(07-20-2011, 09:35 AM)jafar_ali60 كتب:  انا لست ضد الحراك المدني ، بل هو ظاهرة صحية ومطلوبة فالحقوق تنتزع ولا ننتظرها منحة

الاخوان يحاولون استنساخ ميدان التحرير بكل الوسائل ، وللخصوصية تكويننا الاجتماعي الديموغرافي هذا سيكون سلبي

خرجت في الاردن الكثر من 2200 مسيرة واعتصام تحت حماية الامن العام التي اقتصرت وظيفتهم على العمل "جرسونات" يقدمون الماء والعصير
هناك تعليمات للامن بعدم حمل اي سلاح او حتى هراوة

ما جرى يوم النخيل هو وليد لحظته وكان شحن نتيجة فتوى الاخونجي ابو فارس حول الشهادة في الاعتصام
حتى في اعتى الديموقراطيات نرى الشرطة تضرب المتظاهرين رأيناه في كندا وجنيف .....الي اخر العواصم على خلفيات التجارة الدولية والعولمة وما حدث في النخيل اعطي اكثر من حجمه وفقط في اتجاه واحد اما الاتجاه الثاني لا احد يذكر جرحى الامن والادهى ان اثنان منهم طعنا بالسكين

اخاف على هذا البلد فهو اتوستراد ذو اتجاهين ، وحوار الشوارع لا ينتج الا الدمار

فلنتقي الله في وطن سنذبحه من وريده لوريده بنية اصلاحه

بالزبط
و هادي فكرة الموضوع كله من الأساس
في جماعة عم تستغل فكرة الحراك المدني لتنفيذ شغلات بتخصها و تصفية حسابات قديمة
و الأردن إله خصوصيته ..وتوب سوريا و مصر مو على قياسنا .. يعني بالعربي الفصيح السيناريو اللي صار هناك ما بسير نسمحله يسير هون تحت أي ظرف من الظروف .. أما اللي ما عم يشغل مخه أو مصمم إنه ما يشغله و بس حاب يعيش الدور و كتير محموق عالبطولات والمسرحيات فقدامه خيار من تنين يا يروح على مصر أو سوريا( بس لا يرجع و هوي عم يتبكبك و بحكي يرحم أيامك يا أمنا الأردني) يا أما على قولة هالختيار الله يسهل عليه: يروح عالشريعة هيها قريبة! أما كل أردني حر بحب هالبلد و ما بيرضى يبزق بالصحن اللي بياكل منه بقصد أو بغير قصد اعرفوا إنه ما رح يرضى بالولدنات و السواليف الفارطة و الحركات الإستعراضية

و أنا بقولها و بكل موضوعية أمنا و جيشنا و حتى مخابراتنا اللي كتير ناس بيتعرضولها بالهمز و اللمز بينحطوا عالراس لأنه بس قارنوهم بالدول اللي حولينا بتعرفوا الفرق هادا من ناحية و من ناحية تانية ليس كل ما يعرف يقال وبرجع بقول اللي حكاه الأستاز جهاد المومني .. هؤلاء لا يعجبهم العجب و لا صيام برجب .. و فعلاً هيك .. مجموعة كبيرة ما بدها إنه يروح الغلط بدها إنه يضل مشان تضل تأشر عليه و الأغبيا يقولوا شوفوا ما أحسنهم هدولي اللي عم يأشروا .. و هدولي بنقلهم إنتو ما بدكم وضع هيك بدكم واحد متل القذافي تحكوا معه و يسمعلكم بطيزه .. و على كل كل هاللي ما خلوا كلمة محمضة بتمهم ما قالوها عن الأمن و الدرك بكرة لما يسيروا بدهم يربوهم الجماعة اللي رقصوا بالسيوف لا يسيروا يقولوا وا أمناه وا دركاه لأنه لحد هلأ هالجماعة لسا بمرحلة الشوبرة (و بمزاجهم) بس إزا دخلوا الجماعة جدياً عالخط لا الأمن و لا الدرك و لا الله نفسه رح ينفعكم .. فبلاش تساووا متل فيديو الولد الزغير اللي ضل ينكش بالجاجة و يتشاطرعليها ينكش بالجاجة و يتشاطر عليها هيييييييييييك لحتى بس ركضت ناحيته اتبخروا العضلات المفرودة و السلف استيم كله

الأصوات اللي بتناسب هالمرحلة عنا بالأردن هيي الأصوات الراكزة المعتدلة التقيلة اللي جد عم تشغل مخها .. فالمندفعين اللي نيتهم عن جد نضيفة اشحطوا بريك شوية و عيدوا حساباتكم و حطوا إيدكم بإيد هالجماعة و فككم من (الهوّايات) اللي عم يخلوكم تفرقعوا عالفاضي

بعدين يعني إنتو عارفين و نحنا عارفين إنه هالحركات بشكلها الحالي مو أكتر من جعير عالفاضي فليش تضلكم تطلعوا بلا فايدة .. ليش ما تختاروا اللي بتحسوا إنهم بمثلوكم فعلاً و متل ما عم تقرقعوا الدنيي بإعلانات هالإعتصامات تضلوا عم تقرقعوا الدنيي لفترة و بشكل علني و مو عن طريق حدا إنه بدكم تحكوا مع الملك شخصياً و تناقشوه بمطالبكم .. يعني باللاهي هتفتوا من هون لبكرة الصبح عند دوار الداخلية و لا ما بعرف وين شو هالإنجاز العظيم اللي عم تساووه؟! يعني إزا نيتكم صافية ليش بتنطوطوا عن مراحل؟ يا أخي إزا نيتكم مزبوطة و هدفكم مو الفتنة اثبتوا للشارع هالإشي خليه يوقف معكم ليش عم تشتغلوا بأسلوب الجgامة هاد؟!

خالد على فكرة بعد ردك الأول جد ضحكت (لا تزعل مني) لأنه نحنا كنا عم نغني بواد و إنت بواد تاني تماماً و بعد ردك التاني تأكدت إنك لسا مو فاهم نحنا عن شو بنسولف و فايت متحمض و بدك تحطلك كلمتين (في الصميم) فقط لا غير .. على كل بعد شرح العم جعفر بتمنى إنه فكرة الموضوع تكون وصلت