(06-27-2011, 01:12 AM)الجوكر كتب:  

اقتباس:بابا الله يرحمه كان يعنيلي الثقة المطلقة

(06-27-2011, 02:24 AM)minatosaaziz كتب:  

(06-26-2011, 11:00 PM)Narina كتب:  

(06-26-2011, 09:52 PM)coco كتب:  سؤال لنارينا ومن حقك عدم الإجابة

ماذا كان يعني لك والدك ؟ وكيف أثر غيابه عليك ؟

كوكو

بابا الله يرحمه كان يعنيلي الثقة المطلقة .. الإنسان الوحيد مع ماما اللي حتى لو اختلفت معهم بالرأي حتى لو ما رضيت عن قرارات أخدوها أو همي ما رضيوا عن قرارات أنا أخدتها بكون متأكدة 100% ما رح يطعنوني بضهري.. يعني ما بظن في حدا ممكن يوفر هالإشي هادا حتى لو أقرب صديق .. حتى لو الزوج .. هادا الشعور الأساسي .. بس في شغلات تانية أكيد يعني مثلاً كان بيعجبني ببابا الله يرحمه شغلة كتير كتير و أنا أخدتها عنه و هي إنه كان بيحكي الإشي اللي بيرضي ضميره و بيمشي و ما بهمه حدا حتى لو بدها تقوم الدنيي و تقعد.. و برضه كان عنده مبدأين دايماً بيحكيهم و ماشي عليهم.. الأول: "عز نفسك تلقاها" و التاني: "هين فلوسك و لا تهين ناموسك" .. كان بحرص إنه ما يكون إنسان مادي و بنفس الوقت علمنا على هالإشي.. كانت نفسه كريمة و علمنا هالإشي كمان.. برضه كنت أحب حضوره الإجتماعي و الهيبة اللي كانت إله بس بشكل محبب يعني مو نفخة و عراضة و مظاهر فاضية و هيك .. برضه أسلوب تعامله مع الزغار اللي بيقربولنا ..و كان عنده شوية قسوة مرات بس أخدني كتير وقت لحتى أفهم إنه هالقسوة كانت من كتر حنيته..
بتزكر كمان إنه كان ينحرق دمه حرق على ظلم بني آدم مسكين و كان يساعد كتير.. مثلاً في ست لحد هلأ بتيجي عند أمي لأنه حمل وراق بنتها تبعون الجامعة مرة ووداهم للبريد لأنه انحرق دمه عالبنت لأنها جابت من أوائل المملكة و بنفس الوقت جابتها و صاحبة البيت كانت قاطعة عنهم الكهربا مشان الفواتير!
كنت أحب مثلاً إنه بس يدخل بمشاكل بتنحل بسرعة.. يعني مثلاً مرة شب عنا خطف بنت مشان يتجوزوا (نحنا عنا عادة الخطيفة) فأبوها للبنت إجا و هوي معه مسدس و كتير معصب لأنه كان صاير حكي بين العيلتين من قبل .. المهم الرجال اللي كانوا موجودين استغربوا إنه أول ما بابا حكى معه كلمتين الزلمة راق .. و هيهم هلأ الشب و الصبية ماشالله عنهم عندهم بنوتة متل القمر
كنت أحب فيه إنه عنده فراسة مو طبيعية .. يعني كان إله نظرته بالناس
برضه بحب إنه كان عنده بعد نظر .. يعني بيعرف يقرأ اللي ورا الموقف اللي بسير قدامه و كتير مرات كنت أشوف المسلسل اللي قال عنه رح يسير بعد بفترة
كتير شغلات من اللي قلي إياها لحد هلأ بترن بإدني و بتزكرها بمواقف كتيرة
و برغم إنا كنا نختلف كتير بوجهات النظر بس جد بدمع كتير بس أتزكر هالمواقف لأنه لما بفكر مزبوط بلاقي كتير من الشغلات اللي بحبها بحالي هلأ هوي اللي زرعها فيي

أثر غيابه عليي كتير من جهة خلاني أندعك بالحياة و من جهة تانية حسيت إنه شعور الأمان المطلق هادا خلص راح لأنه حتى ماما الله يخليلي إياها برغم كل الطيبة و الإنسانية اللي عندها هلأ ما رح تقدر تقدملي اللي هوي كان يقدمه .. بس بيكفيني مرات إنه لما أصادف حدا و يشوف اسمي على معاملة أو هيك و يصدف إنه كان بيعرفه لبابا بقلي إنت بنت فلان الفلاني .. الله يرحمه أبوك كان من أحسن الناس بالمنطقة الفلانية ..
ما في حدا ممكن يوجهلك كلام قاسي و بنفس الوقت تكون مطمن 100% إنه فعلاً عم يحكي بهالقسوة هادي مشان مصلحتك غير الأب و الأم

نارين .........ان كنت لا تؤمنين بالله فلا املك الا ان اقول لك الله يعزيك ،الالم والحزن يصرخ من كلماتك ،انا اعجز ان اعبر عما اشعره في هذه الكلمات لكن اتمنى انك تجدي رجاءك عاجلا او آجلا في ان تلتقي بأبيك العظيم ثانية .