراعه 5 افدنه ومنزل في مكان بسيناء اسمه قرية التقدم , يقع تحديدا شرق مدينة الاسماعيه وعلي عمق 15 كم في مقابل النقطه رقم 6 ( اللي فيها النصب التذكاري ) وعرض عليا اني اشتغل في الارض مقابل 500 جنيه شهريا ( وعلي الرغم من اني مسلم وابن مدارس الا ان وافقت وخدت شنظة هدومي ورحت قعدت في المكان وبصراحه حبيت المكان هناك , نضفت قناة المياه الي بتروي الارض( كانت تردم باستمرار بفعل الرياح) وصلحت ماكينة المياه والراجل جاب لي 100 نخله زرعتهم , وعملت له مشتل مانجه وزرعت مساحه برسيم وشوية خضراوات وكنت بسقيهم بالرش بالخرطوم لان مفيش مياه في الصحرا تكفي الري بالغمر وجاب لي معزة ونعجه وحوالي 200 كتكوت واشتغلت في الارض زي الحمار والراجل كان متكيف مني علي الآخر وبعنا الدجاج بعد شهرين ولامور كانت ماشيه حلاوة .... ثم

حصل انه هو كان علي علاقه مع بنت في ثانوي واصلا كان متجوز مراته بمزاج عائلته وحصلت له مشاكل وطلق مراته وباع التاكسي وترك المدينه وجاب المزة (العروسه الجديده كانت اصغر مني بشهرين ) وقرر انه هيعيش هنا بعد ما مراته استولت علي الشقه وباع التاكسي عشان يدفع المؤخر ( النسوان مفيش من وراها غير الخراب ) :P واضطر انه هو يستغني عن خدماتي وخدت مكافئة نهاية الخدمه معزة صغيره ( اصلي المعزة الكبيره ولدت ) علي ايدي

المهم يا قطقط
خلال ال3 شهور دول اتعرفت عمليا علي المشاكل اللي بتواجه شاب او فلاح عاوز يستصلح ارض

1- الامكانيات ... لازم الدولة تدعم كل ما يحاول استصلاح ارض للزراعه 10 سنين علي الاقل , ( خبرات , اسمده , معدات , شتلات , بذور .... )

2- السيارة .... اكبر مشكله واجهتني هناك هي وسيلة النقل , في مرة الفلنشه بتاعة ماكينة الري اتكسرت وكان لازم انزل الاسماعليه عشان اجيب واحده بدالها لان المياه مكنتش متوفره طول الاسبوع ولازم اسقي باقي الارض ولو انتظرت لتاني يوم ممكن المياه تخلص قبل ما اصلح الماكينه , وميكروباس المحافظه بيشطب الساعه 6 مساء وانا لسه في الغيط الساعه 7 مساء وعشان انزل اسماعيه عاوز 20 جنيه اقل واجب رايح جاي في حين الفلنشه اللي نازل اغيرها بحوالي 6 جنيه , ولذلك رحت الاسماعيليه بالعجله (البسكلته) 15 كم رايح و15 كم جاي .

فيا مقدس قطقط اطمن ولاد المدارس بيشتغلوا في الارض زي اجدادهم اللي مدخلوش مدارس , ولو اقول لك متصدقش , ليا ابن خالي كان التاني علي دفعته في الكليه وهو حاليا استاذ بجامعة جنوب الوادي , جات البشارة لخالي في البيت ان ابنه اختاروه معيد في الكليه وجات الجيران تبارك وتسال علي الاستاذ عطا والاستاذ عطا داخل عليهم وهو راجع من الغيط وساحب الحمار ومحمل عليه برسيم للجاموسه .

زيادة السكان ادت لتفكك الملكيه ( يعني انا ابويا ورث عن جدي 3قراريط -525 متر مربع - يعني لو زرعناهم بانجو مش هنعرف نعيش منهم برضه ) ولعلمك لا يوجد قيراط واحد في الوادي او الدلتا صالح للزراعه وغير مزروع , ولو بتركب سيارة وبتسافر علي طرق زراعيه هتلاقي ان فيه ناس بتزرع جوانب الترع العموميه ( وهي ملكيه عامه ) طالما انها بعيده عن دورة التكريك ( مديرية الري في كل محافظه تقوم بتطهير الترع والمصارف وفق دوره زمنيه -تقريبا كل 3 سنين)

والزراعه اقتصاد غير مجدي في المساحات الصغيره يعني انا لو معايا 5000 جنيه مثلا واستثمرتهم في التجاره ممكن خلال عام واحد اجني ضعفهم ويبقيوا 15000 جنيه , لكن لو معاك 5000 جنيه ورحت استثمرتهم في الزراعه ممكن اخر السنه متجمعش راس المال لو حدثت موجة صقيع او جفاف او مرض اصاب الحقل

والدي باع ال3 قراريط ميراثه من جدي في الصعيد علي سبوبه سريعه في الخليج في اوخر السبعينات واشتري نص فدان في الاسماعيليه , ودائما الارض بنزرعها خضراوات شتاء , وذرة او فول سوداني صيفا , والخضراوت بنزرعها تحت الانفاق البلاستيكيه وكنت كل يوم في الشتاء وقبل الذهاب للمدرسه اصحو في ال5 فجرا واركض الي الحقل واقوم بكشف الغطاء البلاستيك عن الزرع لانه لو طلعت عليه الشمس وهو مغطي ومكمور بالندي سوف يحترق , واعود في الساعه 7 عشان اتناول الافطار واذهب بعد ذلك للمدرسه

مشكلة الفلاح يا قطقط

بدل الحكومه ما تساعده بمنح وقروض بدون فوائد , نجدها تحاول التربح منه من خلال ما يسمي بنك التنميه والأئتمان الزراعي

وبدل ما تكون الجمعيات التعاونيه لخدمة هل البلد كلهم بتبقي في خدمة شلة محظوظه ( جهل الفلاح له دور هنا)

كيف يصمد الفلاح

باعتماده علي تربية الدواجن والمواشي وانه دايما بيخلي مساحه صغيره جدا من الارض بيزرع فيها احتيجاته اليوميه ( فلا يشتري سوي الضرورات ) حياته البسيطه , من اكل وشرب يعني مثلا البيبسي مكناش نشربه غير في المناسبات , والملابس بسيطه ورخيصه والترويح يكون بلعب الكورة عند الجرن ومش محتاج يروح مصيف لانه غالبا ساكن امام مجري مائي , والصحه تمام بسبب الطعام الطازج والعمل الشاق الذي هو بمثابة رياضه يوميه وتلفزيون ابيض واسود نتلم عليه عشيه واحياننا من التعب ننام قبل ما نكمل المسلسل , ولم يحدث ابدا ان التلفزيون الملون والميكروييف والستلايت والنوكيا الحديث والآي بود خلوني اسعد من ايام صيد السمك في الترعه ( برضه مصدر دخل ) وحتي شوية المش والملوحه مشتاق لهم وليهم طعم مش ممكن انساه بخلاف ساندويتش الكومبو في المطعم الامريكي وصندوق بيبسي لا يساوي عود قصب ريان يابو القطاقيط

اتمني اني اكون وفيت شرح موضوع اولاد المدارس يا قطقط وعاوزك تطمن كل شبر صالح للزراعه في مصر هو مزروع وانا بكلمك من الكويت وقولك انا لما بدخل الجمعيات او محلات التسوق الكبيره دائما اجد المنتجات الزراعيه المصريه ( بصل , ارز , سكر , خضراوات وفواكه ) وهي رائجه وتجد اقبال بسبب جودتها علي الرغم من المنافسه التي تلاقيها من منتجات الاردن والسعوديه وايران والهند , بسبب ارتفاع تكلفة النقل من مصر مقارنه بالدول المذكوره , فاذا كنا احنا بنستورد قمح وفول وعدس فبنصدر ارز وفاصوليا وخضراوات وفواكه يعني الموضوع له علاقه بالتكلفه والجدوي الاقتصاديه للمحصول مش لان الناس مبلطجه وعايشه سفلقه , ولعلمك كثير من ملاك الارض الاقباط في الصعيد باعوا ارضهم واستثمروها في مشاريع تجاريه وصناعيه وعقارات بالاسكندريه والقاهره والمدن الجديده ومنهم من تعلم في كلية الطب او الهندسه ومنهم من هاجر وكل واحد ادري بمصلحته واغني دول العالم هي دول صناعيه مش زراعيه


انجازات اولاد المدارس

في عهد محمد علي كان عدد السكان في مصر 5 مليون وكذلك كانت مساحة الارض الزراعيه 5 مليون فدان (فدان لكل مواطن)

الان عددنا زاد علي ال70 مليون ولولا السد العالي الذي مكننا من استصلاح وزراعة 6 مليون فدان بالاضافه الي انه رفع المساحه الزراعيه الكليه من 5 مليون فدان الي 16 مليون فدان ( لان الارض اصبحت تزرع مرتين في السنه بدلا من مره واحده)

اقول كمان ولا كفايه كده , ماشي يا قطقط

عشان سيربيكو يحبك , مش عاوزين نزعل سيربيكو برضه

كلام حلو ، ومعلومات كويسة خالص ، أنا مش قصدى إن كل الناس تزرع ، لكن ماأراه من اولاد المدارس ( وهو ذاته نظرة الغزاة لنا ) هو إحتقار مصر الطبيعية والمنتجة لحساب إحترام مصر الكنانة الغازية التى يتوفر لها كل شىء ومن كل الأصقاع لأسباب غامضة

المدرسة بتوفر موظفين للحكومة ، وهم يعلموا أن خدمة الحكومة هو نقلة من مصر الطبيعية إلى مصر السلطوية ، مصر الطبيعية لاتعطيك شيئاً إلا أن تعمل ، لكن مصر السلطوية تعطيك بدون عمل ، ومن هنا اصبحت خدمة مصر السلطوية أشرف واعظم من خدمة مصر الطبيعية ، وسبب القبول فى خدمة مصر السلطوية هو الحصول على ثقافة الغزاة وهذه توفرها المدارس التى تفصل المصرى عن بيئته الطبيعية وقومه الطبيعيين لتنقله إلى بيئة الصحراء وحياة القتال الدائم والفتح والتسلط إلخ

الزميل فارس... اول شي شكرا على المعلومات القيمة... انا مولع بالزراعة و الثروة الحيوانية بشكل كبير... مع الاسف ليس لدي خبرة ما تذكر.. عموما لدي في مصر بعض المصالح و العلاقات الجيدة مع ناس تقدر تقول واصلين.. و اشتريت معهم بعض الشقق في القاهرة و الاسكندرية.. و بعض الاراض.. لكن لدي رغبة في مشروع زراعي بعيدا عن المدن.. لدي ي مخيلتي صور جميلة من البساتين و المناطق الزراعية في الريف المصري....
يا ترى كم سعر الفدان.. غير المستصلح في المناطق البعيدة في الارياف.. و كم فدان تحتاج في البداية لكي تجعل المشروع يمول نفسه.. و ما هي امكانيات الربحية .. في تقديرك..
ثاني شيء.. الخراف المصرية.. ما هي جودة لحومها .. و ما هي شروط التصدير..
..
:98:

موضوع ممتع.

أنا معلوماتى الزراعية تحت الصفر وحتى البقين الحمضانين بتوع أنواع الرى كالرى بالغمر ورى الحياض كنت حافظهم مش فاهمهم ولغاية يومناهذا لاأعرف ما الذى تفعله الساقية أو الشادوف وما الحكمة من ربط بقرة بها وجعلها تدور!! أنا فاهم إن البقرة مصدر بدائى للحصول على الطاقة اللازمة لتدوير الساقية لكن لماذا هو شئ جيد أن تدور الساقية من أساسه! وفى أشياء كثيرة بالزراعة أسمع عنها ولا أفهمها مثل الصرف المغطى!

بالفعل وكما ذكرت تفتيت الملكية هو عقبة كؤود فى وجه تطوير الزراعة بمصر وبالذات فى موضوع الرى حيث أن مواردنا المائية محدودة ولها سقف وتكنولوجيا الرى الحديث بالرغم من إنها توفر كميات هائلة من المياه إلا أنه نظرا للتكلفة المرتفعة فى حالة الحيازات الصغيرة فمازال الرى بدائيا فى معظمه!

Array
موضوع ممتع.

أنا معلوماتى الزراعية تحت الصفر وحتى البقين الحمضانين بتوع أنواع الرى كالرى بالغمر ورى الحياض كنت حافظهم مش فاهمهم ولغاية يومناهذا لاأعرف ما الذى تفعله الساقية أو الشادوف وما الحكمة من ربط بقرة بها وجعلها تدور!! أنا فاهم إن البقرة مصدر بدائى للحصول على الطاقة اللازمة لتدوير الساقية لكن لماذا هو شئ جيد أن تدور الساقية من أساسه! وفى أشياء كثيرة بالزراعة أسمع عنها ولا أفهمها مثل الصرف المغطى!
[/quote]


ايوه كده يا اخى ادينى الفرصه افتى عليك فى حاجه متعرفش عنها اى حاجه :D

الساقيه يا سيدى بتدور كى ترفع المياه من البئر اسفلها الى المجرى المائى الذى يشق الارض الزراعيه ليرويها , فلو لاحظت الساقيه جيدا ستجد ان لها تجويفات عميقه , وعند دورانها فان تلك التجويفات تنزل الى عمق البئر لتمتلىء بالمياه , ومع استكمال دوره الساقيه فهى ترتفع الى اعلى لتنزل تجويفات اخرى مكانها , واللتى ترتفع للاعلى تقوم بصب الماء فى المجرى المائى قبل ان تهبط مره اخرى الى قاع البئر وهكذا ....

اما بالنسبه للصرف المغطى فهو عباره عن مواسير من نوعيه معينه وباقطار مختلفه يتم دفنها على عمق مترين او ثلاثه فى الارض , وبين كل خط مواسير والاخر مسافه مابين 10 الى 15 متر , وتلك المواسير فائدتها امتصاص مياه الرى من الارض ونقلها الى المصارف الزراعيه الكبرى , وتلك العمليه فائدتها الاساسيه غسيل الارض من بقايا الاسمده ومخلفاتها والاملاح اللتى تترسب فيها , مما يعود بالفائده على المزارع من جراء زياده المحصول , حيث ان عمليه الغسيل تلك تقوم بانعاش الارض , وتلاحظ الفرق بين الاراضى اللتى تتمتع بصرف مغطى والاراضى اللتى لا تحظى به , فتجد ان الارض اللتى لا تتمتع بالصرف المغطى نباتها اصفر ودبلان والعود لا يحمل من الثمار الا القليل , بعكس الارض اللتى تتمتع بالصرف المغطى تجد العكس تماما .

يعنى احنا فى الاصل فلاحين برضو ولدينا الخبره الكافيه فى هذا المجال , فقد كنت اقضى الاجازه الصيفيه كلها وانا طفل فى قريتنا بالدقهليه .

ولو عاوز تتعلم البقره او الجاموسه بتتحلب ازاى انا ممكن اقولك :lol:

Arrayالساقيه يا سيدى بتدور كى ترفع المياه من البئر اسفلها [/quote]

ماهو البئر ده هو سبب مشكلتى فى عدم فهم الساقية?
لماذا يوجد بئر من أساسه?هو مش فى زفت نيل وترع ياخدوا منها مية! ماهى الحاجة لبئر بجانب النيل?
البئر ده فى الصحراء والفيافى إنما ما الحاجة لبئر بجوار النيل?


Arrayاما بالنسبه للصرف المغطى فهو عباره عن مواسير من نوعيه معينه وباقطار مختلفه يتم دفنها على عمق مترين او ثلاثه فى الارض , وبين كل خط مواسير والاخر مسافه مابين 10 الى 15 متر , وتلك المواسير فائدتها امتصاص مياه الرى من الارض ونقلها الى المصارف الزراعيه الكبرى , وتلك العمليه فائدتها الاساسيه غسيل الارض من بقايا الاسمده ومخلفاتها والاملاح اللتى تترسب فيها , مما يعود بالفائده على المزارع من جراء زياده المحصول , حيث ان عمليه الغسيل تلك تقوم بانعاش الارض , وتلاحظ الفرق بين الاراضى اللتى تتمتع بصرف مغطى والاراضى اللتى لا تحظى به , فتجد ان الارض اللتى لا تتمتع بالصرف المغطى نباتها اصفر ودبلان والعود لا يحمل من الثمار الا القليل , بعكس الارض اللتى تتمتع بالصرف المغطى تجد العكس تماما .[/quote]

أنا برضه خمنت كده بس لم أكن متأكدا من الإجابة.

وتلك المواسير كيف ستمتص المياه? الضغط الأسموزى ليس فى صالحها ولو بها فتحات ستسد من الطين?

Array
ماهو البئر ده هو سبب مشكلتى فى عدم فهم الساقية?
لماذا يوجد بئر من أساسه?هو مش فى زفت نيل وترع ياخدوا منها مية! ماهى الحاجة لبئر بجانب النيل?
البئر ده فى الصحراء والفيافى إنما ما الحاجة لبئر بجوار النيل?
أنا برضه خمنت كده بس لم أكن متأكدا من الإجابة.

وتلك المواسير كيف ستمتص المياه? الضغط الأسموزى ليس فى صالحها ولو بها فتحات ستسد من الطين?
[/quote]


اقعد علي جنب يا عاشق كسفتني وعاملي فيها فلاح

نظرية عمل الساقيه

هناك نوعين من السواقي

ساقية القادوس , وساقية الطنبوشه

ساقية القادوس قديمه جدا وتعتبر من الآثار لو وجدت واحده منها وهي تشبه عجلة الحنطور وعلي اطارها الخارجي تجاويف مائله وتعمل عن طريق اعتراض الماء الجاري حيث ان لها ليش عريضه يصطدم بها الماء الجاري مما يؤدي الي دوران الساقيه وتمتلئ القواديس (التجاويف المائله للداخل في الاطار ) وترتفع بدوران الساقيه لتصب في لسان صخري يستقبل المياه من الساقيه .


سواقي القادوس بالفيوم


ساقية الطنبوشه , وهي النوع الرائج في الريف المصري وهي تصنع من الحديد الصاج وليس الخشب مثل ساقية القادوس وهي عباره عن اسطوانه قطرها 60سم وطولها 40 سم وتخرج منها ازرع حلزونيه تنتهي بفتحات كبيره لغرف الماء ويوجد في منتصف الاسطوانه محور مرتبط بعجله مسننه حول الاسطوانه , هذا هو الجزء الرئيسي في الساقيه الطنبوشه والجزء الثاني هو العمود الدوار وهو عمود من الحديد ينتهي من اعلي بكوه مفرغه وبه من اسفل عجله مسننه (ترس) تكون افقيه علي محور العمود وعند دوران العمود تدور العجله المسننه الأفقيه بأسفله فتدور معها العجله المسننه الرأسيه الموجوده علي محور الساقيه , اما كيف يدور العمود , فيدور عن طريق , فرع من الخشب يوضع طرفه في الكوه المفرغه اعلي العمود والطرف الآخر علي رقبه الحيوان وعندما يمشي الحيوان فأنه يحرك العمود حول محوره ولا يستطيع الحيوان سوي الدوران حول العمود بسبب قطعة الخشب المربوط فيها , وبالتالي تصبح حركة الحيوان هي حركه دائريه فقط حول الساقيه الغرض منها هو دوران العمود , ومع دوران العمود تدور العجله المسننه حول محوره والتي تتحول حركتها الأفقيه الي حركه رأسيه بفعل تداخلها مع العجله المسننه حول محور الساقيه وبذلك تدور الساقيه .

اما عن البئر فهو خندق مستطيل الشكل يوافق حجمه حجم الساقيه ويتصل بالمجري المائي ( غالبا ترعه) عن طريق نفق صغير او ماسوره ويكون مستوي الماء في البئر هو نفس مستوي الماء في الترعه ( فالبئر هنا هو مأخذ ماء من المجري المائي مبني بالطوب الاحمر غالبا والأسمنت وتركب عليه الساقيه ويثبت فوقها محورها , واخيرا يعتمد طول الأزرع الحلزونيه الغارفه للماء علي منسوب المياه في الترعه فكلما ارتفع مستوي الارض وغيض الماء كلما كانت الساقيه (الطنبوشه ) ذات قطر اكبر

اسم البئر هنا هو اسم مجازي وهو ليس بئر جوفي بالمعني المفهوم للبئر ولكن هو بالأساس بناء مدفون تركب فوقه الساقيه



لم اجد علي الانترنت صورة حقيقيه للساقيه ( الطنبوشه) ووجدت فقط هذه الصوره التقريبيه وهي توضح الازرع الحلزونيه الغارفه للماء

اما عن الصرف الزراعي

فمنذ ايام الفراعنه والفلاح المصري يعرف الصرف (صرف المياه الزائده عن حاجة الحقل ) ويعرف فوائده وكان يستخدمه , وهو الصرف المفتوح وهو عباره عن قناه اعمق من قناة الري تكون موجوده في نهاية ارض الفلاح وفيها تنصرف المايه الزائده عن حاجة الحقل هذه القنوات بدورها تصرف في المصرف العمومي او ما يسمي بالصرف المفتوح , وهو له العديد من العيوب فدائما منسوب المصرف يكون اقل من منسوب الترع وهناك تصبح المياه راكده وآسنه وتتحول الي مستنقعات تخرج الروائح الكريهه وتسكنها مستعمرات البعوض والقوارض وتتحول الي بؤره تنشر الأمراض في المنطقه كما انها تأخذ مساحه كبيره من الأرض , وحديثا ظهر الصرف المغطي وهو يقوم بنفس دور الصرف المفتوح ولكن بدون عيوبه وهو عباره عن خطين من المواسير متجاورين احدهما اعلي من الآخر لكن ليس فوقه تماما والخط العلوي تكون المواسير فيه مجهزه لاستقبال الماء بداخلها عن طريق ثقوب كبيره في النصف الأعلي من الماسوره ومغطاه بكذا طبقه من شباك بلاستيكيه تشبه الشاش الطبي وتمنع انسداد او دخول الرمل او الطين الي داخل الماسوره , تسمح فقط بتسرب الماء , وهي تشبه الماسوره الحربي ( اعمق ماسوره في الطلمبات التي تستخدم لسحب المياه الجوفيه ) وكل مسافة250 متر توجد غرفة تجميع ومن خلالها تنتقل المياه الي ماسورة الصرف الرئيسيه وهذه بدورها تنقلها الي وحدة معالجه تمهيدا لأعادة استخدامها مرة اخري , وجدير بالذكر ان جميع الاراضي الزراعيه من مدينة الاسماعيليه وحتي فايد 37كم جنوبها تستخدم الصرف المغطي وتم انجاز هذا المشروع في الفتره من 94--97 من خلال المعونه الأمريكيه

جامد الموضوع يا فارس

طرق الري الحديثه توفر كميات كبيره من الماء ولكنها تتطلب مساحات شاسعه حتي تكون مجديه وحكاية انك تدي شاب لسه متخرج 5 فدان وتقول له ازرعهم وهو مفيش معاه حق علبة سجاير ده كلام فاضي برضه , يمكن الشئ الكويس اللي عملته الحكومه هو استحداث سلاح في القوات المسلحه اسمه الفوج الزراعي وانا شفت مناطق كتيره مستصلحه من خلال الجيش , والحكومه مينفعش تستصلح بنفسها لأن أي مشروع يدار من قبل شركه حكوميه ايدك منه والقبر , وده عن تجربه يعرفها كل اهل الاسماعليه والشرقيه وهو مشروع الصالحيه الجديده ووادي الملاك واللي قامت بتنفيذه شركة المقاولين العرب في حياة المهندس عثمان احمد عثمان واللي كان بيتابعه بنفسه وحقق تحت ادارة المقاولين العرب نجاح باهر وبعد كده استلمته الحكومه وبالعافيه ممشي نفسه دلوقتي , والقطاع الخاص يبحث عن الاستثمار المضمون واللي يحقق اعلي ربحيه بأقل تكلفه , والحل من وجهة نظري المتواضعه كان وما زال ربط استصلاح الاراضي مع تراخيص وعطاءات المشاريع الضخمه يعني مثلا رخصة المحمول تمنح مع اشتراط استصلاح 100000 فدان مثلا , وكان يجب ان يتم ذلك اثناء عملية الخصخصه واعتقد ان الحكومه تستطيع تنفيذ هذا المشروع , وهو اجبار القطاع الخاص علي الاستثمار في الزراعه اذا اراد الحصول علي مشروعات كبيره كالأتصالات والحديد والصلب والاسمنت وغيرها من المشروعات التي تدر الملايين , يعني ايه المشكله لما ناس مثل احمد عز ونجيب ساويرس وطلعت مصطفي وغيرهم من الحيتان اللي في البلد لما كل واحد منهم يستثمر 4 او 5 مليار في الزراعه ومش هيخسر ولا حاجه وان كان المكسب هيتأخر شويه ,كمان تخفيض الجمارك علي المعدات الزراعيه او حتي الغائها لتشجيع الاستثمار في قطاع الزراعه هيشجع ناس كتير .

بصراحه يا قرامطي انا بره مصر بقالي 4 اعوام ونصف ومعرفش الاسعار دلوقتي بقت ايه وانا مكنتش متابعها وانا في مصر اصلا لان مكنش في دماغي مشروع زراعي معين ولكن اقدر اقول لك ان ثمن الارض بيتوقف علي عوامل كتيره منها خصوبتها وقربها من مصادر المياه وطريقة الري سواء ري بالشغل ولا ري بالراحه وعن الاراضي المستصلحه دي في مناطق بعيده واحسن لك تشوف مكتب عقاري ممكن يساعدك والموضوع مش انك بتحب الخضره والزرع , الموضوع انك تكون بتفهم في الزراعه واوعدك لما انزل الكويت اسألك في الموضوع ده لأني كنت بشوف اعلانات تقريبا في جريدة الوسيط عن اراضي جديده مستصلحه وكاملة المرافق وقطع مختلفه للبيع في مصر بس مكنتش بهتم بالتفاصيل بتاعة الاعلان .

لكن سعر الفدان غير المستصلح في الاراضي الجديده يتراوح من 2000 الي 3000 دولار , وحتي يصبح المشروع مربح تحتاج اقل شي 15 فدان وتجيب لك جرار زراعي مع محراث ومقطوره وتقدر تقسم الارض بحسب نوعية المشاريع اللي هتعملها عليها , يعني ممكن تعمل عليها مزرعة دواجن صغيره ومزرعة مواشي اصغر وكذا برج حمام ومنحل عسل وتحوطها بنخل , ولأني اسمعلاوي فاكتر حاجه بفهم فيها هي المانجه وانصحك تزرع سكري ممتاز وسكري ابيض

لو انت هتبدأ ممكن تبدأ ب5 فدان ويلزمك شي 6 سنوات علي الاقل قبل المشروع ما يديك ربح معقول ولازم تكون انت بنفسك اللي بتزرع , يعني ممكن تجيب حد يساعدك لو عندك شغل كتير بس مينفعش تسلم الارض لحد غريب مش هينجز معاك وهيبقي مثل الموظف

شكرا يا طنطاوي(f)

في البلد الذي انا فيه الان ازرع حوض صغير امام المنزل مساحته متر في 2 متر ...ورود فقط... تجربة فاشلة لان اتضح حتي ابسط العوامل تؤثر علي الورد.
انا كنت بفكر اشتري قطعة ارض في الكنج في اسكندرية وابنيها بيت علي الطراز الشامي بمعني نافورة في المنتصف وفسيفساء تكسو الحوائط وازرعها اشجار جميلة وورود فقط ، لكن بصراحة مجموعة كبيرة من العوامل تجعلني ارفض رمي مليم احمر داخل مصر .

التوقيع
طنطاوي الندل