تحياتي للجميع

أنا دخلت بالصدفة على النادي ولفت نظري الحوار ده وانا بقلب في الصفحات
فعلا موضوع مهم وعاجباني طريقة التفكير فيه لو نزعنا منه العراكات الجانبية والشتائم
صحيح ما قرأتش كل حاجة لضيق الوقت

بس انا دخلت مخصوص لأني شايف ان فيه نقطة أساسية حتريحنا من كل الخلاف ده
إجابة سؤال واحد عشان نرتاح كلنا

هل نجح مبارك في إدخال الفساد إلى مؤسسة الجيش أم لا ؟
لأن الموضوع مركز على الجانب المسيحي ودوره فيما حصل
من خلال التركيز على تحريض بعض القساوسة المتطرفين، وممكن نوصل لنتيجة أن المؤسسة الدينية المسيحية دخل فيها الفساد والتمويل الأجنبي كما هو الحال في الحركات الإسلامية
طيب ومؤسسة الجيش؟

وعلى أساس إجابة هذا السؤال نقدر نعرف هل المجلس العسكري يحاول أن يثير زوابع معينة للنجاة بنفسه من المساءلة وفرض قيود معينة على شكل الحكم القادم بحيث يمنع أي رئيس وأي مجلس شعب من محاسبته بحجة الحفاظ على الوطن والرقابة على مدنية الدولة. أم انه مجلس من الشرفاء الأطهار الذين لا يبتغون فيما يدهسون إلا وجه الله فقط.

لو مؤسسة الجيش بما فيها من مجلس عسكري ولواءات كبار دخلهم الفساد يبقى هم غير منزهين عن ارتكاب الجرائم للوصول بالبلاد إلى مرحلة معينة يستطيعون من خلالها فرض حصانة دائمة على أنفسهم ضد أي محاسبة عن مصادر ثروتهم أو جرائمهم الأخرى.

ويبقى اللي بيطالب بالثورة ضد هذا الفساد لهذه المجموعة ممكن نوصفه انه متهور أو طوباوي ولكن لا يمكن ان نصفه بالخيانة. لأن كده كده لو فيه فساد في المجلس العسكري واللواءات الكبار وربما العمداء أيضاً يبقى حيحصل انفجار داخل الجيش في يوم من الأيام، وكل ما نستطيع فعله بتأجيل الأمر والابتعاد عن مواجهته اليوم بأي حجة مثل الاستقرار أو أمن الوطن أو غيرها هو أن نؤجل الانفجار داخل مؤسسة الجيش لتطهيرها من تراكم الفساد الذي خلقه نظام مبارك داخل المؤسسة العسكرية.

الشيء الثاني انه مش غريب شوية ان سليم العوا اللي قال زمان ان المسيحيين مخبيين سلاح داخل الكنيسة يبقى متجوز أخت اللواء الرويني قائد المنطقة المركزية والمسئول الأول عن أحداث ماسبيرو وعن الأوامر التي تلقاها الجيش يوم الأحداث دي؟

إلى أي مدى نقدر نقول ان المجلس العسكري مقتنع بنظرية ان المسيحيين مخبيين سلاح في الكنيسة والى اي مدى هناك كراهية للمسيحيين داخل المجلس العسكري؟

فهل المؤسسة العسكرية بريئة أم مدانة بنفس جرم مبارك وأحمد عز وجمال مبارك وصفوت الشريف؟
هو ده السؤال المطلوب اجابته عشان يكتمل الوجه الآخر للحقيقة
وشكرا
هذه الصورة من إحدى الاحتفالات العسكرية السابقة على الثورة، مع ملاحظة ان بعض ضباط الشرطة العسكرية لحد النهاردة لسه معلقين صورة مبارك في مكاتبهم ولما بعض الشباب المقبوض عليهم سألوهم عن السبب ضربوهم وقالولهم انتو فاكرين انكم شلتوا مبارك لكن احنا لسه شايفينه رئيسنا طبعا الجملة دي بعد حذف الشتائم القبيحة منها والركلات التي تلقاها أولئك الشباب المفرج عنهم والذين صرحوا بتلك الأقوال بعد إطلاق سراحهم.


وبعدين لو التحريض ضد المجلس العسكري والفساد في المؤسسة العسكرية بالطريقة اللي شايفينها النهاردة يعتبر تهور وطوباوية، ولو مش عايزين يحصل انفجار بسبب الفساد داخل الجيش وهو ما قد ينذر بانهياره عندما يأتي ذلك الانفجار. نعمل ايه من وجهة نظركم؟

انا شخصيا مش واخد موقف ضد حد او مع حد ومش تبع اي تيار سياسي بس انا شايف ان الثورة قامت عشان تنظف البلد من الفساد، ولو الجيش ما نظفش من بقايا مبارك والفساد يبقى الثورة حتفضل ناقصة. نكملها ازاي بأقل الخسائر على مصر؟

أسئلة محتاجة منا جميعا ان نفكر فيها بإخلاص
وشكرا لكم