والله مو قياس حنبلي، شكله جعفري، بس نسبة لجعفر الطيار مو جعفر الصادق، مو مشكلة اثنيناتهم سادتنا واللهم صل عليهما

ناس عم تموت، ناس عم تنازع، شو بدك يعملوا يعني؟

أنا من 9 شهور تقريبا، من وقت ما فتحت معك قريحة الممانعة والتصدي والصمود وماشابه، وعم بقلك أنا معك، هول المجلس المابعرف شو اسمه عرصات وعكاريت، انت الحل وانت الأمل يا رحمة، نريد حلا، بدنا طريقة لنطلع من تحت بساطير آل الأسد..

مافيهاش جمهورية المستضعفين في الأرض، يللي حبت المستضعفين في كل مكان وكرهت مستضعفي سوريا لسبب نجهله، ما فيها تزبطلنا طريقة نحنا المستضعفين أن نستولي على النظام السوري ونطرد الأسد، ويصير البني آدم السوري هيك محترم وحباب زيه زي البني آدم الإيراني تمام التمام.

عليم الله من كثر ما علي نور الله وصفلنا جنة إيران، صرت بدي أقدم طلب هجرة عليها، بلكي تأيرنت هنيك، قولتك بيقبلوا يأيرنوا مين ما كان، إما لازم مواصفات خاصة للأيرنة؟

يعني يا ريت تشوفلنا بمعيتك رحمة، هيك طريقة نأيرن فيها سوريا، بما إنو صارت وصارت، وخلينا نعيش بجنة على الأرض، ونخلص من آل الأسد..


إلا إن كنت شايف إنه آل الأسد معيشينّا بسوريا بجنة رح يحسدنا كان آدم عليها قبل لا ياكل التفاحة، بجوز يكون سبب إنه آدم أكل من التفاحة لحتى ينزل على الأرض، ويجي شي فريق من نسله يعيش في جنة آل الأسد.

رحمة، من أول بدي أعيد، وما بدهاش إعراب كتير

نظام الأسد استبدادي تسلطي قمعي، هذا موضوع كلنا متفقين عليه، ويللي ما متفق معي عليه صعب إني أثبتله إياه لأن صعب توضح الواضح.
خلع هذا النظام هو أولوية إنسانية ودينية ومذهبية، بصفتك من مذهب آل البيت المظلومين المستضعفين، خلع هذا النظام يجب أن يتقدم على كل شيء
تحت قيادة هذا النظام تحرير فلسطين مستحيل، استحالة ولوج الجمل في سم الخياط،

شي زيادة خذه في عين الاعتبار،
نظام استبدادي قمعي زي هاد، ما عنده مشكلة يبيع شيعة لبنان وحزب الله وحركة أمل، بالجملة أو بالمفرق للي بيدفع أكتر، بس هاد بشار حمار بالبيع والشرا، صدق لو كان حافظ بالأزمة هاي، كان باع إيران ومن لفّ لفّها، ببلاش إلا ربع وأنقذ كرسيه، بس هاد ولد شو بعرفه، إن كان ما بيعرف انه الجيش بسوريا تبعه مو تبع غيره، وما بيعرف إنها العالم عم تتقتل ببلاش إلا ربع بإسمه.

عن جد رحمة، طيحتوا حظ المذهب... يعني لو الله يبعث السيد محمد باقر الصدر أو السيد محمد حسين فضل الله، كان ما عرفوا هيك مذهب، فضلا عن الأئمة الكرام عليهم سلام الله، صدق ما حدا رح يفهم شلون صار المتمذهبين بإسمه يدافعوا عن أشكال يزيد ومعاوية.