كان فيه مظاهرة برضو على الكورنيش الساعة الخامسة مساءا عبارة عن شتايم احتجاج مش مسيرة احتجاج قريبة من مبنى الاذاعة والتليفزيون والمسيرة ماشاء الله بنات على ولاد ومحدش شايف حد وشىء مخزى وممكن تلاقى شاب شايل بنت وهو مش فاهم حاجة بس بيردد الكورس الغنائى مش هنسلم مش هنطاطى ابعد عننا يا حسنى يا واطى .. او ياريس ياجزمة يالى ملكش لازمه وهذا ايحاءا من جزمة البنت اللى شايلها !! ولكن انا غير موافق على هذه التصرفات الهمجية فالانتخابات على الأبواب ولم نجد من يتظاهر إلا حركة كفاية بنسخها المتعددة التى لها تمويل داخلى غرضه اسقاط الحكم ومن ثم نهب مصر من جديد .

المتظاهرين عمالين يشتموا ويكسروا ويعاكسوا فى بنات وبعدين لو بصيتى فى الصور هتلاقى واحد بيتخانق واتنين ماسكينه من ودانه زى ما يكون بيقول سيبونى على قوات الامن او هاتولى الريس ولو راجل ياريس انزل لى !! وعامل فيها عنتر شايل سيفه ولازم طبعا يتلزق على قفاه والكلام ده مينفعش هو مفيش عندنا وسط ؟ حتى الاسلام يحرم اعمال الشغب ، ليه ميبقاش فيه تظاهرات منطقية بالعقل زى ما بنشوف فى اوربا والدول المتقدمة تبقى مسيرات احتجاجية مش تظاهرات وشتايم وقولو للريس من عابدين حكمك زفت وزى الطين ما هو لازم بعد هذا الكلام يتم سحلهم مثل الذباب .. وبعدين توريث إيه ياجدعان الراجل من الحزب الوطنى ومن حقه الاشتراك حسب القانون بل وحتى حسب المنطق وامامه تلاته او اربعة اقوياء وهو من حقه يجرب مش هيخسر حاجة امال عايزينه يقعد فى البيت زى الحريم الراجل من حقه يلعب لعبة الزعيم زى ما غيره بيلعب على أوتار عواطفنا ، ولو ده رأى حركة نسكافية فأكيد باقى الشعب لهم رأى آخر .. بنطالب بالديمقراطية وليس عندنا ديمقراطية ..

بصراحة لو الحكومة ضايعة قيراط فالشعب ضايع 24 والوعى منعدم والناس نظرها قصير وموتورة وكلما تطلع موجة جديدة يركبوها بلا ادنى تفكير او تحمل مسؤولية ، ويضحكون على البسطاء بكلام رنان عاطفى لينقلبوا راسا على عقب واخر الافتكاسات واحد طالع على فضائية بيقول انا ليا مليون جنية سنويا من الحكومة يدونى المليون جنية ومش عايز منهم اى خدمات انا رغيف العيش هستوردوا من الخارج وهودى ولادى يتعلموا فى الخارج ونسى المسكين الضرائب والمعاشات والداخل والخارج اللى لو راح يطالب بيه فى المحكمة مش هيطلع له ربع جنيه دا اذا طلعله حاجة .