(05-20-2011, 05:25 PM)الحكيم الرائى كتب:  اتفضلى يازميلة وردة هذه وصلة وضعها بسام توضح لك ولو قليلا الموقف

في أكتر من هيك حقارة!

يا وردة نحنا اللي بنساويه إنا "بننتقد".. بنحكي الموجود.. ما جبنا إشي من عنا..ما بنسبسب مع إنه لو بدنا نسبسب بيطلعلنا لأنه مبدأ مو محترم حاله أنا شخصياً ما بقدر أحترمه .. أما إزا لهالدرجة متحسسين من هالأشياء اللي بنحكيها فزبطوا العلل اللي عندكم.. لا تلومونا نحنا
بدي أحكيلك شغلة.. لو فرضنا إنه في متدينين معتدلين و قطاقيط و كراميش و إلى آخره .. يا ترى هدولي نفسهم مستعدين يشيلوا آيات من القرآن مليانة حقد و كراهية و تعامل بفوقية مع التانيين .. ما عم نحكي حديث و سيرة.. عم نحكي قرآن .. من فترة جوكر حط هالآية بموضوع
"لاتبدأوا اليهود والنصارى بالسلام وأذا سلموا عليكم فقولوا وعليكم واذالقيتموهم في طريق فاضطروهم الي أضيقه ".. بالنسبة إلي إسلام مسيحية يهودية كلهم ألعن من بعض ففخار يكسر بعضه.. بس يا ترى هالرومانسية و المشاعر الكتير مرهفة اللي عند المسلمين رح توصل لدرجة إنه ضميرهم يسمحلهم يعدلوا هالخبايص اللي بقرآنهم مثلاً.. مهوي إزا بدنا نطلب شغلة بدنا نكون أصلاً مطبقينها و لا لأ؟

أنا مو مع اللي بيحكي الواحد ما بسير يتعرض ل "مكدسات" التانيين! لأ إزا إشي مو عاجبني بدي أحكي .. لما حدا يتعرض لشخص حدا تاني بدون وجه حق هون بيطلع محقوق غير هيك ما دام عم يحكي رأيه بإشي شايفه غلط فما في حدا بيطلعله يلومه

أنا ما عم بحكي عنك شخصياً عم بحكي عن ناس كتير من المتدينين..و أنا كنت متلهم بمرحلة معينة و فاهمة كتير منيح عقل المتدين.. المتدين بحاول دايماً يبرر الأغلاط اللي بدينه و بأيا طريقة بحاول يبينها يا سلام ما في أحلى منها .. أنا أصلاً من ورا هيك موضوع تركت الأديان.. كان في واحد بيسألنا أنا ووحدة تانية أسئلة دينية و برضه أسئلة بالتاريخ الإسلامي.. كنا نجيبله أدلة من هون و من هون و نحاول نبررله عن طريق "التبريرات الترقيعية" اللي تقريباً كل المتدينين ماكلين راسنا فيها .. بس لما فكرت بيني و بين حالي بالتبريرات اللي عم نقدمها بعيداً عن الدين لقيت إنه هالأشياء ما بقبلها لحدا بخصني كيف لحالي! و لقيت إنه عتبي مفروض يكون على هالإشي الغلط اللي تربيت طول عمري إنه إشي كتير صح و ما بسير نناقشه مو على هادا البني آدم اللي عم يسأل أسئلة كتير منطقية

بحترم أيا حدا بهالدنيي محترم حاله و بحترم حق أيا حدا يختار شو ما بده بس بشرط هالحدا لا ينفخ راسنا بقصص إنه ما بسير نقرب من "مكدساته" العظيمة سواء كانت شخوص أو نصوص أو بطيخ

احترام إنسانية أيا بني آدم بيستاهل هالإحترام على راسي من فوق بس هوي كمان لازم يعرف حدود تدخلاته بحريتي

المشكلة بالمتدينين بدهم الكل يطلع لهالقصص اللي بآمنوا فيها بعينهم همي.. فالخلاصة إنه المشكلة عندكم مو عنا .. احترامكم إشي و احترام اللي بتآمنوا فيه إشي تاني .. مع إنه بكتير مرات لما أيا متدين بعند على شغلة مو إنسانية بدينه و بسير يقول إنه هادي كانت أيام زمان مو هلأ (طبعاً عزر أقبح من زنب) يا أما بسير بدو يطلعها شغلة مبررة بالغصب بيخسر من إنسانيته كتير و بالتالي من احترامه

و مرات لما المتدين ياخد من دينه اللي بده إياه و يترك الباقي هادا مو معناته إنه دينه صار صح بالعكس هادا بدينه أولاً و بدين دينه أكتر و أكتر

الإحترام بإطار الإنسانية بيكتسب ما بيجي حق تحصيل حاصل .. فمو كل إشي موجود بهالدنيي لازم نحترمه لمجرد إنه موجود و إلا كان احترمنا الكسلان و السراق و الوصولي و الهمجي و وووو
يعني فكرة إنه أيا مبدأ في إله أتباع او إنه في ناس بحاولوا يلزقوا فيه صفات أكبر منه ما بتخليه منزه عن النقد