ليش انت شايف دعوتي الى استعادة العالم الاسلامي تحت مسمى الخلافة خيانة عظمى يعني استحق عليها الاعدام او المؤبد او النفي من الأرض، وفوق ذلك الارهاب لمنعي من قول قناعتي... بينما أنت بدعوتك الانعزالية الداعية لتفصيل شعوب على مقاس مؤتمر سان ريمو وسايكس بيكو ينبغي أن تعتبر دعوة مخلصة تتنفس الهواء وتشكل الأحزاب وتقوم بالمعارك الخ...

خوش حرية مفصلة على القد

بس نحنا يا عمري ما عم ندعو لا للخلافة ولا لغيرها، وان كنت أتمنى عودة الأعضاء إلى جسم واحد لكن ليس هنا محلها، ولا بدي أعرق وأنا أثبتلك حكم الله وحكم العبد، ولا مهم عندي تقتنع انو نحنا امة واحدة او عشرطاعشر امة كل هاد ما مهم.

المهم انك تقبل انه متل ما بدك تقول رأيك وتعبر عن فكرتك غيرك بده يقول رأيه ويعبر عن فكرته، ومتل ما برنامجك السياسي مبني على الانعزال غيرك برنامجه السياسي مبني على الوحدة او ثالث مبني على الاتحاد، ومثل ما برنامجك السياسي اساسه فصل الدين عن الحياة والدولة غيرك برنامجه بده يقوم على الايمان بالخالق المدبر، حقك ما تقتنع بالبرامج الاخرى وتدعو الى نقيضها لكن مش حقك تجبر غيرك ان يترك مشروعه بحجة الخيانة العظمى او غيرها من ادوات الاستبداد.


هلأ نيجي لبيت العتابا يللي بتغنيه السلطات المستبدة ومن يدور في فلكها من "العالمانيين" المتلبرلين جماعة حقوق الانسان بعيد الشر.

بيت العتابا بقول انو لو الاسلاميين مسكوا السلطة رح يطخوا الحصان ويشلوا عرض العالم ويبلطوا على الكرسى حتى يوم القيامة.

ايه والنعم والسبع تنعام، وريته عامر وتخبزوا بهداة البال، بدك نترك المشكلة يللي واقعين فيها لنحل مشكلة بجوز نوقع فيها وبجوز لأ؟ بدك نسلب حرية الناس بحجة انه الاسلاميين، يما البعبع يللي بخوف هول بصلوا وبصوموا، ايه هول بجوز يسووا شغلات عاطلة ما بدنا نحكيها.... يا عمري لمن العالم تختارهم لا انت ولا انت اوصياء عليهم، ولمن يوصلوا بمجهودهم للشارع بدون عنف ساعتها صحتين على قلبهم والحق على يللي نام وما اشتغل لوصل غيره... بينما الاستعانة بالمستبد لفرض الانعزال والعالمانية، فهذه ستدفع الناس دفعا الى حضن خصمك السياسي، وهو من صالحنا على المدى الطويل.

نيجي للعبد الفقير يللي هو انا، انا يا عزيزي ما جاي من المريخ وربيان بالبلد يللي انت ربيان فيها، ولغتي العربية ما اشبها شي، كلمة مخيخ تصغير احتقار، والمتداول للمعنى يللي انت بدك اياه هو اللاشعور، فكان احسن تقول علقان الخلافة باللاشعور عندك، اما المخيخ على الحقيقة فلا اله علاقة بالارادي ولا باللارادي، هول بصير عندك المخ والبصلة السيسائية والنخاع المستطيل ما بهم هلأ.
المهم عزيزي انه رغبة خالد باستعادة الوحدة تحت اي مسمى المفروض ما تكون مرعبة طالما ان خالد يدعو الناس اليها بالحكمة والموعظة الحسنة، كل ما هنالك انك تقنع اهل لبنان انهم امة دونا عن الامم وانه دولتهم هاي هم اوجدوها مو غورو ولا الدولة العصملية ولا مؤتمرات دولية، واقنع الناس وصحتين على قلبك.

وكون انو انا لبناني كمان بس مع تعديل الدستور اللبناني الحالي لالغاء التمييز بين الذكر والانثى او بالاحرى تعديل قانون الجنسية لتعارضه مع الدستور الذي يجعل اللبنانيين واللبنانيات متساوين في الحقوق والواجبات، وكون انه ابني لبناني لنفس السبب، فرح نتدخل بالشأن اللبناني من اعرض ابوابه، وادعو من موقعي هذا كلبناني الى الغاء الكيان السياسي اللبناني مع الابقاء على البلد لمصلحة البلد واهله. 

اقول قولي هذا واستغفر الله العظيم لي ولكم فاستغفروا الله