عودة إلى توصيات لجنة حقوق الإنسان .

(11-05-2011, 05:55 PM)نظام الملك كتب:  عزيزى السيد بهجت
اسمح لى ان أبدأ التعليقات على تقرير اللجنة ، وهى تعليقات أولية تتعدل بمداخلاتك القيمة ومداخلات الزملاء
............

اقتباس:4- تطالب اللجنة بالتحقيق فى ظاهرة وجود مجموعات منظمة من المدنيين المسلحين و الذين يتداخلون في الأحداث و يستهدفون المتظاهرين والقوات المسلحة ، وكشف هوية هؤلاء المدنيين المجهولين وإحالتهم للتحقيق والمحاكمة.

افضل لجنة تحقيق قضائية سياسية أمنية لهذا الامر لأن كشف من وراء هذه المجموعات على الملأ يذكرنى بطفولتى عندما كنت فى (حضانة الأطفال) ، فكنت ارى خيط زائد فى الجورب الذى ارتديه فأقوم بجذبه فيكر وراءه خيطا طويل ينتهى برقعة كبيرة فى الجورب لا يعود بعدها الجورب جوربا كما كان.
ولكن مثل هذه الامور تدار فى الكواليس وليس على الملأ ويتم فيها البتر والتصفية بتوصية واجماع.
..............

أخي الفاضل . ( اسمحو ليا استخدام اللهجة العامية شوية )
دخلنا ع الجد .
نبعد شوية عن جو المناكفات اللي عامله أصدقائنا أقباط النادي و نفكر في الموضوع بمنتهى العمق سوا .
1- هذه ليست المرة الأولى التي تنسب فيها أعمال خطيرة جدآ لقوى مجهولة ، هذه القوى ترتكب جرائم غاية في العنف و الخطورة و الجسارة ، كانها مش هاممها الدولة ولا حد أبدآ .. مرة تفجر منشآت بترولية في سينا ،و مرة تهاجم الأمن المركزي في حادث البالون ،و مرة تهاجم سفارة إسرائيل ووزارة الداخلية وسفارة السعودية و ... و ... ، ووصل الأمر إلى اعتبار جزء من سينا إمارة اسلامية !.
2- يعني الحكاية مش مرتبطة بماسبيرو ولا المتظاهرين الأقباط بس ، دي حقيقة واضحة و أساسية جدا و هامة للغاية . يعني نسف أنابيب البترول في سينا يمكن ان يكلفنا 7 مليار دولار تعويضات لاسرائيل ، شوف بقى لما يبقى كل اللي معانا 20ولا 22 مليار و يتاخذ منها 7 مليار تعويضات لإسرائيل و 10 مليار تعويضات بسبب الرجوع عن الخصصة ، يبقى باقي كام .. يعني اللي بيضرب عارف بيعمل ايه كويس قوي .
3- الأقباط و غيرهم بيشك في حكاية القوة الغريبة المجهولة اللي بيقولوا عنها ، مرة الفلول و مرة واحد غني من الحزب الوطني المنحل ،و مرة السلفيين و حتى أمريكيين و يهود و .. ، حتى إن واحد اقترح هزار طبعا إنهم يجيبوا واحد بيعرف في الجن عشان جايز يكونوا هم اللي بيضريوا في البلد .
4- أنا متاكد أن القوات المسلحة مضربتش نار ، مش عشان أدافع عن وجهة نظري ، دا طبعا يبقى هبل ، يعني واحد زي بيتكلم مع ناس فيهم عاشق الكلمة و نظام الملك و ..و .. مش هيدخل نفسه في تفاصيل من أجل المناكفة و السفسطة ، ومن غير ما يضيف حاجة مهمة . أعرف كويس ان بندقية واحدة آلي في وسط هذا الحشد يمكن بخازنة واحدة قتل كل الناس اللي اتقتلوا من ضرب النار و الدهس سوا . شوف لو واحد بس ضرب نار ب2 خازنة هيموت 40 واحد على الأقل ، يعني لو عشرة هيموتوا في 5 دقائق 400 واحد .
5- طيب مين اللي بيضرب و يقتل راجل عسكري في البداية ثم ناشط قبطي .. دا واحد جاي و عارف كويس قوي بيعمل ايه . طبعا مش قبطي ولا جيش يبقى مين ؟. الموضوع دا مش شغل المسيحيين ولا الكنيسة دول رغم الجعجعة مواطنين زينا بلا أي حول ولا قوة . فيه سلطة في البلد نايمة على ودانها أو عارفة وساكتة أو مش ساكتة و لكن مبتقولش ، كل دا غلط في غلط .طيب حتى لو فيه حاجة خطيرة قوي مخليا السلطة ساكتة لأن مصلحة البلد كده .. طيب تقول " يا شعب فيه حاجة عارفينها و مساكينها أو هنمسكها و استنوا علينا شوية " ، دا محصلش للأسف .
6- لابد من تحقيق من جهة فنية و مخابراتية بالأساس ولابد من اشراك الكنيسة في الموضوع كله ، طبعا مش كل الكنيسة مخترقة ، فيه البابا وهو راجل طاعن في السن و لكنه وطني و نثق فيه كلنا ، يشركوه و يخلوه في الصورة هو او واحد من طرفه يثق فيه 100% .
7- لو لاحظت لقاء البابا الاخير بالمجلس العسكري هتلقى أن اللوا موافي ( بتاع المخابرات للي مش عارف ) كان حاضر اللقاء رغم أنه كان ضيق و محصور .يعني فيه معلومة مخابراتية نقلوها للبابا من مصدرها مباشرة . للي هيقول أني أغير موقفي من البابا يبقى غلطان .. يعني انا ضد خلط الدين بالسياسة و عايز سياسيين مسيحيين هم اللي يتابعون الملف كله و يبقى البابا بعيد في كنيسته نروح نبوس ايده و ناخد البركة مسلمين و مسيحيين زي ما كنا بنعمل . يبقى أن البابا شنودة وطني جدا و مصري حقيقي و معنديش شك 1% ،و لكن الكنيسة مخترقة من اللوبي اليهودي عن طريق بعض أقباط المهجر ،و دي مشكلة الكنيسة بس لابد ان تساعدها الدولة بأجهزة المخابرات بتاعة البلد كلها .
8- في النهاية لازم تعلن الحقائق على الشعب كله ، حتى تعود الثقة بين الشعب و الجيش و الكنيسة ، لازم بلا تاخير ولا تلكؤ ،ولازم من معاقبة كل واحد حرق كنيسة ولا اعتدي على قبطي . حتى لو تسامح الأقباط فالدولة لا تتسامح أبدآ .. حق القبطي مش حقه لواحده و ليس من حقه التنازل ، دا حق كل المصريين و حق الدولة ، ولو تنازل القبطي دلوقت بكره هيلعب السلفيين بكل مصري يخالفهم لأي سبب .
9- يبقى كلمة في الموضوع ده .. نصيحة للأقباط بتوع النادي يدوروا على حد على مستوى الحوار و ليس المناكفة ، فنحن هنا جادون بالفعل .و اقترح لو مش عايزين ان بهجت هو اللي ياخد وجهة نظر الأقباط أن يختاروا زميلآ عربيا مسيحيا في الصورة ، بصراحة العك اللي عاملينو ميفرحش حد .