كل مرة آجي اكتب الموضوع ده, ألاقي نفسي أوتوماتيكيا قافل الصفحة .. ماعرفش ليه

المهم النهاردة قررت إني اتحلى ببعض الشجاعة والتصميم

الموضوع ده ح يكون بخصوص الكتب والروايات اللي الزملاء قروها أو بيقروها دلوقتي

قد يكون الموضوع اشبه بنادي للقراءة, ولكنه ليس لمناقشة الكتب

ساعات الواحد منا بيروح للمكتبة بس يحتار بالكتب اللي يشوفها هناك, وطبعا مش هيقدر إنه يتصفحها كلها او يحكم عليها بإسم الكاتب أو بمجرد قرائته للملخص الموجود بالغلاف الخلفي

وساعات تانية (ودي بتحصل معايا احيانا) إن الواحد بيتصفح الكتاب على عجالة ويعجبه ويشتريه, لكنه لما يبدا يقراه بعدين يلاقي نفسه مش منسجم .. او بالأحرى خد بمبة كبيرة بالكتاب

عشان كده لما أنا (أو اي شخص تاني من الزملاء) آجي واكتب ملخص بسيط عن كتاب قريته وعجبني, ساعتها ممكن يكون في شخص تاني يستهويه الكتاب ده, فيروح ويشتريه ويقراه

طبعا فيه شروط (بس مش تعجيزية) للمشاركة هنا:
---------------------------------------------------

1) مش مهم نوعية الكتاب او الرواية .. حتى لو كنت تستسخف أو تتكسف إنك تعلن قراءتك ليها, إنشالله حتى لو كنت عاوز تكتب عن قصص المغامرون الخمسة (تختخ ونوسة ولوزة وعاطف ومحب)


2) الفشخرة ممنوعة منعا باتا, الموضوع ده مش معمول عشان الواحد يتباهى إنه قرأ كتاب مقدمة إبن خلدون أو مؤخرة المعري او حتى صدر نوال السعداوي!

3) ممكن الواحد منكم يكتب إسم الكتاب والمؤلف, ونبذة بسيطة عن ماهية المحتوى, وإن كان عجبه الكتاب من عدمه, وإن كان بينصح البقية بقراءته ... مجرد اسطر بسيطة وبلغة بسيطة, مش ييجي ويعمل لي فيها قص ولصق! (والله العظيم م اقصدش حد معين)


طبعا ممكن الزملاء يضيفوا قوانين تانية ....