عزيزي ابن سوريا

اقتباس:لنكن واقعيين هالة، النظام بسوريا لن يسقط سلمياً، لأنه لا يعبأ بأحد، ولأنه يمسك بالجيش من أعلى من خلال أجهزته الأمنية، لذلك لا حل لهذا الاستعصاء إلا من خلال الإنشقاقات المتوالية والضربات النوعية للشبيحة والأمن. الشارع مقتنع تماماً بالخطوط الثلاث للمرحلة الحالية
- جيش سوري حر يدافع عن الناس من خلال حرب عصابات
- مجلس وطني يدعم الثورة في الداخل مادياً ومعنوياً و من خلاله حماية دولية وضغط دولي بكل الأشكال الممكنة
- استمرار التظاهر السلمي الذي يشكل الزخم الأساسي والرئيس للثورة والموجه لدفتها
النظام سيسقط لكن السؤال: ما التكلفة؟!

قبل ما نحكي عن النظام و ان كان ممكن اسقاطه سلميا أو بحروب عصابات اسمح لي بكم نقطة مش نازلين الي من زور:

- الارتماء بأحضان تركيا: تركيا راحت و لا اجت عضو ناتو و ألف خط قاني تحتها. و المكتوب من عنوانه بينعرف.

- الحماية الدولية اللي برهان غليون نازل يشرح فيها. ليش بيشرح أصلا لو الموقف نقي و سليم؟؟ و هو فيه شي بييجي من الغرب ليحمي سواد عيون الشرق و بس؟ هيك لله فلله؟ ايمته كان الغرب أصلا في صف الشعوب و تحررها؟ و ان كان الغرب صار يستخدم منظمات حقوق الانسان و المحاكم الدولية في مؤامراته (ضد البشير مثلا و تقسيم السودان) فهل سيقوم بحماية بينها و بين التسييس دنيا؟

- المجلس الانتقالي تبع اسطنبول (من كثر التشكيلات صار لازم نوضح). هو انتو لسه حققتوا شي لحتى تشكلوا مجلس انتقالي؟ ثوار ليبيا كانوا حققوا انجازات فعلية و حرروا العديد من المناطق قبل ما يشكلوا مجلس انتقالي. على شو مصربعين؟ أم انه ضغط تركي -و بالتالي غربي- لحتى تكونوا جماعة "مؤتمر لندن" العراقية حين يشتد أوار الصراع؟؟ و برهان غليون ليبرالي و الاخوان المسلمين ما الهم دين و براجماتيين بامتياز.

- الشحن الطائفي: وين دور هالشخصيات القيادية في ايقافه و التصدي له؟ أنا بشوف انه التصدي له أهم من تشكيل مجلس انتقالي لأنه لو دبت حرب أهلية لا حينفع ذراع عسكري و لا فخذ عسكري و لا حتقدر تحدد عدو رئسي و عدو ثانوي حتى تحارب. الف طرف داخي و خارجي سيلعب في هيك معمعان و هيك فوضى.

- الشارع المنفلت و اللي عم بيقدم تضحياته بشكل مستمر و بتقول انه الزخم الأساس للثورة. انا بشوف انه المعارضة مشغولة بقضايا فوقية و شكلية عن الشارع الفلتان. و التصرفات الفردية هي اللي حاصلة. لا تعبئة و لا تسييس ولا تنظيم و لا التزام ببرنامج و لا ولا ولا .

- التضارب الاعلامي و قصصه و رواياته. بسبب ضعف و هزال أداء المعارضة و كل واحد بيحكي او بيكتب اللي بدو اياه. الناس ملت بسبب حيرتها تصدق مين و لا مين. مما يعني كفرت باعلام المعارضة (النظام مكفور منه من زمان) و هاي مسألة فقدان ثقة و لها خطورة لا يستهان بها.

- اقصاء بعض الأطراف من اللقاءات بحجج واهية. يعني من اقصاء الى اقصاء و من استبداد الى استبداد!

- اللجوء الى السلاح. الاعتماد على كم منشق و شوية عمليات تهريب أسلحة لن تجعل الصراع بينكم و بين النظام متكافئا و لا بتضمن تسريع الثورة. لأنه النظام عنده أسلحة تفوقكم كما و كيفا و كمان لن يعدم من يموله و يمده بالسلاح فهو لا يقف وحيدا. كما انه من الوارد جدا أن أطراف دولية تمد الجهتين بالأسلحة حتى تشتعل سوريا و تنهك و يزبط التقسيم.

نهايته
يا عزيزي
انا رايي قبل ما تواصلوا المسير تتوقفوا قليلا وقفة مراجعة و تقييم و نقد ذاتي و تولوا مسألة تنظيم و تعبئة و التواصل مع الشارع الثائر أهمية أولى.