وأين سيتحاورون؟ في فرع فلسطين؟
كلامك للأسف طوباوي، أنت تتحدث وكأن الثوار يحكمون البلد بينما هم يحاولون إيصال صوتهم بأي شكل كان.
عندما حاول بعض الثوار حماية مقر الحوار الوطني تبع الإنقاذ الوطني بالقابون، قتلوا 18، هذا مش رقم بسيط، ومش تحريض، هذا رقم حقيقي عن 18 فتى قضى ومات برصاص الأمن العربي السوري لمجرد وقوفه أمام صالة معدة للحوار الوطني لإنقاذ سوريا.

أنت عمبتحكي عن الأخضر واليابس، بس جيشنا العربي السوري المدعم بفرق الموت الطائفية من الفرقة الرابعة والحرس الجمهوري والشبيحة اللي جايبينهم من الجبال بالساحل تقوم فعلياً وحرفياً بحرق الأخضر واليابس، نحنا صرنا جوات هالجحشنة، وبفضل النظام الممانع المقاوم. ربما بس أهلنا ببعض جبال العلويين مش حاسين بالمعركة اللي صايرة، بس هي صايرة. ويجب يكون في وعي باللي عمبيصير.
للمصداقية فالغالبية العظمى من الثوار والمعارضة جل شأنها منع أي اقتتال طائفي مستقبلي. بس أنا ما عمبحكي عن الفضاء السياسي والدبلوماسي والإعلامي .. عمبحكي عن الأرض والوقائع. عالأرض في احتقان، رغم أنه أغلبية الناس ما بدها يصير شي طائفي، بس النظام عمبيحرضها لهالاتجاه.
لذا يجب انخراط شباب علوي فيها ليعبر عن رفضه لممارسات النظام باسمه.
وإلا سيعيد التاريخ نفسه. من قمع واضطهاد بين الأقليات والأغلبية. و عفكرة الشي مش رح يكون مثل بلبنان، ولا بالعراق، هناك طوائف شبه متوازنة، بسوريا هناك أغلبية سنية مطلقة. لذلك أعتقد أن النظام مش واعي شو عمبيسوي, وأنا من رصدي لنبض الشارع فعمبشوف أن الدروز والمسيحية مثلاً ضد النظام، وكلمالهم عمبيكونوا ضده أكثر. لذا لن يبقى للنظام بسوريا بعد حين إلا أقلية داخل الأقلية.
فحذار حذار من الاعتقاد بأن الأمور يمكن أن تكون بشاكلة ما حدث بلبنان والعراق.