(04-15-2011, 10:49 AM)Guru كتب:  فرجاء أن ترحمونا من الأحلام الوردية و الطموحات المستقبلية البتنجانية، الوضع الأن كارثي و علينا أن نعترف بذلك لمحاولة ايجاد حلول، بدلا من التنطع و التخريف بأحلام و آمال وردية عن ثورة لم تتحقق بعد. فكي تتحقق الثورة لابد من ثورة داخل المصريين أنفسهم.

اهلاً جورو
اى احلام وردية جورو اللى بتتكلم عنها و اى فرحه مرسومة على وشى ؟؟؟؟
شفتها فين دى؟
انا من قرفى مابقيتش حتى بتابع اى اخبار و المسرحيات الهزلية اللى بتتعمل دلوقتى بموضوع المحاكمات الصورية اللى مش داخله دماغى اصلاً
و لو افترضت انها حقيقية فموت يا حمار لو اتحكم فيها ولا بعد 6 شهور حتى زى ما بيدعى المجلس الاعلى للعواجيز.

نرجع للرد على كلامك اعلاه
مين قال ان الثورة هتغير من سلوك الناس؟
الهمجى هيفضل همجى و المحترم هيفضل محترم
دى تربية البيوت اللى بتشوفها فى الشارع دلوقتى
فى ناس بالفعل اتغيرت للاحسن، بس اللى فعلاً كانت عايزه تتغير
انا تقريباً يومياً بتخانق مع ناس مش بتحترم النظام فى الشارع و بيجيلى الرد كالعادة غبى و متخلف
(( هو انتى جايه عليا انا ليه، ما البلد كلها خربانه))
ردى طبعاً بيكون واحد فى كل الحالات
لو كل واحد عدل نفسه البلد هتتعدل بطلوا تبصوا لغيركم و ظبطوا نفسكم الاول
و طبعاً باخد ردود زى السم
اللى قلت عليهم ثوار فى التحرير مش كلهم عندهم وعى و على فكرة كتير جداً فى التحرير بيدعوا انهم من الثوار و بيشوهوا الصورة اكتر و اكتر
انا ممكن احكيلك قصص للصبح عن اللى انا سمعته من ناس كانت موجوده يوم الجمعة وقت قتل الظباط و إمبارح كمان
فى ناس فى قمة الوعى و برضو غلابة و على ادهم
لكن عندهم أدب و اخلاق و مثقفين الى حد ما رغم انهم لابسين هدوم ماتساويش يمكن حتى 100 كلها على بعضها
جورو موضوع المحاكمة بدون وثائق ورقية فتفتكر دا حصل ليه؟
مع العلم فى وثائق كتيره جداُ و اللى بيتحاكم دلوقتى فمش علشان خاطر عيون الثوار
دول بيتحاكموا لأنهم لازم يتحاكموا
سمعت عن تهمة السب و القذف العلنى؟ مش دا برضو شىء فعل خارج على القانون؟
الوزراء اللى مشرفين فى بورتو طره دلوقتى اتحبسوا لمجرد ان الثوار الامامير طالبوا بحبسهم؟
هما طالبوا بدا من فراغ؟
من بداية الثورة الناس دى ما اتحاكمتش ليه؟ مع وجود ادلة كتيرة جداً عليهم مصورة بالفيديو كمان؟؟
مين السبب فى انهم اعدموا كتير جداً من المستندات اللى تدينهم؟؟؟
نيجى لموضوع انهيار الاقتصاد فى البلد
دا صحيح جداً كمان شهرين هنبقا كلنا بنشحت بجد
مصانع كتير هتقفل و شركات كتير قفلت خلاص
مين السبب؟؟؟
مين مسيب "البلطجية " علينا لحد دلوقتى؟
مين من مصلحتة تفضل البلد سايبة ؟؟؟
مين اللى مش بيتخذ اجراءات صارمة لمحاربة الخارجين على القانون؟؟؟
ليه ما طلعش قانون بإعدام اى البلطجى اللى يتسبب فى ترويع المواطنين؟؟؟
لو واحد بس اتعدم اى بلطجى غيره هيفكر الف مرة قبل ما يتبلطك على الناس لما يتدفع له فلوس لدا
ليه بنحكم على النتائج و نسيب الاسباب الاساسية اللى وصلتنا للى احنا فيه؟؟؟؟
الثورة مالهاش اى صلة باللى بيحصل
اللى مفروض نحاسبة هو اللى مش عارف يحكم البلد و سايب الكلاب تنهش فيها للحفاظ على مصالحة الشخصية.
مفروض نعالج المرض مش الاعراض
وقتها الثورة هتنجح
بس مش هيحصل قبل سنين كتيرة جاية
و يا عالم هنبقا لسه عايشين لا تحت التراب
حاليا تحت التراب ارحم بكتير من فوق الارض