مستحيل أقدر أتخيل إنه هالإشي ممكن يكون وضع سليم
يمكن لأنه التوافق الفكري على كتير شغلات مو بس الدين أبدى عندي من أيا إشي تاني
العلاقات اللي بكون فيها الرجل لاديني و المرأة متدينة غالباً "بتمشي" بس ما بنقدر نقول عنها ناجحة.. و بتمشي لأنه غالباً الرجل فيها بكون بساير حبيبته أو زوجته الحبيبة
أما الوحدة اللادينية تكون مع واحد متدين هادي فيها غلبة كتييييييييييييير .. غالباً رح يوجعوا راس بعض
أنا صار معي إنه طلبني شب كتير آدمي وراكز و متعلم كتير منيح بس شيخ بفترة أنا كنت لسا فيها محجبة بس كان مبلش عندي الشك بالأشياء اللي كنت أآمن فيها وقتيها و يا دوب كان صايرلي أسبوع فاتحججت إني ما بدي أرتبط بحدا بقربلي و أهلي اعتذروا للجماعة بعدين .. لحد هلأ بقول يا لهوي لو كان طلبني قبل بأسبوع بس جد بعرف كنت رح أوافق و بعدين لو طنت ببالي هالأفكار شو كنت رح أساوي!

ما بعرف أنا بشوف إنه الإشي الحلو بالحياة اللي فعلاً بيستمر إنه الناس اللي بشاركوك فيها يكونوا بشاركوك أفكارك كمان.. أما إزا الواحد حط حاله ببيئة ما بتناسبه بضله هوي متل الغريب عن حاله و عن اللي حوليه و برضه همي بكونوا متل الأغراب بالنسبة إله كمان..و هادا الحكي بالنسبة إلي بيشمل الصحاب كمان .. و حياة الواحد أغلى من إنه يضيعها و هوي مو مبسوط أو حاط حاله بوضع يضطر يكون فيه متنشن مرات

يعني متل ما مرات الواحد بييجي على باله يحضر شي فيلم حلو أو يطلع شي طلعة حلوة مع صحابه رح ييجي على باله بمرة من المرات ينكت على حكيات الحويني أو غنيم أو بطيخ عالتلفزيون و لا الإنترنت مثلاً .. فجد مو حلوة يحس حاله مو قادر يحكي اللي جواته من هالناحية قدام ناس مفروض إنهم كتير قراب إله

يمكن ناس ما بتفرق معهم الأفكار بالعلاقات و بيقدروا يمشوا .. بس أغلب الظن بتكون علاقات ناشفة

العلاقات اللي فيها توافق على كتير شغلات مو بس الدين كتير أقوى من العلاقات اللي بيجمعها حب طفولي بس
حتى اللادينيين نفسهم على درجات من الأخلاق.. يعني مو بس لأنه صار لاديني يعني صار بيفهم.. في ناس كتير لادينيين بس مولدنين يعني بتلاقيه بسير لاديني بس لحتى "يريح ضميره" من ناحية إنه نسونجي أو سكرجي .. بالزات بالبيئات المكبوتة ..برضه في نسبة مثلاً كبيرة عندهم كبرة على خازوء .. فموضوع العلاقات كتير مشلبك و بترجع للواحد هوي شو بناسبه و بيختار على أساسه .. بس اللي بيختار و بعدين بسير يلوم الطرف التاني و يسير بده يعدله و يفصله على مزاجه هون بييجي الإشكال .. من رأيي الواحد من أولها يحاول يختار صح بعيد شوية عن حركات الرومانس تبع مهند و نور و الأطلال و البطيخ مشان بكرة ما يتندم و إزا صار و اكتشف إنه اختار غلط يواجه مو يروح يعالج غلط بغلط .. فاللي بده يختار متدين أو متدينة أو لا ديني أو لادينية يختار بس أهم إشي ما يسير بده يغيره بعدين