(05-30-2011, 11:18 AM)بنى آدم كتب:  أنت صورت المشكلة يا عاشق وكأنها مشكلة بيولوجيه ومشكلة أجناس أو قومية مصرية لا يمكن إصلاحها بأى حال

ده حقيقى ,,,, فعلا كثير من مشاكلنا فى مصر سببها خطأ فى التركيبه البيولوجيه للمصريين , تشعر وأن جينات المصريين فيها حاجه متركبه غلط , احنا منذ 7 ألاف عام بنفرعن الفرعون ونحنى له ظهورنا ليمتطيها , ثم نقدسه الى حد التأليه , احنا فى معظمنا شعب منافق يعشق النفاق للرؤساء والمديرين وكل صاحب سلطه , والرؤساء والمديرين وكل صاحب سلطه يسعدون بهذا النفاق , ولو واحد زى حالاتى مبيعرفش ينافق يفضل مضغوط على دماغه بالجزمه وكل اللى حواليه بيصعدوا بسرعه الصاروخ وهو محلك سر .

دى قناعتى اللى توصلت لها منذ زمن ولم يحدث ما يجعلنى أبدلها .

(05-30-2011, 11:18 AM)بنى آدم كتب:  يعنى أنا مختلف معاك فى حاجتين :
- الأولى إنك معتقد إن السكوت سيحل الأزمة .. والواقع أثبت العكس والمؤشرات كلها تدل على العكس
- أنك مفترض حسن النيه فى المجلس العسكرى وأنا مفترض فيه سوء النيه وإنه يريد شيئا ما وإنه بكل تأكيد وبلا أى نقاش عقد صفقه مع إخوان الشياطين بدأت بتعيين صبحى الفلوطه ( صبحى صالح سابقا ) فى لجنة تعديل الدستور

أنا مقلتش نسكت , لو سكتنا على مبارك كان زمان جمال بيتأهب الأن للجلوس على عرش مصر , لكن برضو منصرخش عمال على بطال حتى لا نسبب الصداع لهم , اصرخ واخرج فى مظاهرات واعتصامات عند تعيين أعضاء اللجنه التأسيسه للدستور وطالب بأن تكون لجنه منتخبه , اصرخ عند تمرير قانون مجلس الشعب دون عرضه على الشعب للاستفتاء عليه , وعندما يكون هناك برلمان شرعى منتخب فى ظل دستور حقيقى أقرته اللجنه المنتخبه من الشعب و يحفظ للمواطن كامل حقوقه يمكن بعدها مناقشه كل الأمور الأخرى تحت قبه البرلمان , لكن التظاهر عمال على بطال ده مش فى صالح الاستقرار ولا فى صالح الناس.

(05-30-2011, 11:18 AM)بنى آدم كتب:  بذمتك إن تآمن على مصر إن يتحكم فى قوانينها شخص مثل ممدوح شاهين الذى اتصل بقناة أون تى فى ليجبرهم على رفع كلمة حاشدة من أمام مظاهرات 27 مايو

دا بيتعامل معانا كأننا سائمة وبعض المواشى ورثهم عن المخلوع وبيمشيهم بالعصا والبرسيم بكل وقاحه بس طبعا البيانات تصدر عن شعراء يصيغونها بطريقة رومانسية شاعريه لا تمت للواقع بصلة

أنت خاضع لحكم عسكرى , وتتحدث عن رجل تعود على القاء الأوامر وأن يتم تنفيذها دون نقاش , هو ده اللى موجود هنجيبلكم منين يعنى ؟ دول عسكريين لا يفهمون سوى فى تنفيذ الأمر , وهما دول اللى ناس فرحت بيهم عقب تنحى مبارك , استحملوا بقه الفتره الانتقاليه دى علشان الأمور تعدى على خير .

الجيش لو سابها دلوقتى ونفض ايده وعاد الى ثكناته هتحصل مجازر فى الشوارع , كل تيار سيحاول القفز على السلطه وأولهم الاخوان , والجيش عارف كده كويس لذلك هم يتحملون تلك السخافات والاتهامات وعاوزين يخلصوا من هذا الأمر بأسرع وقت ممكن .