يا رحمة

أول شي هام، لمن أقول لمهدي ابن عمي، هاي قصة عائلية بتخص السادة من قريش، إنت اش الك علاقة يا خزاعي؟

ثاني شي هام، عن جد عيب يا رجال يا محترم يا معمم يا قارئ كتاب الله ومتبع لمحمد وآل محمد إنك تتمصخر على أظافر أطفال درعا.. عن جد ما تصورت منك هيك، يعني افرضني أنا مهسهس، وبدي عصفورية، اش دخل أطفال درعا المساكين لتتمصخر على أظافرهم المخلوعة؟

ثالث شي، كمان هام، يوم ما كان خالد يكتب وكانت كتابته مؤيدة لرأيك كان خالد متزن ومنطقي، اليوم خالد خالفك فصار غير منطقي، ومهسهس، وروح قلبه دوا الفسفس. بتذكرني القصة هاي بإسلام عبدالله بن سلام، ورأي قومه به قبل أن يعلموا بإسلامه وبعد أن علموا به.

رابع شي هام،
كذا بمقاومة النظام السوري، وإن فلسطين ما بتيجي إلا عن طريق النظام يللي بيخلع اظافر الأطفال ويتهم المحصنات في شرفهن، اي انا كفلسطيني ما بدي اياها، وان فلسطين بدها ترجع عن طريق الظلم، لكان خليها لليهود أشرفلها وأشرفلنا.
لمن بدك تقاوم يا رجل يا حر، بتقاوم بالأحرار مش بالعبيد، ولمن بدك الشعب السوري يرضى أن أطفاله تعتقل وتخلع أظافرها، ويذهب أهلوهم ليتضاجعوا وينجبوا غيرهم كأن شيئا لم يكن، إيه هاد ساعتها شعب عبيد، وما بينفع إلا للحلاب والصرّ.
لمن تيجي قرود الدنيا تتدخل بمصير سوريا، فالمذنب الأول والأخير عن هذه المصيبة هو بشار، ومن لم يأخذ على يده من حلفائه، لو أنه جماعته ما رخوله الحبل لبشار، وقرصوله ذانه من أول يوم، وما خلوه يركن على إيران وغير الإيران، كان يمكن حسب حساب وما لعب بجماجم البشر لشبع.
عاد بدك تقلي مؤامرة كونية، يحرق أخت هيك مؤامرة، لك برحمة ضميرك يا شيخ رحمة، بتعرف لو حسبنا ضحايا النظام السوري من السوريين، وضحايا كل مجرمي الأرض من السوريين، إنه النظام السوري رح يحط تيمور لنك وهولاكو بجيبة الفراطة؟

بتعرف يا رحمة؟
إنت قاعد كل ليلة بمجلس عزاء جدي وسيدك الحسين، لكن على ما يبدو أن قصته لا تدخل قلوب كل من يحضر العزاء، بل كثير يسمعون القصة ويبكون الحسين وينصرون يزيد.

بعدين سبب أن خالد ذكر جده الحسين، وهو جدي من ناحية الأمهات وعمي من ناحية الآباء دون عنك، هو افتراءك علي سابقا ونسبتي إلى يزيد، وهو أمر ينبغي أن تحذر منه حين التعامل مع أولاد الحسنين. ثم لا يوجد من عيب من افتخار بالحسنين، العيب هو في نصرة يزيد.

طبعا لو أني قلت نفس الكلام لكن في معرض الدفاع عن نظام خلع أظافر الأطفال كان كلامي منطقي جدا ومقبول لديك.

---

برضه بنرجع بنقلك يا صاحب الفضيلة رحمة،

نحن نقر ونعترف أنه نحنا جماعة الثوار تابعين للمشرق والمغرب والزهرة والمريخ والمشتري، ونحنا ما حقنا فرنكين بسعر الغلا.

تفضل شرّف يا محترم يا مخلص يا وطني يا غيّور على الوطن والأرض والإنسان والأمة، وأعطي السوريين طريقة للخروج من تحت بسطار آل الأسد، إلا إن كنت شايف أن الموقع الطبيعي للسوريين هو تحت بسطار آل الأسد، بجوز شايفها مكرمة للسوريين أن يبقوا تحت بسطار آل الأسد مدى الدهر..

بس ما عم أفهم، ليش السوريين فخر لهم أن يبقوا تحت بسطار آل الأسد، ومش فخر للبحرينيين أن يبقوا تحت بسطار آل خليفة.. ما عم تنعرب معي.

بس الموضوع على ما يبدوا، إنه سقوط آل الأسد سيسرع بخروج السفياني... وشكلكم خايفين منه، رغم أنه المهدي ما غيره ممنوع يطلع على الناس لحتى السفياني يذبح نصهم.