(06-26-2011, 12:03 AM)Dr.xXxXx كتب:  اهلين نارينا

ما رأيك بخروج المرأة للعمل عندما يوفر الرجل اكتفاءاً مادياً؟

"تركت الدين"، يعني الحاد ام لا دينية ام لامبالاة؟

السؤال الاخير، هل كان للدين تأثير على التصرفات الاخلاقية (حسب النظام الاجتماعي العربي)؟ يعني عندما تركت الدين، هل تغير شيء من اخلاقك التي كنت ترفضينها كفناة متدينة؟؟

أهلين دكتور..إزيك؟

خروج المرأة للعمل يا دكتور ضرورة ضرورية جداً جدن جداً (يعني بدك تقول هيك من باب درء المفاسد) سواء الوضع المادي مرتاح أو لأ...بس إزا كان هالعمل من تايب المكاتب اللي شغل طق حنك طول النهار و500 فنجان قهوة و 500 سيجارة باليوم و كله شغل ناس جاية تطلع بخلق بعض و فلانة متجوزة صح بس بتاخد فلان "صديك" "بتفضفضله و بفضفضلها" فأنا بقول يقعدوا بالبيت أحسن سواء كان واحد أو وحدة
الأنثى اللي بتقعد بالبيت و بتكون فاضية أشغال بتخسر البنوتة اللي جواتها و بتتحول ل "نسوانة" و أنا ما بطيق الأنثى النسوانة أبداً (مشان أبري زمتي القصد ب "أنثى" ب "الأنثى النسوانة" هيي أنثى من ناحية تشريحية بس مو أكتر.. و ما أكترهم!)
هلأ إزا هي مرتاحة مادياً و حاسة إنه المصاري ما إلهم لزوم.. ممكن تلتزم مع جمعيات و تساوي نشاطات خيرية متل محو أمية أو أي مهارة هي ممكن تعلمها للتانيين .. بس إنها ليل نهار ما تكون إلها شغلة و لا عملة غير باب الحارة و مهند و نور و استقبالات و عزايم يعني لا ربيت بهيك جو و لا إزا ربيت فيه بتخيل إنه كنت رح أطيقه بيوم من الأيام
و نفس الإشي بالنسبة إلي بينطبق عالتعليم الجامعي.. و برضه للواحد أو الوحدة.. لأنه جامعاتنا مليانة معاتيه بمعنى كلمة معاتيه على مستويات كتيرة و من كل الطبقات الإجتماعية.. يعني اللي ما بده يطلع من الجامعة غير متل ما فاتها و بزيادة كرتونة و روب تخرج بلا ما يفوتها أحسن

بالنسبة ل "تركت الدين" دكتور.. أنا ما بحب كلمة إلحاد لوصف اللاديني غير الربوبي لأنه معناها الحرفي في ظلم إله و نظرة وصاية اتجاهه.. واللامبالاة بإشي بخص أفكاري بالنسبة إلي مستحيلة يعني مستحيل أقبل على حالي أكون بين و بين .. فبالنسبة لتركي للدين دكتور أنا أول ما تركته كنت لادينية ربوبية بس بنفس الوقت كنت بحاول أستوعب الأغلاط اللي بساويها هالإله اللي بآمن فيه و اللي مفروض إنه إله محبة.. فلقيت حالي مثلاً مو قادرة أتقبل إنه كيف هالإله المحب الرحيم العادل ممكن يقدر يخلق طفل بتشوه معين..إشي جد ما بقدر أتقبله نفسياً
فبعد بفترة صرت أغنوستيك.. لا دينية و بنفس الوقت ما بشغل بالي كتير بالغيبيات وبميل أكتر إنه ما في إله بس ما بنكر إنه موضوع وجودنا كله بيبهرني حتى لو كان فيه عيوب على مستويات كتيرة

كتير مرات لما أحس حالي كتير كتير ضعيفة من جوة بقول "يا رب" حتى لو بعرف إني عم بضحك على حالي بس هي بتكون متل الزفرة الكبيرة بس يكون حدا مدايق مو أكتر.. لأنه بطبعي ما بشكي للي حوليي بسهولة و لا بحب أرمي حمولي على حدا و كل إشي بعالجه مني لحالي لأني مو متعودة أعتمد على حدا و طلب المساعدة مو سهل عليي فكيف من "الله" اللي ما لقيته جنبي بمواقف كتيرة..في صديق قديم إلي هون بالنادي سهر معي ساعات بليلة كنت مدايقة فيها كتير و ببكي بشكل جنوني نتيجة موقف معين صار معي (لأنه بهيك مواقف ما كنت أثق بحد تاني غيره حتى من زميلاتي) تفاجأ ليليتها إنه ما عرف عني شغلات غير بعد أكتر من سنتين على معرفتنا ببعض لأنه فعلاً ما بحب أتشكون للناس حتى و بثق فيهم.. فكيف بدي أقدر أشكي ل "الله" اللي قاعد ليل نهار عالتلفزيون و لا هوي هون
اللاديني غير الربوبي دكتور غالباً بكون ترك تعلقه بفكرة الربوبية لأنه بكون عن جد دور على إله كامل و ما لقاه .. اللاديني غير الربوبي بيتمنى أكتر من البليفرز نفسهم إنه يطلع فيه إله بآخر المسلسل لأنه بدهم يقولوله شو كان صايرلك لحتى إنك سكتت عن كزا و كزا؟! هالقد المباراة اللي كنت قاعد ليل نهار تتابعها مهمة لحتى إنها شاغليتك عن ولادك؟

تأثير الدين .. أولاً أنا برأيي الأشياء المتعارف عليها إنها "اخلاق" هي اللي بتحفظ حق الجماعة بس مو بالضرورة - برأيي- إنها ختم للواحد إنه عن جد بني آدم من جوة ..فمشان هيك -برأيي برضه- الأخلاق نوعين: نوع "تنك" و هوي اللي بكون من باب أحفظ حقي و أتكافى شر غيري و أعيش بسمعة منيحة مشان أقدر أنفق بناتي بعدين.. و نوع "دهب أصلي" و هوي النوع اللي بلتزم فيه مشان عندي ضمير و ضميري شغال 100% ..برأيي الدين بعزز النوع الأول و إله تأثير سلبي على النوع التاني لأنه أنا بآمن إنه الخير لازم ييجي من جواتنا لأنا بنحب الخير مو لأنه في جزرة قدامنا و لا لأنه في عصاية ورانا
و برضه الشعور المزيف اللي بيزرعه الدين بالواحد إنه هوي أحسن من التانيين ( و اللي بدون هالفكرة أصلاً ما كان هالواحد آمن بهالدين من أصله) و بيتبعه فرض نوع من الوصاية الفكرية عالناس الغير.. هادي الفكرة بحد زاتها بمفهومي أنا لشو الأخلاق إشي ما بعتبره أخلاقي أبداً بعتبره قلة حيا برخصة
و بالنسبة إلي.. حتى أيام ما كنت شيخة بعمري ما عبدت الله لا لإني خايفة منه و لا لإني طمعانة باللي عنده فأخلاقي حتى من أيام الدين بعمرها ما ارتبطت فيه .. حتى بشوف ارتباطي بالدين بهديك الفترة كان من زود الأمانة اللي كان عندي.. لأنه كانت مرتبطة عندي بفكرة طفولية إنه الإنسان قد ما كان منيح ما بسير منيح 100% إلا إزا أخلص لدينه
تعليق بسيط: بالنسبة للجملة اللي استعملتها دكتور ( حسب النظام الإجتماعي العربي) ..النظام الإجتماعي العربي فيه حسناته ما بنكر (واللي موجودة برضه عند مجتمعات تانية) بس برضه مو بيئة منيحة لإنه "تنعنش" فيها منظومة أخلاقية متكاملة.. هي بيئة لساتها تقيلة و مو قادرة تقوم على حيلها من التابوهات اللي ماكليتها .. و لسا اللي عم ياكلها أكتر و أكتر الإزدواجية اللي كانت موجودة قبل بس عم تزيد هلأ بسبب انفتاحنا الكبير و اللي كان شبه مفاجئ عالحضارات التانية ..بنظري الأخلاق متل الهوية الجنسية للبني آدم بالزبط ما بتقدر تحكم عليها منيح غير ببيئة بيغلب عليها الطابع الحر المتحرر اللي قدر يكت عنه كل إشي بلا طعمة و يحمل حاله و يقوم مو الطابع المكبوت التقيل اللي لسا عم يشاور حاله يفز على حيله
فالنظام الإجتماعي العربي أنا ما بتناسب مع شخصيتي و ما بشوف حالي من خلاله على مستويات كتيرة حتى أيام ما كنت شيخة فما بقدر أفيدك بهالنقطة

(06-26-2011, 12:30 AM)الجوكر كتب:  traaaaaaaaaaa



هذا والله المستعان

جوكر جد انبسطت لما رديت شفت اسمك اليوم .. ولكم باك