الجزء الثاني من مسلس الإرهابيون

عملية البندورة الحمراء …الكشف عن اتصال هاتفي خطير جداً بين الجماعات المسلحة
بواسطة
admin2
– 2011/06/10نشر فى: مقالات وتحليلات
هذا تفريغ لنص اتصال هاتفي التقطته أنا شخصياً في عملية مخابراتية معقدة أسميتها (البندورة الحمراء) وذلك باستخدام موبايل متطور جداً دقة كاميرته 8 ميغا..!!، والحوار في هذا الاتصال يدور بين شخصين احدهما اسمه أبو حمدو، والآخر طرنيب (أعتقد أنه اسم حركي)، والاثنان من أفراد الجماعات المسلحة التي تهدف لزعزعة الوطن، ويشرفني أن أهديه للإعلام السوري ليبثه في نشرات أخبار الغد….علماً أن هذا التسجيل أهم وأخطر بكثير من الذي تم بثه خلال اليومين الماضيين…وأقدمه مجاناً (باسم أمن الوطن)


اتصال أول مرة: ترررررررررررررررن
أبو حمدو: ألووووووووووووو……مرحبا… طرنيب؟
طرنيب: لأ تريكس….(يغلق السماعة)


أبو حمدو(يعاون الاتصال تاني مرة): تررررررررررررن… ألو……………..طرنيب؟
طرنيب: قلنالك تركس…العمة (يغلق السماعة)

أبو حمدو(يعاود الاتصال تالت مرة): ترررررررررن….ألو….وقف لا تسكّر…مو إنت طرنيب؟
طرنيب(يخبط على رأسه): آآآآآآآآآآآآآ….يحرق حريشك، بعرضي نسيان انو هاد اسمي السرّي…خربطت حاكم قاعد مع الشباب هون كلهن من القاعدة والموساد عم نلعب دق شدة ومافي غير يسألوني ويقلولي شو بدك تلعب طرنيب؟…وأنا قلهن لأ تريكس، هنن يقولولي طرنيب وأنا قلهن تركس….يا أخي هالإسرائيلية ما بيعرفوا غير الكونكان والـ 41 …تقول بحياتن مو فايتين جيش ولـــ….
أبو حمدو(مقاطعاً بعصبية) العمة بقلبك سماع شوي حتحكيلي قصة حياتك؟

طرنيب: أمور أخي خلصني شو بدك؟

أبو حمدو: حاكاني قبل شوي أبو سعيد قال منشان الـ….
طرنيب(مقاطعاً): صعي كيفو أبو سعيد عمتشوفو، بعرضي هالزلمة قديش شفت وتعرفت على بني آدمين؟…متلو ما……….
أبو حمدو(مقاطعاً): لك سماع شوي حاجة أكل خـ(تووووووووووووووت) العمة بقلبك ما بدي طوّل بالحكي لإنو بس خلص المكالمة بدي احرق الشريحة قبل ما يلقطونا المخابرات …بتعرف اديشهن فظيعين ومحترفين وكلهن من خيرة شباب الوطن ما شاء الله عليهن…

طرنيب: معك حق…تفضل تفضل أخي…قللي
أبو حمدو: قللي ابو سعيد احكي معك تجبلنا سلاح منشان نقتل الجيش والمخابرات…(يتابع هامساً) فهمت عليي مو؟…لإنو ما بدي قول المخابرات السورية بالإسم منشان اذا عميتسمعوا علينا ما يعرفوا انو الحكي عليهن…تمويه يعني

طرنيب: اي اي فهمت عليك….قللي أخي بدك سلاح ثقيل ولاّ خيف…عندي تشكيلة أسلحة على كيف كيوفك مبارح لسة باعتلي ياهن بندر …أو سكسوكة عرفتو؟
أبو حمدو: لك لكان ما أحلاني ما اعرفو قائد الثورة السورية، المهم سجّل عندك ….بدي 20 بارودة m16 ، وشي 15 آر.بي.جي، وشي سبعين رمانة

طرنيب(مازحاً): رمان حلو ولاّ حامض….هههههههههه

أبو حمدو: عمتأنكل…!! تضرب شو إنك سميك دم بصحيح…عمقلك مستعجل، خلصني وخليني ارجع على شغلي، عندي مية مهمة لازم خلصها لحتى زعزع الأمن الداخلي واللحمة الوطنية بين مكونات الشعب السوري، ولسة عندي جولة عالمحافظات لقبّض المتظاهرين، هلكوني وهنن عميدقولي منشان أعطيهن الأسبوعية تبعهن…

طرنيب: اي اي …شبك يا زلمي لسة نازل فينا رشاً ودراكاً ؟
أبو حمدو: المهم…. ايمت بيكونوا عندي؟

طرنيب: البواريد والرمانات جاهزين…بس (الآر. بي. جيّات) هلأ بعمل تلفون للحريري بيبعتلي ياهن عالحارك…حاكم هالزلمة حلمو يئذي سورية، وعميكب مصاري واسلحة بالهبل.

أبو حمدو: على راسي…بس ما بدنا حدا يحسّ هه انت وعمتفوتن ع الحدود
طرنيب: له يا طيب…عمتحكي مع طرنيب انتة…الله وكيلك في عندي كم ضابط فاسدين بيفوتولي دبابات اذا بدك..بس هنن فاسدين والقيادة ما بتعرف، والله لو عرفت لتعدمن
أبو حمدو: طبعاً ما بتعرف…..اي والله مكافحة الفساد شغالة على أبو جنب، بس إلا ما يضل شي حدا فاسد من أتباع خدام ورفعت
طرنيب: بذاتن…هدلول اللي عمنتعامل معهن نحنا
أبو حمدو: صعي …منشان المقبرة الجماعية اللي اتفقت عليها انت وأبو سعيد شلون نزبطها هي، لإنو بدي صورها وابعتها للقنوات المأجورة المتآمرة؟

طرنيب: ولا يهمك…بعرف كم واحد من عصابة الاخوان المسلمين العميلة روح قلبهن يحفرو القبور الجماعية
أبو حمدو: عراسي والله طرنيب
طرنيب(مازحاً): قلنالك تركس……هههه
أبو حمدو: رجعنا للأنكلة
طرنيب: شكلك مو بتاع مزح منوب…على كلن المصاري جاهزين؟
أبو حمدو: قد ما بدك….أمريكا والصهيونية العالمية وبرهان غليون وهيثم مناع ما عم يقصروا….الله وكيلك بالتنكات عم يبعتولي الأخضر، وكل 100 دولار متل حد السكّين…بالجيلاتينة لسة رزم المصاري
طرنيب: الله حيو….يللا سيدي عاوز شي؟
أبو حمدو: سلامتك….المهم حكينا كلو كان مشفر وما حدا فهم علينا
طرنيب: من ناحيتي ما تاكل هم….عم احكي بالثريا اللي بعتتلي ياه القنوات المأجورة
أبو حمدو: بدك الصراحة وأنا متلك كمان….بعتولي ياه على أساس استخدموا وكون شاهد عيان، بس بيني وبينك عم أجروا للجماعات السلفية وقت ما يكون في مظاهرات، وعم آخد 1000 ليرة ع الدقيقة…بدنا نشتغل
طرنيب: هاد الشغل المزبوط…..يللا ، السلام عليكن وسلملي على أبو سعيد
تغلق السماعة: توت….توت….توت
انتهى الاتصال….والخلود لرسالتنا

إياد شربجي : فيس بوك
10 حزيران 2011