أولا احنا كلنا مع الثورة ومع مطالب الثوار ومع التظاهر لكن مفيش داعي أبدا لموضوع الاعتصام ده والناس الى بتعتصم دي واضح انها ناس فاضية مفيش وراها حاجة يعني من الآخر تظاهر نعم اعتصام لا
ثانيا: موضوع الضباط الى راحت ميدان التحرير علشان يتظاهرو اعتقد الموضوع فيه لعب وأيادي خفية والله أعلم إن كانو دول فعلا ظباط وأشك انهم كذلك ولا ناس عادية لابسه لبس الجيش مفيش أبدا ظابط جيش يروح يتظاهر ضد قياداته ده اول حاجة بيتعلمها اي ظابط أو جندي هي اطاعة الأوامر وإطاعة قياداته وبدون نقاش ويعني هو فاكر انه لو عمل كده هيغير حاجة أبدا دا هيتحول لمحاكمة عسكرية وهيترفد وكمان هيتسجن ومستقبله يضيع.
ثالثا: توتر العلاقة بين الجيش والشعب ليس في مصلحة أحد أبدا وهيعمل مشاكل ملهاش حدود وهيدخلنا في نفق مظلم مش هنعرف نطلع منه والموضوع مش مقتصر فقط على فلول الحزب الوطني لأ الموضوع أكبر من كده بكثير البلد فيها دلوقت اجهزة مخابرات لدول عديدة واولها الموساد والمخابرات الامريكية والسعودية وغيرها ودي كلها بتلعب في البلد وبتقلب أطراف على أطراف أخرى وعايزة تعمل فوضي وعدم استقرار
الحل ببساطة إن الشعب يهدى شوية وثانيا إن الجيش يتعامل بشفافية أكبر من كده ويكلمو الناس على التلفزيون ويوضحو الحقائق كاملة ويضعو جدول زمني لتنفيذ مطالب الثورة لأن السكوت والطناش ده هو إلى عامل أزمة الثقة الموجودة دلوقت وياريت يسبوهم من موضوع البيانات الى على الفيس بوك دي هما فاكرين إن 85 مليون مصري قاعدين على النت طول النهار والليل!!!
حفظ الله مصر وشعبها من كل سوء