(04-11-2011, 11:47 AM)خالد كتب:  هناك عيب قاتل لأنظمة الحكم في المشرق دون استثناء، وأيضا لمشاريع النهضة فيه بما يتعلق بنظام الحكم.

العيب القاتل هو تبجيل شخص الرئيس، وتكبير منجزاته، وجعله رمزا.

الرئيس هو شخص مسؤول، وهو أجير عند الأمة، وهو يدين لها بمقعده، وإنجازته كلها إنما هي مضافة لكونه رئيسا لا ميزة شخصية فيها، بل الميزة هي للأمة أنها مكنته منها، والفضل الأول والأخير للأمة صاحب الانجاز وصاحبة السلطة، وليس للأجير الذي يجب عليه وجوبا أن يحسن عمله وأن يؤدي المهمة التي استؤجر من أجلها بأمانة وإخلاص.

من يريد أن يصير زعيما عليه أن لا يصير أجيرا، وأن يبقى يقود الأمة بعيدا عن مواقع القرار، حين تطيعه الناس وتلبي أمره وهو لا يملك لهم ضرا ولا نفعا، حينها يستحق لقب الزعيم، أما رئيس الجمهورية فما دون من موظفي الدولة فليسوا إلا مستأجرين ينبغي عليهم أن يؤدوا مهمتهم ولا منة لهم على أحد.

طبعا لا يفوتنا أن نذكر أن الجيش مثل رئاسة الجمهورية مثل سائر مؤسسات الدولة، إنما هو جهاز مستأجر لحماية الأمة، تشكله الأمة من أبنائها، فليس هو ولي أمر الأمة ولا الوصي عليها ولا يحق له أن يفرض أمرا بقوة الأمر الواقع أو بقوة العسكر على الأمة، وإلا كان متسلطا لا شرعية له. وحين توافق الأمة أن يتولى الجيش السلطة مؤقتا لضمان النظام وعدم إدخال الفوضى، فعلى الجيش أن يكون على هذا المستوى ولا يزيد، وللأمة أن تحاسبه أولا وآخرا على ما كلفته به، سواء أكان التكليف مباشرا أم غير مباشر.

الله ينور

---

بسم الله الرحمن الرحيم
دى شهادتى عن احداث فجر السبت 9/4/2011 .. واشهد الله على ما اقول .. والعلماء اجمعوا ان من اشهد الله على زور فقد كفر
البدايه الساعه حوالى 2:30 واقف انا ودكتور ايمن صحبى فـ لجنه شعبيه من جهه كوبرى قصر النيل
جه علينا ملازم اول صاعقه .. قولتله يافندم اوعوا تأذوا الضباط اللى معانا .. قالى عيب عليك انك تقول كدا انا عمرى ما آذيهم بس عايزكم تخلوا بالكم من نفسكم
قولتله ليه يعنى هيحصل اقتحام .. سكت وقالى حرصوا اكتر من كدا.. قولتله طيب سيادتك شايف ان هييجى دعم للضباط.. قالى لو الصبح طلع عليكم وانتوا ثابتين هتلاقوا دعم كبير جدا هينزلهم وسابنا ومشى
بعدها جه علينا 4 ضباط اتنين برتبه لواء وواحد مقدم لابس لبس صاعقه وملثم ولابس واقى على دراعه وعلى ركبته وخوذه سودا على راسه والضابط الرابع ماخدتش بالى من رتبته .. وكان معاهم واحد من المتطوعين فـ الجيش على وشه غضب ربنا وشكله مش مريح .. مشيوا كلهم باتجاه مسجد عمر مكرم .. انا جريت وراهم لغايه ما اتاكدت انهم خرجوا من عند اللجنه الشعبيه اللى موجوده هناك
بعدها رجعت مكانى لايمن وفجأه سمعنا صوت الناس بتصفر فـ كل مكان ودى كانت اشاره لو فى خطر .. بنبص ورانا لاقينا كميه جيش رهيبه فوق الوصف ومدرعات ورا مننا وطلعوا من قلبنا.. دخلوا منين الله اعلم .. واعتقد انهم طلعوا من مداخل المترو
جريت انا وايمن وكان الناس واقفين مجموعه بتأمن الخيمه ومجموعه حوالين الميدان ومجموعه واقفه قدام الضباط والجنود اللى امام الميدان وانا وايمن كنا ضمن المجموعه دى
قعدنا نهتف ونقول لا اله الا الله الشهيد حبيب الله .. وكنا بنركز اوى على لا اله الا الله .. قولنا يمكن يحسوا ان ربنا موجود ويفوقوا من اللى عايزين يعملوه
كان فى كاميرا تليفزيون بتصور انا جريت عليها وقولتله هنموت كلنا شهداء فـ الميدان .. قالى لا يبنى محدش هيموت ان شاء الله
جالى نقيب ولابس مموه وباسنى فـ راسى وقالى متقلقش دانتوا اخواتنا .. النقيب دا بقى ع رأى واحد كان معانا وصفه ان ضابط فى شئون البوس فى القوات المسلحه والله العظيم صدق لما قال عليه كدا
كل ما واحد يهتف يخرج بره الصف ويهتف يجرى عليه ويبوسه فى راسه ويقوله متخفش داحنا معاكم ومتقلقوش محدش هيتاذى
بعدها والله بدقايق لاقينا صوت الرصاص فى كل مكان مسمع الميدان كله وبطريقه بشعه وقفنا وثبتنا فـ بدأو يوجهوا ضرب النار فوق راسنا
وكان من ضمن الضباط اللى صورتهم .. واحد لابس مموه بردوا غامق ولابس قناع على وشه زى بتوع كتائب القسام .. وشكلهم نازلين يرهبونا ودا صورته فيديو لانى اول مره اشوف فـ حياتى ضباط جيش بيلبسوا كدا
بدات الناس تجرى فى كل مكان وايمن ببص جنبى ملاقتهوش جنبى فـ جريت فـ نفس الشارع اللى كنت واقف فيه ناحيه قصر النيل والشرطه العسكرية جايه ورانا بتضرب رصاص علينا
وانا بجرى كان بيجرى معايا ضابط من المعتصمين وكان برتبه ملازم وكانوا ناويين يقتلوهم كلهم .. دخلت انا وهو كشك خشب بتاع مرور وقعدت اتحايل عليه انه يلبس مدنى وهو رفض لغايه ما اقنعته وخلعت لبسى وادتهوله البنطلون والـ سويت شيرت وكنت انا واقف فـ الشارع بالبوكسر وعارف ان ناس كتير هتضحك لما اقول الكلام دا وجايز مش يصدقوا .. ويشهد على كلامى ربنا ومن بعده الشيخ صفوت حجازى لما شافنى وافتكرنى مجنون وقالى ايه يبنى اللى انت عامله فـ نفسك دا .. قولتله يا شيخ دا ضابط جيش وهيقتلوه وراح ناحيته .. كان فى واحد واقف قريب منى وشافنى بالشكل دا كان معاه بنطلون زياده ( كالسون بس رجليه طويله مش شورت ) اخدته منه ومشيت انا والضابط .. وطلعنا ع الكورنيش وكان فى ناس كتير واقفه ومعاها ضباط تانى سبناهم ومشينا لما لاقينا الجيش جاى علينا وبيضرب نار .. ومشينا من تحت كوبرى قصر النيل فـ اتجاه فندق شيبرد .. وقولتله تنزل معايا الصعيد وان شاء الله هتبقى فـ امان وهو رفض .. قولتله خلاص نروح عند اى حد من اصحابى اللى ساكنين فى القاهره .. بس قلقنا نمشى لان سمعنا م الناس ان فى اكمنه من الشرطه العسكريه .. فضلنا واقفين على الكورنيش لغايه ما لاقينا عربيه تابعه للقطاع العام ( بدون ذكر تابعه لاى قطاع ) وقفناه فـ قالنا انتوا ضباط جيش .. انا قلقت عليه قولتله لا هو مدنى وانا ضابط جيش
بحيث لو حصل شئ هو يجرى وانا لو اتمسكت اسمى مدنى وهيسبونى.. ركبنا معاه .. ونزلنا عند اول فيصل فـ قالى يا عبدالله يا انا مش هروح فـ مكان انا هرجع الوحده بتاعتى
قولتله انت مجنون فى خطر عليك .. قالى كدا كدا خربانه وربنا يستر .. بعد ما اصر انه يمشى وقف تاكسى وقبل ما يمشى ادانى الكاب بتاعه وقالى افتكرنى بيه وركب ومشى
بعدها كنت عايز ارجع التحرير تانى والفجر كان على وشك الآذان .. ومفيش ولا تاكسى عايز يقف ليا لان انا كان منظر لبسى طبعا مش قد كدا واللى يشوفنى يفتكرنى انسان ضال فى الشوارع.. ماشى فى الشارع ببنطلون داخلى .. وربنا كرمنى بسواق تاكسى قولتله انجدنى انا عايز اروح ميدان طلعت حرب وركبت معاه وقولتله اللى حصل .. هو صدقنى لانه كان سامع عن موضوع الضباط اللى نزلوا التحرير
رجعت تانى وسط البلد وكان ايمن مستنينى فـ شارع جانبى عند ميدان طلعت حرب .. نزلت لاقيت الناس بتبص عليا روحتلهم قولتلهم انا اسف انى ماشى فـى الشارع بالمنظر دا بس غصب عنى وشرحتلهم انى خلعت لبسى لضابط من اللى هربوا علشان كان هيتقتل
بدأ الصبح يشقشق علينا وضرب النار شغال وجماعه ولاد حلال لما شافونى وشافوا لبسى افتكرونى ضابط منهم ولابس كدا وهربان فـ ندهوا على سكان عماره وقالولهم معانا ضابط جيش وعايزين بنطلون ليه.. المهم باختصار فضل ضرب النار لغايه الساعه 6 الصبح
رجعنا التحرير تانى كلنا ودخلنا الميدان واقسم بالله العظيم لاقينا الميدان فاضى وفى عربيات جيش متولع فيها نار .. بقدره قادر اتولعت لوحدها ( والحدق يفهم ) لان جريده الاهرام عرضت تانى يوم صورة للميدان وفيها المتظاهرين متواجدين والعربيات متولعه ومكتوب تحتها اعمال شغب فى ميدان التحرير تؤدى لـ حرق سياره نقل وحافله.. العربيات يا حضرات اللى القوات ولعت فيها بنفسهم قبل ما ينسحبوا..كان الهدف منها انهم عارفين اننا راجعين الميدان وفـ لحظه وجودنا فيه اتصورنا .. وكدا احنا اللى لبسناها
طبعا بدات الناس تنزل من البيوت بعد نشر احداث الاقتحام على قناه الجزيرة .. وزاد العدد اوى وقررنا الاعتصام وقفل الميدان بالمتاريس والسلك الشائك اللى احنا لاقيناه فـ عربيات الجيش .. وانتهى اليوم على كدا ..
اللى استنتجدته من اللى حصل دا كله .. ان القوات الخاصه كانت نازله بتصفى الضباط لان اكيد وصلهم ان عددهم هيزيد لو طلع الصبح علينا .. وكان لازم باى شكل من الاشكال يتصفوا فـ مكانهم .. ومش مهم احنا نعتصم تانى او لا .. الاهم قتل الضباط الاحرار
سؤال ومش لاقى ليه اجابه ومحيرنى جدا ؟؟ القوات الخاصه والشرطه العسكريه والصاعقه جايين يقتحموا .. ليه كانوا جايبين معاهم متاريس وسلك شائك .. وللعلم كانت كميات كبيره جدا من السلك .. وانسحبوا وسابوهم لينا !! .. يا ترا دى مقصوده منهم لسبب ما ودا اللى اانا برجحه ؟؟ ولا هما انسحبوا وملحقوش ياخدوها معاهم ؟؟
رساله اخيره للناس اللى بتشكك فـى الضباط الاحرار الشرفاء .. خير من انجبت مصر وبيقولوا عليهم دول بره الخدمه .. اقسم بالله انهم لسه فـ الخدمه والدليل على كلامى الضابط اللى كان معايا وقالى انا راجع الوحده بتاعتى ..
وهعرضلكم كمان فيديو يأكد كلامى ان اللى نزل جيش وقوات خاصه وفيه الضابط اللى لابس قناع اسود على وشه ومش باين الا عنيه
دى كانت كل الاحداث اللى انا شوفتها وحصلت معايا فجر يوم السبت 9/4/2011 .. والله على ما قولت شهيد .. وفى الختام ربنا يرحم اللى اتقتلوا ونحتسبهم عند الله شهداء
ولا تحسبن الذين قتلوا فى سبيل الله امواتا بل احياء عند ربهم يرزقون .. ودول كانوا بيدافعوا عن مصر .. واتذكر قول ضابط برتبه ملازم اول لما طلع على المنصه وقال انا دخلت الكليه الحربية علشان ادافع عن بلدى وانا جاى هنا اموت شهيد .. الاحياء والاموات منهم عاشوا رجاله واستشهدوا رجاله

لغايه ما اموت وادخل قبرى عمرى ما شوفت ولا هشوف رجاله زى الرجاله دى .. لما كانوا عند وعدهم انهم يتحدوا مجلس الخونه وينزلوا الميدان مع الشعب بالميرى يا سلام عليهم وهما رافضين يخلعوا الميرى ويلبسوا مدنى ويقولوا هنموت هنا فـ الميدان

انا اسف جدا ليكم يا رجاله اننا مقدرناش نحميكم زى ما وعدناكم وتكملوا مشواركم


حسبى الله ونعم الوكيل فى كل من شكك ان اللى ضربونا بلطجيه والدليل انهم جيش .. كان معاهم مدرعات
وحسبى الله ونعم الوكيل فى كل من قال ان اللى ضرب نار بلطجيه ولابسين لبس جيش
وحسبى الله ونعم الوكيل فى كل من قال اننا كنا خاطفين ضباط جيش

حاجه اخيره .. قبل ما الضابط اللى معايا يمشى قولتله الخونه ضربونا بالنار .. قالى لا مش دول الخونه .. الخونه اللى فوق اللى امروهم بكدا وكان بيقصد ( المجلس العسكرى )

والكاب بتاعك ياحمد هيخلينى افتكرك دايما وعمرى ما هنساك .. ان كنت عايش فـ اكيد هتيجى الصدفه اللى تجمعنا تانى وان كانوا حكموا عليك بالاعدام فـ اكيد هنشوف بعض فى الجنه ان شاء الله ..انت راجل خرجت وانت على حق .. انتوا حفرتوا اسمائكم بحروف من ذهب فى السجلات العسكريه
ومصر عمرها ما هتنساكم

تحياتى ليكم يا احرار .. عبدالله
.