أسئلة غبية تاعبانى وفاقعة مرارتى جدا جدا جدا


.by Mohammed Elseedy on Wednesday, April 13, 2011 at 6:26pm.هو سؤال بسيط جدا جدا جدا: لو اللى فى ميدان التحرير دلوقتى وإمبارح واللى بيدعوا لمحاكمة مبارك وتطهير الجيش دول بلطجية وفلول الحزب الوطنى وبتوع الثورة المضادة زى ما المجلس العسكرى وطنطاوى صرحوا بكده, أومال ولاد الكلب اللى فى ميدان مصطفى محمود دلوقتى وبيطالبوا برجوع مبارك للحكم تانى يبقوا تبع ايه بالظبط؟؟؟؟؟؟؟؟؟؟؟؟؟؟؟؟



فى سؤال تاعبنى وفاقع مرارتى, لو الظباط اللى كانوا معتصمين فى التحرير دول فعلا مدعومين من جهات أجنبية لزعزعة

استقرارمصر فايه اللى دفعتهولهم الجهات دى علشان يضحوا بحياتهم وحياة أسرهم وعائلاتهم؟؟ الظباط دول كل واحد أعلن عن اسمه ورتبته وسلاحه ومكان خدمته بالكامل وأتصوروا مع كارنيهاتهم يعنى ما كانش ناقص غير انهم يعلنوا عن مقاس ملابسهم الداخلية !!! وكل واحد فيهم طلع شتم ولعن واتهم المجلس العسكرى يعنى كده إعدام إن شاء الله وش ومافيهاش هزار يبقى خدوا ايه من الجهات الخارجية دى علشان يضحوا بحياتهم وحياة أهاليهم اللى حيتظبطوا هم كمان برده؟؟؟ ايه الحاجة اللى تخلى واحد ناجح فى شغله متدين موفق فى حياته يطلع مسدسه ويضرب طلقة على مخه(وهو ده يعتبر اللى عملوه بالظبط)؟؟؟؟ حد يعرفنى علشان الموضوع ده تاعبنى وفاقع مرارتى فعلا!!!حاجة تانية برده اللى بيقول أشمعنى دلوقتى؟؟؟؟ لأنه فى الحقيقة ماينفعش الا دلوقتى ففى الأول كانوا مقهورين ومذلولين بنظان فاسد وضع عليهم قيادة فاسدة وأى واحد دخل الجيش حيعرف ده وحيفتكر القصص اللى سمعها عن الظباط اللى اتعدموا علشان حاولوا ينتقدوا الفساد فى الجيش واللى اتسجنوا مدى الحياة واللى أترموا فى المستشفيات النفسية ومستفى أحمد جلال النفسى العسكرى فى الهايكستيب شاهدة على كده, ولو سكتوا لبعد كده حييجى رئيس مدنى مالوش أى سلطة على الجيش اللى حيبقى بؤرة فساد محترمة مافيش اى رقابة عليها من أى حد وكل فاسد فيه حيورث مكانه لفاسد زيه وماحدش حيقدر يحاسب الجيش نفسه ولا الرئيس نفسه لأن الواقع بيقول ان الجيش دلوقتى وفى المستقبل بقى أقوى قوة فى مصر وماحدش حيعرف يحاسبه ولا يفرض عليه حاجة, يبقى دلوقتى هو انسب وقت لكسر الحلقة دى من الفساد وتطهير الجيش من الداخل مش من الخارج لأنهم ادرى مننا بالفاسد والصالح معتمدين على دعم الثوار ليهم وموجة التطهير والقضاء على الفساد اللى ماشية فى البلد دلوقتى



هو فى سؤال برده تاعبنى وقارفنى ومش لاقى ليه إجابة منطقية لغاية دلوقتى: هو لو الرائد أحمد شومان فعلا تم العفو عنه زى ما المجلس العسكرى أعلن ومش مقتول ولا مسجون فى سجن حربى ولا محبوس فى مستشفى نفسى, طيب ليه بقى مانزلش أعتصام التحرير يوم الجمعة اللى فاتت خصوصا وهو أول واحد أبتدع الموضوع ده وفتح الباب لكل الظباط اللى أعتصموا دول؟؟؟؟؟؟؟





سؤال تانى بسيط برده بس محيرنى وفاقع مرارتى: شباب إئتلاف الثورة قاعدين يقولوا احنا ضد عسكرة الثورة ولازم الظباط اللى عايزين ينزلوا الميدان يلبسوا مدنى...طيب ده على اساس إن الميدان ده هو صالون بيتهم وهم حرين فيه؟؟؟ ولا على أساس أن الظباط دول شغالين عند اللى خلفوهم فلازم يلبسوا على مزاجهم؟؟؟وبعدين إذا كانت مطالب الظباط دول هى تكوين مجلس رئاسى مدنى وعودة الجيش لثكناته يبقى عسكرة الثورة ايه بقى ونيلة ايه؟؟؟؟





سؤال تانى أبسط خالص بس محيرنى برده وفاقع مرارتى أكتر: هو ليه لما الرائد أحمد شومان طلع أثناء الثورة وهاجم المشير وأتهمه بالفساد وإضعاف الجيش على الهوا من ميدان التحري على الجزيرة وأتقبض عليه أتعملت مليون صفحة للدفاع عنه والمطالبة بالإفراج عنه بصفته مصرى وطنى شريف ولما قام الظباط الشباب قالوا نفس الكلام فى التحرير برده أتهمهم الكل بالعمالة والخيانة وأنهم عايزين يولعوا البلد؟؟؟؟؟؟؟





سؤال بقى غبى المرة دى مطلع عينى علشان أفهمه: الجمعة اللى فاتت كانت جمعة التطهير وكانت ضد تباطؤ المجلس العسكرى فى محاكمة مبارك وولاده والثلاثى المرح وكان شعارها: الشعب يريد معرفة ايه النظام؟ وقعدنا نهتف لغاية ما صوتنا أتنبح ضد المجلس العسكرى وطنطاوى لتواطؤهم مع مبارك وحمايته, وبعدين الجمعة الجاية(اللى بيقولوا ممكن تتلغى!!!) حتبقى لدعم المجلس العسكرى وتأييده.....أنا بجد اللى عايز أعرف هو ايه النظام؟؟؟؟







سؤال تانى غبى برده تاعبنى وفاقع مرارتى برده: هو لو الجيش فض أعتصام التحرير فجر السبت 9 أبريل بدون أستخدام القوة وفرح الرصاص اللى شوفناه فى الفيديوهات دى كان فشنك فعلا مش حى أومال الناس برك الدم اللى شوفناها مالية الميدان والناس اللى ماتت دى نزل عليهم نيزك من السماء ولا أنفجروا من الغيظ ولا أيه بالظبط؟؟؟؟؟؟؟؟





سؤال تانى برده تاعبنى وفاقع مرارتى: الجيش من أول يوم نزل فيه الشارع(يوم جمعة الغضب) وهو سايب الناس فى الميدان تسب وتلعن فى أبو مبارك وعيلته وعصابته وبعدين لما أتخلع قعدوا يسبوا ويلعنوا فى أبو شفيق لغاية ما أتشال والحياة بيس وزى الفل بس أول ما الناس قربت للمجلس العسكرى وطنطاوى طلعوا عين أبوهم وسحلوهم وقتلوهم ليه؟؟؟؟؟؟؟؟؟؟؟؟؟





سؤال تانى رخم تاعبنى وفاقع مرارتى كتيييييييييير: هو الجيش ليه لسه ما أعتذرش لغاية دلوقتى عن أستخدام القوة والرصاص الحى لتفريق المعتصمين فجر السبت 9 أبريل وقتل عدد منهم عمدا"؟؟؟؟؟ وليه مطلعش اللواء الفنجرى لغاية دلوقتى يديهم التحية العسكرية علشان يليف الناس برده؟؟؟؟؟؟؟ ولا ده يعتبر من ضمن رصيده الذى لا ينفذ لدينا ولا أيه بالظبط؟؟؟؟؟؟؟؟؟؟؟؟؟





سؤال خايب كده تاعبنى وفاقع مرارتى برده: هو ليه لما الرائد أحمد شومان طالب طنطاوى بالرحيل مع مبارك الناس كلها أيدته وهللتله ولما ظباط أعتصام التحرير طلبوا نفس الشىء الناس أتهمتهم بالخيانة؟؟؟؟وياريت ماحدش يقولى أن لكل مقام مقال والوضع كان يسمح وقتها لأنه بالعكس البلد وقتها كانت متنيلة ب60 نيلة والبلطجية ماليين الشوارع وحكومة شفيق مكروهة ودلوقتى الى حد كبير مستقر وفى حكومة جاية بإرادة الشعب





سؤال رخم كده تاعبنى وفاقع مرارتى برده: هو ظباط وعساكر الأمن المركزى دول ولاد كلب فلما ضربوا وقتلوا المتظاهرين ضربناهم وحرقنا عربياتهم وطالبنا بمحاكمتهم ومحاكمة وزيرهم وأعدامه وظباط الجيش دول ملايكة لما قتلوا المتظاهرين عيطنا وقولنالهم احنا أسفين سامحونا ده احنا اللى غلطانين ووزيركم ده عسل وسكر ولازم يقعد يحكمنا؟؟؟؟؟





سؤال غتت كده بس تاعبنى وفاقع مرارتى: هو الجيش مش أعلن من أكتر من شهر أنه حيحقق فى وقائع تعذيب الشرطة العسكرية للمتظاهرين المعتقلين فى السجون الحربية وحالات التحرش الجنسى للشرطة العسكرية بالبنات المتظاهرات المعتقلات فى السجون الحربية وتصويرهم عرايا ومحاسبة المسئول عن ده؟؟؟ طيب هى فين نتائج التحقيقات دى؟؟؟ولا هى كانت إشتغالة ومافيش تحقيقات أصلا؟؟؟؟؟





سؤال تلم تاعبنى وفاقع مرارتى: هو فى بداية الثورة لما الناس كانت بتطالب بإسقاط النظام وتطهير البلد كان بيتقال عليهم عملاء وخونة ومنحرفين أخلاقيا وبيشربوا مخدرات ولما جيه ظباط التحرير طالبوا بنفس المطالب أتقال عليهم نفس الكلام برده بالنص...هو حد يعرف أنس الفقى فين دلوقتى يا رجالة؟؟؟؟؟؟؟؟؟



سؤال تانى برده تاعبنى وفاقع مرارتى أكتر وأكتر وأكتر: هو ليه الجيش بتاعنا ماعملش زى الجيش التونسى؟؟ ماهو برده حمى الثورة ووقف معاها وبعدين سلم السلطة لمجلس الوزراء ومؤسسة الرئاسة لعمل الإصلاحات الديموقراطية اللى الناس عايزاها, ولا قعد يستهبل ويقول أنا حامى الثورة والجيش والشعب أيد واحدة!! فالحين بس يقولولنا بصوا لليبيا واليمن, الأولى جيشها مرتزقة والتانية قبائلى لما يحبوا يقارنوا يقارنوا بجيش نظامى زيهم, يعنى جيش تونس





سؤال تانى أبسط خالص خالص بس برده تاعبنى وفاقع مرارتى أكتر وأكتر: هو فى ظابط جيش ليه قضية مخلة بالأداب أتحاكم وأتسجن فيها وملفه مشبوه يطلع يعتصم ضد قيادات الجيش ويتهمهم ويشتمهم وفوق كل ده يقول أسمه بالكامل وسلاحه وكتيبته وسنة تخرجه ويخلى الناس كلها تصوره فيديو وتنزله على النت؟؟؟؟؟؟؟؟ هى الناس دى مش المفروض أنها بتقول يا حيطة دارينى؟؟؟؟؟ هم فاكرينا هنود وراكنين الفيل بره ولا أيه بالظبط؟؟؟؟





سؤال بايخ كده تاعبنى وفاقع مرارتى: هو أثناء الثورة كانت حجة الناس اللى بتقول كفاية كده هى ان حال البد واقف وان الوضع مش مستقر وان اسرائيل دخلت سيناء وامريكا فى البحر الاحمر وسلاحف النينجا فى الجيزة وفرق البوكيمون المسلحة فى الاسكندرية الخ الخ ورغم كده الثورة نجحت ومبارك اتخلع ومافيش حد هاجمنا على الرغم ان جيشنا كا مترمط فى الشارع طيب اشمعنا حيهاجمونا دلوقتى والوضع اصبح مستقر لو المجلس اتغير؟؟؟؟؟





سؤال أهبل كد تاعبنى وفاقع مرارتى: أثناء الثورة كانوا قاعدين يقولولنا مبارك ده زى ابونا ماينفعش نعمل معاه كده أعتبره أبوك ودلوقتى قاعدين يقولولنا الجيش ابونا وحامينا وماينفعش نعمل معاه كده, ده على أساس ان الشعب كله يتيم ولا ايه بالظبط؟؟؟أومال أبويا اللى فى البيت ده يطلع مين بالظبط اذا كانوا كل دول أبويا؟؟؟؟





سؤال جاهل كده تاعبنى وفاقع مرارتى:إزاى تبقى عندنا أزمة أقتصادية وأحتياطى البنك المركزى حيخلص كمان 3 شهور وحنفلس لما يبقى إيراد قناة السويس فى 3 شهور(من أول يناير لنهاية مارس) هو 1.2 مليار دولار ولما يبقى فى باقى ال40 مليار جنيه مخصصات رئاسة الجمهورية فى الموازنة اللى فاتت بعد ما الرئاسة أتقفلت بالضبة والمفتاح



سؤال مقلق كده تاعبنى وفاقع مرارتى: لما أطباء جنوب سيناء يعتصموا علشان وكيل الوزارة والمحافظ رافضين ينفذوا قرار الوزير بنقلهم فيرد عليهم المحافظ اللواء محمد عبد الفضيل شوشة القائد السابق لسلاح حرس الحدود فى الجيش المصرى: أنا رئيس جمهورية المحافظة وكلام الوزير مايمشيش عليا وهو حاطط فى مكتبه 3 صور لمبارك يبقى نفهم قيادات الجيش بتفكر ازاى؟؟؟؟وليه الجيش مش عايز يغير المحافظين اللى كلهم لواءات سابقين فى الجيش؟؟؟؟



أى حد عايز يعرف الإجابة زيى كده نتقابل إن شاء الله جميعا فى السجن الحربى جماعة يا رجالة علشان يبقى الثواب أكبر




http://www.facebook.com/notes/mohammed-e...4198775279