كلمة وائل غنيم فى صفحة كلنا خالد سعيد قبل الثورة



===============

معرفش ايه اللي هيحصل النهاردة .. ومعرفش ممكن أكون فين بكره بالليل .. في بيتنا .. معتصم في الشارع .. مقبوض علي في السجن .. مدفون في القبر .. بس اللي أعرفه إني نازل لأن حقي وحق اب...ني لازم آخده من كل واحد أهان كرامة كل مصري في البلد دي .. لأن بلدنا مش تكية تتقسم على كام ألف واحد واحنا بنتفرج .. لأني مصري ومن حقي غاز بلدنا ميتصدرش لإسرائيل .. لأني صحيح بانام شبعان بس عارف كويس إن فيه 30 مليون مصري بيناموا وهما بيحلموا بأي أكل ياكلوه..



أنا نازل لأن البلد دي بلدي وأنا مش مجرد صفر على الشمال تحدد مصيره حكومة أو أمن دولة أو داخلية .. أنا مواطن مصري .. عارفين مصر؟ مصر اللي حاربت إسرائيل وهزمتهم في 1973 .. مصر اللي اتحدت إنجلترا .. وطردت الفرنسيين .. مصر اللي مفيش أي محتل عرف ينتصر عليها ويمسح هوية شعبها. أنا نازل لأني مش معاكم إن شعب مصر جبان .. شعب مصر مش جبان .. شعب مصر كل واحد فيه خايف إنه لو اتحرك هيتحرك لوحده ومحدش هيساعده .. لو محتاجين تضحيات والله أنا مستعد أضحي بكل ما أملك عشان بلدي.



من بداية ما عملت الصفحة وكان سبب إخفائي لشخصيتي حاجتين: سبب أمني بحت وهو إن الأمن ميقدرش يقفل الصفحة .. والسبب التاني وهو المهم إني في النهاية مش عايز منكم أي حاجة .. لكل اللي بيشككوا في نيتي .. أقسم بالله العظيم أنا معنديش هدف غير إن بلدي تتغير .. مش عايز أي حاجة منكم لا عايز شكر ولا ثناء .. ولا عايز منصب ولا عايز مكافأة وحتى لو نجحنا وحققنا مستحيل أعرف أي حد شخصيتي لأن نفسي يكون عندنا في حياتنا حلم جميل.. قصة ليها نهاية سعيدة .. أنا مكافئتي الوحيدة هي إن واحد ميعرفنيش ولا أعرفه .. وعمري ما شفته يدعيلي ويقول: ربنا يباركلك .. بس ده هدفي الوحيد.



أنا قصرت في حق ناس كتير في الصفحة من غير ما أقصد .. أرجوكم محدش يزعل مني لأن والله العظيم أنا نيتي صافية وباعمل كل حاجة كان بيمليها علي ضميري .. صدقوني أنا مكتبتش هنا أي خبر أو نشرت صورة أو فيديو إلا لو كنت مقتنع تماما إنه حقيقي .. وعمري ما كتبت كلام عشان أخدعكم .. أنا كتبت هنا بقلبي مش بقلمي .. كل حرف اتكتب هنا كان وراه ضمير بيراقب وعقل بيفكر وقلب بيحكم.



كلكم عندي إخواتي .. حتى اللي دلوقتي شايفين إني عميل وخاين ومتمول .. لأنهم للأسف دماغهم اتغسلت .. ومش دول أعدائي. أعدائي الحقيقيين اللي مسكوا البلد واعتبروها تكية لمدة 30 سنة .. بيسرقوا في كل شبر فيها وبيعتبروا أي حاجة تتعمل مكرمة للشعب .. اللي هو المفروض صاحب القرار .. وبيستغلوا حالة الفقر والجوع ونقص التعليم في إنهم يستغلوا شباب في الهجوم على أي صوت يعترض عليهم. بس صدقوني نهايتهم قربت.



أرجوكم تسامحوني كلكم لو حصل لي حاجة بكره. وأرجوكم كلكم تنزلوا لأن مصر مش هتتغير طول ما احنا بنهتف على الفيسبوك.



ربنا يوفقنا كلنا



قال تعالى: وما أسألكم عليه من أجر إن أجري إلا على الله



في مفاجاءة من العيار الثقيل قامت ناشطة سياسية من الاسكندرية ببث رسالة عبر الانترنت الي وائل غنيم مؤكدة انها من ضمن المشاركين في ثورة 25يناير بالاسكندية مؤكدة فيها بانه ليس ادمين جروب خالد سعيد والذي انطلقت منه شرارة البدء للقيام بمظاهرات تحرير مصر من الفساد واسقاط نظام الرئيس مبارك حيث افردت الثائرة المصرية العبارات التاليه

1- احنا شباب الاسكندرية بقالنا 20 يوم في الشارع وبشهادة الشهود الي تعرف وشي كويس فين وائل غنيم ما بينا ؟



2- ادمين خالد سعيد من الاسكندرية وقد وضحنا قبل كدا مكانه في فيديو يوم مكنت متخانق معاه وكان كل يوم والتاني في بيت خالد سعيد وعد والدته وبيوافينا بالاخبار لكن ده طلع في القاهرة ازاي بقى والادمين كان بيحلف انه دايما عند والدة خالد سعيد وبيجيب منها الاخبار والصور وفي الاخر طلع في القاهرة رفم ان عملية تتبع الصفحة في وقتها اثبتت ان الادمين في الاسكندرية يبقى مين انت يا وائل؟

3- لو هو ادمين خالد سعيد فعلا اين المراسلات الي تمت ما بينه وبين العقيد عمر عفيفي؟


4 - لو انت ادمين خالد سعيد فين المراسلات الي بينك وبيني ؟


5- اشمعنا اليوم الي ظهر فيه وائل غنيم على الشاشة قال الاميل الي اسمه الشهيد اتعطل ومبيفتحش؟


الا لو مكنش معاك الباسوورد اصلا؟



6- لما قال انه تاخد في امن الدولة طب حلو اوي احب اقولك نظام المراقبة والولوج لمباحث الانترنت وامن الدولة اسقطناه من 36 يوم ولا يوجد اي نظام مراقبة عالفيس يعني عرفو بيتك منين؟ وعرفو شخصك منين؟ واشمعنا انت بس الي اتقبض عليك وسابو الي جنبك؟

7- انت قلت اعدت 12 يوم في امن الدولة يا سلام عالفطنة 12 يوم بدون ولا الم ولا لطشة ولا جرح ولا اي ضربة باينة؟



من امتى امن الدولة هيسيب شخص خلى 80 مليون يصحو؟ حط نفسك مكانهم وبلاش تمثيل



بدلالة السيد بلال اللي لسه مقتول منهم وخالد سعيد الله يرحمه الي اتقتل منهم ومن اتباعهم عايز تفهمني انهم سابوك كدا وبصحتك؟ احنا مش حمير ولا اغبيا حضرتك؟



8 - قبل خطاب مبارك بساعات راح خاطب الناس عالتلفزيون وقالهم ارجعو بيوتكم من التحرير بما تفسر سيادتك منك ليه.؟



الا لو كان مخطط من امن الدولة وانت بتنفذه للتهدئة وخدمة النظام الفاسد؟



9 - انت قولت ان في التحقيق كانو مغميين عنيك يا حبة عيني طب جميل



ومن لسانك على صفحتك قولت كان نفسي تشوفو الظباط وانا مروح حضنوني وباسوني والدمعة في عنيهم



طب ازاي شفت الدمعة في عنيهم وطيبة قلبهم وانت اصلى عنيك متغمية وازاي شفت وشوفتهم يا اخ وائل ؟



10 - ادمين خالد سعيد الاصلي عمره ما قال نكتة ولا هرج عالصفحة تحت اي ظرف وقال انا ساخرج من اي سياسة واي نشاط سياسي بعد منجيب حقنا ومش هشهر نفسي ولا هقول مين انا والقى قسم بالله انه مش هيعملها



لكن وائل اول مطلع مع منى الشاذلي قالها وكانه حافظ الي هيقوله بما تفسر سيادتك؟



11 - على اي اساس كل يوم تظهر في قناة وتلقي تصريحات الكل رافضها وبتايد البرادعي ولو لاحظتو ان ادمين خالد سعيد الاصلي قالها بلسانه يف صفحته انا لا اؤيد البرادعي انا عايز نظام حر ونزيه وازاي انت يا وائل امبارح بتايد البرادعي؟



12 - على اي اساس تطلع وتتكلم باسم شباب الثورة انت والي معاك؟ مين انت اصلا عشان تتكلم باسمهم واسم ايل استشهدو؟ وباي حق ومين صرحلك ؟ومين شوية العيال اللى معاك اصلا الي محدش شافها اصلا في مظاهرة؟



13 - يا ترى ياه هو مخطط امن الدولة الي ناوييله انت وهم وعشان ايه تبيع نفسك كدا ولا انت اصلا رخيص.؟



14- وده اهم سؤال ادمين خالد سعيد الاصلي الي تعب وطلع عينه وياما كافح راح فين ومين اعتقله ومصيره ايه ده لو كان عايش اصلا دلوقتي؟



15 - على اي اساس البدراوي ياخدك في عربيته اول متخرج ووزير الداخلية يكلمك بنفسه رغم ان في اكتر من شخص اعتقلو واكتر منك نشاطا ومحدش جاملهم ولا كلمهم ايه المخطط بالظبط يا وائل ورد احسنلك والا هتلاقي عواقب وخيمة ؟

http://www.facebook.com/home.php#!/notes...8387731829

---

http://www.youtube.com/watch?v=NUPH8Y_P4Qw