شوفي يا آنسة نارينا،

في شي اسمه ذوق وادب، يا ريت لو تتحلي فيه لمن تحكي مع حضرتي، لأن حضرتي ما كنت ألعب مع حضرتك بالحارات ونحنا صغار ولا درسنا بالمدرسة سوا، فكلمات مثل تبرطم وبالعضل وأبو الخل وآنس وسائر الحكي يللي ما اله طعمة يا ريت تحتفظي فيه لشخص ثاني ماخذة عليه وجه، بس معي بتحترميني مثل ما بحترمك، وحاج نتصهون بس نحكي شي جد. بالمناسبة كلمة آنسة متل كلمة ست بستعملوها للاحترام، ومقابلها كلمة سيد وما في داعي تستعمليها معي ما رح تزبط معك.

بعدين ان عاجبك الحكي يللي حكاه كايروس روحي اعمليلك اضافة مفيدة ممكن نقراها، وركزي معنا شو نحنا بدنا، وشو انت وكايروس بدكو

نحنا بدنا الناس تكون أحرار، تحكي شو ما بدها وتدعم المنهج السياسي يللي بدها، سواء عجبني وعجبكم منهجهم اما ما عجبنا، لأنا عدم المؤاخذة مش أولياء أمر العالم.
انت وكايروس بدكم حرية مفصلة على مقاسكم، توسع ناس وتطرد ناس، هاد الحكي ما عاد مشي وراح وقته وصار زمان، وجرب صاحبكم في مصر، قصدي مبارك، جرب يجيب فزاعة الاخوان المسلمين حتى يخوف العالم، وفشل، وليكه صاحبكم في سوريا كمان عم يجرب وفشل، وصاحبكم في ليبيا جرب وفشل، وصاحبكم في اليمن جرب وفاته القطار وفشل،.... حاج عاد، كل ما واحد حكاكم كلمة بطلعلي واحد يصيح إخوان مسلمين، وخلافة، وأنظمة رجعية، وما بدري شو، فضحتونا عاد، من وقت ما دخلت البساطير على الخط في الخمسينات لليوم وانتم ماسكين المسبحة هاي لفقدنا كل شي اسمه انسانية، لوين بعد بدكم تودونا بحجة خايفين من الاخوان والاسلاميين؟

بعدين الاخوان مش كعّة، أردنيين مثلهم مثلك، والهم حقوق زيك، بالعكس مدحهم الملك حسين في عهده ما لم يمدحك الك، واعتبرهم صمام أمان للبلد. هلأ مع تحفظي على الكلام هاد، كله ما بهمني، يللي بهمني أن لا نحجر على أحد بسبب رأيه السياسي مهما كان بعيدا عنا.. طالما هو ضمن السياسة وما صار أعمال عنف وأعمال مادية وما شابه ذلك.