(06-14-2012, 04:24 PM)فارس اللواء كتب:  أرى أن أخطاء جماعة الإخوان المسلمين وطمعهم بكامل السلطات هو ما أدى لهذا الوضع

كان يجب على الإخوان التريث..فسلوكهم مؤخرا اتسم بالإنفعال

تهييس سياسى
يصوروا لك شفيق و هو جالس مع اسقف من الكنيسة و يقولوا لك شوف الكافر ابن الكافر راح للكفرة يرشحوه و بعدين يصوروا لك محمد مرسى فى لقاء مع الانبا باخوميوس و يقولوا لك شوفوا الوحدة الوطنية لهم مالنا و عليهم ما علينا !!!
يصوروا لك شفيق بيتكلم مع وفد امريكى و يقولوا لك شوف العميل الصهيونى الامريكانى و تشوف وفد اخوانى فى لقاء نفس الامريكان فيقولوا لك فتح ملفات دولية جديدة و امريكا تدعم المنهج الاخوانى .. على اساس ان حمادة و شيمو امريكان برضه !!!
يقولوا لك النصارى الفلول هم اللى كسبوا شفيق و كسبوا دى يعنى النصارى دول كتييييييييييييير .. فلو اعتبرنا كل الاصوات اللى خدها شفيق من النصارى و ما فيش صوت نصرانى راح لحمدين كده و لا راح لموسى و خالد على كده و لا كده يبقى فيه 5.30 مليون قول 1.30منهم فلول اصلى يتبقى 4 فلول نصارى نقول نصهم متجوز و مخلف يعنى على كده الاقباط يوصلوا بتاع 13 ل15 مليون ... قوم يتمثلوا فى اللجنة التاسيسة اولهم عن اخرهم باساقفتهم بطوائفهم بسلاطتهم و باباغنوجهم ب 7 قوم يقولوا لك كده عسل اوى دول يا حلاالله ما يجوش 5 مليون و جهاز الاحصاء بياكد انهم 5 مليون مع انه هو برضه الجهاز اللى قال فى 2006 انهم 7 مليون .. يظهر الاقباط بيموتوا بس لكن ما بيخلفوش !!!!!
يتهمون حركة 6 ابريل انهم خونة و عملاء قبضوا من جهات خارجية ثم ياخدوا احمد ماهر مؤسس الحركة عضوا اساسيا فى اللجنة التاسيسية للدستور !!!!
يقولوا لك ديمقراطية و احترام الصندوق بس لو حد جه غيرى يبقى تزوير و مش حانسكت و حننزل الشارع ..ماحلاها عيشة الحرية !!!!
يمتدحوا عقلية البرادعى السياسية و انه الهام الثورة و مع هذا يطنشوه فى التاسيسية .. يظهر عملوا كده علشان الهام ما تزعلش !!!
حضرتك ترفض هيمنة الاخوان كفصيل سياسى على الرئاسة و البرلمان و الدستور و المحليات والشورى و النقابات فيقولوا لك انك مصاب بالاخوان فوبيا او يتهموك بالعدائية للاسلام .. تحدثهم سياسة فيكفروك فى الدين انت و اللى جابوك ..تحدثهم عن وقائع فيحدثوك عن نيتك الوحشة و نفسنتك و انك تهاجمهم لانك من جوه مش حلو !!!
تقول لهم ليس عصمة لبشر و على العقلاء ان يدركوا ان خطأ البلكيمى او فضيحة ونيس لا تعنى ان التيار السلفى كله هكذا و من منكم بلا خطية فليرمها بحجر اولا وعادى ان يخطىء رجل من هنا او رجل من هناك و لكنهم يخرجون فى مظاهرات لعصمة رجلهم ليعلنوا ان الامر تلفيق لان سمعة الرجل من سمعة التيار .. على اساس انهم شغالين على تيار 220 فولت !!!
يحدثوك عن احتمالية التزوير و يحذرون من شراء الاصوات من قبل النظام السابق و تجد صور الزيت و السكر و البطاطس الموزعة يمتلىء بها الانترنت بل و صرح عصام سلطان بحقيقة الامر بصفته من الاخوان سابقا و انه كان يستحى فعل هذا لكنهم يكذبوا عينك ويقولوا لك فوتو شوب !!!!
يحدثوك عن المصالحة الوطنية و ان اليد ممدودة للجميع و انه مرشحهم سيكون اجير عند الشعب ثم يعدون بالسحق تحت الاحذية للعائلات التى تؤيد شفيق و الذين سيصوتوا للنظام السابق و انهم اسياد للرجل الذى اختلف معهم !!!
يحدثك عن انه منذ الجولة الثانية لاعادة الانتخابات لم يحادث او يلتقى المرشد و المفروض انك تصدق على اساس ان كارت الشحن خلص !!!
يحدثوك عن ضرورة استقلالية القضاء ثم يهاجمون احكامه ثم يحتشدون امام اللجنة الانتخابية و المحكمة الدستورية للضغط ..اصل العملية مش ناقصة و القضاء لازم يفتح مخه شوية و يمشى حاله !!!
يحدثوك انه لا علاقة لحماس وما حدث فى الهجوم على السجون و تهريب اشخاص بعينهم ثم لا يقولوا لك كيف اتصل محمد مرسى بالمحمول بقناة الجزيرة يوم 28 يناير بعد تهريبه مع ان الشبكة كانت واقعة !!! على اساس ان هناك كشك الاسطى شريحة للاتصالات بالاقمار الصناعية جنب السجن و مسجل عليه رقم قناة الجزيرة و الدقيقة 50قرش بس !!
المرض ليس عيبا و لا ينتقص من قيمة احد لانه من يد الله و لا يد لبشر فيه لكن تكذيب المرض و انكاره هو العيب لانه تجمل قد يكلف الوطن استقراره !!

نبيل شحاتة 14 يونيو 2012