الكمسرى/ الف مسكن حد نازل --تذاكر اللى ما دفعشى يدفع --انتى يا هانم الاجره --الهانم/ حاضر يا خويا --تميل على اخر والنبى تمسك العيل على ما اطلع له الفلوس --راكب / بس كده تحت امرك يا قمر --راكب لاخر/ البلد اليومين دول هايجه خالص وفى حراك سياسى خطير--الاخر/ الديمقراطيه يا سيدى --راكب واقف بسخريه/ ديمقراطيه ايه ده كله تمثيل --الكمسرى --/تذاكر اللى ما دفعش يدفع --يصعد بائع/ بيبس حاجه ساقعه --طفل لامه/ عايز بيبس يا ماما --الام باستسلام/ هات واحده لعيد --البائع/ عنيه لعيد وام عيد --فى اخر الاتوبيس اثنان/الانسه/ لازم تخلص الشقه يا مدحت وتسمع كلام ماما --مدحت/ يعنى اعمل ايه --الانسه/ اتصرفمدحت/ هو انا هتجوزك ولا هتجوز امك --سعاد/ اوه انت مشفاهم حاجه --راكب لاخر/ انا حاسس ان البرادعى هينجح اصله عامل شغل كويس --الاخر/ احنا عايزين ايه نفسنا فى التغيير --راكب واقف / موت يا حمار --على يسار الاتوبيس / الولد/ بطنى بتوجعنى قوى يا ماما الام/ هانت يا اسامه منه لله ابوك اللى سايبنى اتبهدل فى الزحمه دى --الكمسرى/ عتبه حد نازل امراه بدينه تصعد الاتوبيس /وسعو كده يا ساتر --راكب/ راحه فين انتى مش شايفه الاتوبيس زحمه والدنيا حر--البدينه/ انت مالك يا بارد--الجميع يضحكون--راكب اخر / حد يقعدها ايه انتم ما عندكوش دم --راكب جالس/ تعالى مكانى يا ستى منه لله --على يمين الاتوبيس/اجمل شىء فى الحب المعاناه عارفه يا نوال الحب ده شىء جميل --نوال/ ما نت مشعايز تركب تاكس عصام/ تاكس اعوز بالله التاكس ده للمرفهين لازم نبدا الطريق من اوله يا حياتى هو الحب كده --نوال/ انت شايف كده عصام/ طبعا -----الام/ مالك يا حبيبى--اسامع الطفل/ بطنى بتوجعنى قوى يا ماما الام/ خلاص يا اسامه هانت --راكب/ العمليه دى اخرها مش هيحصل طيب الاخر/ لا انا شايف طالما لغو رقابه القضاء على الانتخابات يبقى التزوير هيبقى اساسى --راكب/ انا حاسس انها هتبقى انتخابات نزيهه--السائق /نزيهه دى تبقى والدتى الجميع يضحكون --فى اخر الاتوبيس/ اتصرف يا مدحت انت وعدتنى تخلص الشقه قريب/مدحت/ يعنى اسرق عشان ارضى والدتك --سعاد/انا ما قلتش تسرق --مدحت/ انا مشحرامى ولا نصاب انا على قدى سعاد تنهار/ انت ليه بتتعمد تجرحنى اتصرف مليش دعوه --الكمسرى/ حد نازل حلوان الام/ لو سمحتى يا بنى لما تيجى حلوان ابقى قولى الكمسرى/ حاضر يا مدام--رجل يصرخ / انا اتسرقت حرام عليكم يا عالم ده مرتب الشهر وعليه ديون --منقبه لاخرى/ ده باين عليه موظف غلبان الاخرى/ يعنى ايه ونعمل ايه فى امك العيانه اللى عايزه لها علاج بالف جنيه نجيب لها منين --الرجل/ يا عالم حرام عليكم --السواق من بعيد/ كل واحد يخلى باله من نفسه مالناش دعوه لو حد اتسرق ----عصام/ شايفه يا نوال منتهى المعاناه --الحب عايز كده معاناه والتحام بالواقع نوال/ يا سلام --عصام/ الالم والعذاب والكفاح فى المواصلات اهم مقومات نجاح الحب نوال/ بجد انا اول مره اعرف كده ---عصام/ انا بحبك يا نوال --نوال/ بس المره الجايه نركب تاكس عصام/ انشاء الله --الكمسرى/ حلوان حد نازل الام/ يلى يا اسامه وصلنا يا حبيبى منه لله ابوك --اسامه/ اه يا بطنى بتوجعنى قوى الام/ الدكتور على اول الشارع معلشى يا حبيبى --المراه البدينه--/ وسع لو سمحت نازله اخر/ وسع للبلدوزر الجميع يضحكون --فتاه جميله/ لو سمحت ممكن اقعد راكب/ ممكن تجلس راكب/ القمر منين الفتاه/ ليه بمناسبه ايه --راكب اخر / ما قلتلك انت مالك يا سمج --انت ما عندكشى اخوات بنات --شوف يا سعد الانتخابات دى مسرحيه على الشعب --سعد/ بس لازم ننتخب حد يا مجاهد بيه مجاهد/ انا عارف بس بعرفك انه كدب راكب واقف/ حريه ايه والبطاطس ب4ج والسكر غالى والعيشه كلها طين --راكب/ يا اخى خلى عندك امل --بائع يدخل فوانيس--طفل لامه/ عايز فانوس بيغنى وحوى يا وحوى --الام/ هات واحد يا عم البائع/ حاضر الطفل/ بيغنى يا ماما شوفى الام/ مبسوط يا عبده الطفل/ يتنطط وفرحان الام/ خلى بالك يا عبده اوعى تكسره --الكمسرى--المحطه الجايه الاخيره --الفتاه الجميله /ممكن اعدى راكب/ تسمحى اوصلك انا ساكن جارك --الفتاه/ شكرا --الام/ يلى يا عبده هننزل الطفل/ الفانوس بيغنى شوفى يتنطط --راكب لاخر/ الا ايه اصل كلمه وحوى يا وحوى دى الاخر/ باينها كلمه فرعونيه --الجميع ينزلون من الاتوبيس مدحت/ راحه فين يا سعاد سعاد/ ماشيه لما تجهز الشقه ابقى تعالى --عصام/ اخيرا يا نوال وصلنا هو ده الحب قمه الحب المعاناه نوال/ انت وعدتنى المره الجايه نركب تاكسى عصام/ طبعا الجميع ينزلون الاتوبيس خالى --الكمسرى يضع قلما فى اذنه وينادى الف مسكن عتبه ----ستار ---