شو هاي الترباية النظيفة يللي انت متربيتيها؟

انك تطولي لسانك على يللي عم يحاكيكي اسمها ترباية نظيفة مثلا؟
انك تطالبي بالدعس بالبساطير على روس العالم يللي خالفوكي بالرأي بكون ترباية نظيفة؟
انك تحتفلي بضرب المناقل على روس العالم هاي كمان ترباية نظيفة؟

انك تصنفي العالم من جانبك مين أردني ومين مش أردني بناء على اقترابهم وابتعادهم عنك كمركز للعالم هاي ترباية نظيفة؟

مرسي كتير لالك، بس هيك ترباية ما بتلزمني، خليلك اياها تفرحي فيها مع الشرطي يللي ضرب المنقل على راس الزلمة، انا بفضل الترباية الوسخة يللي بتعترف بحق الجميع في التعبير بنفس القدر، وتعترف بحق الجميع في ممارسة السياسة بنفس القدر، ولا تسعى لإلغاء الغير تحت أي سبب، وترى مكانا للجميع، حطي تحت الجميع اربعمية خط، ترى مكانا للجميع تحت الشمس،

وبصفتي أردني أبا عن جد عن جد جد، من أيام ما اجا صلاح الدين واجينا معه على الحارة يللي تسمت سياسيا بالأردن بعد تسعمية سنة من وصولنا، فأنا أجد الحق لكل من يقيم في الأردن مدة ستة أشهر أن يشارك في جميع الشؤون المدنية والبلدية، ومن يقيم في الأردن مدة ثلاثة سنوات أن يمارس السياسة مثل يللي ساكن فيها من قبل الهزة، وكل من أمه أردنية أن يحصل على الجنسية بالولادة بالضبط مثل من أبوه أردني ويحصل على الجنسية بالولادة.