"طيب هاي مين بدّو يتزوجها؟"
سألني الشاب الذي تعرفت عليه قبل دقائق لا تزيد عن العشر وعيناه تتبعان فتاة مرّت من أمامنا متجهةً إلى شقتها عصر يوم صيفي معتدل يبعث في النفس التفاؤل...
كنت أجاري هذا الشاب في أكثر أحاديث السياسة والمجتمع شيوعاً والمتفق عليها أساساً بين الفلسطينيين في داخل الأراضي المحتلة عن مدى الظلم والتمييز الذي نتعرض له، ليس لانجذابي للموضوع أو للشاب نفسه لا سمح الله، فقد كنت أكثر في جانب المتلقي، وبين الفينة والأخرى أضطر أن القي جواباً من نوعية "مزبوط حكيك" و"بعين الله" اجابةً على منظومة اسئلته المتناغمة لفحص مدى تركيزي معه.

كان سؤاله الأخير مستفزاً بشكل عجيب، خاصة في أولى مراحل تحرري الفكري والتي كانت تتسم بطابع هجومي بذيء، وأدركت عندها أني بطور الدخول في صراع قد يصل إلى نتيجة لا تحمد عقباها دون أن أتمكن من أيصال وجهة نظري إلى كومة التخلف التي تشاركني المقعد في محطة انتظار الباصات.
رغم أن سير الحديث الذي كنا بصدد الدخول إليه مألوف لي، وأتعامل معه بمعدّل مرتين إلى ثلاثٍ أسبوعياً، إلا أن جواباً مباشراً لسؤاله كان عصياً عليّ، وبدا لي أن لا فائدة من طحن ردّ في عقلي يوفر علي وجع رأس، ولا بد مما ليس منه بدّ...
سألته بعفوية دون إظهار أي رغبة في إدارة حوار متشنج: "شو قصدك بمين بدو يتزوجها؟"
-"شوف كيف لابسة بنطلون أختها الصغيرة، وساكنة لحالها في تل أبيب، كيف أبوها سامحلها أصلاً أنا مش فاهم.."
نهضت من مقعدي أثناء حديثه ووقفت قباله مهيئاً نفسي لنقاش حامي الوطيس قد يتطور في أية لحظة إلى سباب قروي ينطلق من الديوث والخنزير نزولاً، وقبل أن ينهي جملته قاطعته مذكراً إياه أنها تسكن في تل أبيب بهدف التعلم...
-"وهون المشكلة، يعني لازم تروح على بلد يهودية تتعلم؟ أصلاً شو في شغل عنّا للبنات غير معلّمة مدرسة؟ ليش البنات بطلعن يتغرّبن لما الوحدة بتقدر تتعلم في بلدها؟ ومين قلك انهن كلهن طالعات للتعليم؟ لا حبيبي هدول طالعات مشان السهر ويتعرفن على شباب..."
بعد جملته الأخيرة قررت أن أتنازل عن حقي في الرد وهززت رأسي بإشارة موافقة مصطنعة متبسماً أتمتم "لا يصلح العطار ما أفسد الدهر"... وتفادياً للأضرار المحتملة التي تعيثها كلماته في هذا الموضوع رأيت أن الخيار الوحيد المتاح أمامي هو تحوير الموضوع فسألت
-"حضرتك شو بتتعلم؟"
-"أنا هون للشغل مش تعليم.. أنا مثلاً مش مستعد بأي حالة أتجوز بنت تعلمت بالجامعة"
-"كل واحد إلو نظرتو للموضوع..."
-"طيب وإنت شو رايك؟... بتقبل؟"
"أكيد بقبل.... وبرايي تسكر السيرة لأنو الموضوع مش رايح يخلص على خير"
قلتها وأنا أزيح بنظري جانباً وقلبي يلهج بالدعاء لأن يأتي الباص ويخلصني من عملية حرق الأعصاب الإحترافية التي نوى عليها صاحبنا، فقد كنت متأكداً أنه لن يتنازل عن صيده الثمين بسهولة...
-"ما إنت شايف شو البنات هون.... وإذا كانت مصاحبة واحد قبلك؟"
-"تصاحب واحد قبلي، وشو فيها؟.. حسابها عند ربها" وهنا بدأت ملامح صدمة تشق طريقها في وجهه.
-"بس كيف بدك تتجوز واحدة كانت مصاحبة؟ طيب بلكي عملت شغلة معو؟..." قالها بنبرة أشبه بنبرة أم تحاول إيصال فكرة إلى ولدها البليد.
-"قلتلك حسابها عند ربها.."
-"بقلك يمكن عاملة معو شغلة بتقولي ربها، فاهم شو يعني شغلة؟ يعني اذا باسها مثلاً أو طلع معها أو حتى بعرفش شو بعملو!" خرجت كلماته الأخيرة بتلعثم متخوفاً أن يضرب على وتر حساس.
-"اسمع عمي، فش طعم تكمل بموضوعك، فهمت سؤالك من الأول وجاوبتك..."
قطع جملتي بصرخة إنفعالية خرجت بشكل لا إرادي
-"ولك مستعد تتجوز بنت كانت مع غيرك حتى لو يعني وصلت أنو تنام معو" ويبدو أن انفعاله كان لازماً لتسهيل عملية خروج الجملة بصيغتها النهائية.
-"انت شو فارقة معك أنا شو بدي؟ مالو دمك محروق لهالدرجة؟ اه مستعد أتجوز بنت نامت مع حدا غيري، ومش رح اسألها اذا كانت مع حدا ثاني أصلاً لأنو مش شغلي، قديش عمرك إنت؟" قدرت أن يكون عمره 25-26 على الأكثر، فسمحت لنفسي بالحديث معه دون مراعاة فارق السن.
-"31 سنة" أجاب باقتضاب وقد انقلبت ملامح الصدمة الممزوجة بالغضب الى نوع من الإرتياح وكأنه قد فهم معادلة ما بعد جهد جهيد، ثم مد يده ليصافحني معرفاً عن نفسه
-"أخوك علي، أيش الإسم بلا زغرة؟"
مددت يدي وصافحته مبتسماً "شكلك أصغر بكثير، فعذراً اذا قلّيت أدبي معك.... محمد".
ما إن لفظت اسمي حتى انتفض كمن ضربته صاعقة فاغراً فاه وقد مال رأسه للأمام واتسعت عيناه
-"واسمك محمد؟ مسلم؟!!" ثوانٍ صامتة مرت قبل أن يتابع:
-" شو بتحكي انت؟ ولك شرفك، عرضك وبتقولي مش شغلي؟ ولا شغل مين؟ كيف بدك تقول لأهلك يروحو يطلبولك بنت إذا كانت مع حدا غيرك؟.... قصدي يعني بنت مفتوحة مش بس مصاحبة وحكي تلفون.... لا مفتوحة؟"
-"ولك شو هاي اللغة؟ شو مفتوحة؟ بتحكي عن بشر إنت مش علبة كولا..." وهنا عطلت كل خلية في عقلي قابلة لإعطاء الإحترام، خاصة بعد أن لاح الباص مقترباً، مما شجعني على قول الكلمتين من الآخر واذا مش عاجبو يبلط البحر
-"أولاً انت بناءاً على شو بتحكي عن البنات اللي بتعلمن في الجامعة؟.. بتعرف أصلاً وين هي الجامعة؟ وبتعرف شو.. أنا بتعلم في الجامعة وبعرف ثلثين البنات اللي فيها وأسفل وحدة فيهن أشرف منك.. أسفل وحدة فيهن على الأقل بتعرف تختار ألفاظها لما تحكي عن بني آدم.. يعطيك العافية"
كان الباص قد وصل فصعدت وتوجهت إلى أول مقعد فارغ قبل أن أفطن إلى أني أخطأت بالصعود قبله، ولم تمض ثواني حتى استقر في المقعد المقابل ومال نحوي وهمس:
- "اللي خانت أبوها وأخوها بتخون جوزها"
بدا عليه الرضا بعدما قال هذه الكلمات وكأنما ابتكر مذهباً فلسفياً يُعجز به مخالفيه، ولسبب ما قررت أن أطرح وجهة نظري فقط لأرى رده:
-"طيب عمي ركز معي شوي، لما أنا مصاحب وكل حياتي داير مع هاي وهذيك... ليش بدي أروح أبحبش على البنت شو عملت؟... بشو أنا أحسن منها اذا اللي هي ممكن تعملو أنا عملتو قبل؟.... ثانياً، أنا بعرف حالي إني مش رح أخون مرتي حتى لو كنت مع بنات قبلها....."
-"بس انت مش بنت..."
-"خليني أخلص حكي بدون ما تقاطعني، وهاي مش أول مرة بتعملها..... أنا مش رح أخون مرتي حتى لو نمت مع بنات قبل ما أعرفها، وبتعرف شو... مش رح أتجوز الا بنت نمت معها..."
- "طيب كيف بدك تعرف انها مش رح تخونك؟"
- "جاوبتك.. بما إنو أنا مش رح أخون، فهي برضو مش رح تخون"
كانت تطغى نبرة الغضب أو الضغط على كلانا من جهة، ومن جهة أخرى فقد حاولنا خفض الصوت منعاً للإزعاج، خاصة وأن الحديث في مكان عام مغلق مثل باص أو مصعد هو أحد أكثر الأشياء التي أنفر منها.
-"قلتلك إنت مش مرة، انت بتقدر تمسك حالك لما بدك، الزلمة بخونش اذا بدو... وهاي أنا نمت مع بنات قبل ما أتجوز أما اليوم "تُبت"... مستحيل أزني أو أخون مرتي"
وهنا كان قد بلغ بي اليأس كل مبلغ، فقلت له بلا مبالاة "كل الإحترام" وانتظرت بضع ثوانٍ لم ينبس بها ببنت شفة، ثم أخرجت كتاباً من حقيبتي، وفتحت على الصفحة التي كنت وصلت لها سابقاً.
-"بس تكبر طريقة تفكيرك رح تتغير..."
-"الشهر الجاي خطبتي" رددت مبتسماً وعدت إلى كتابي، فتمتم "مبروك" دون أن يقصد إسماعي وسرح بخياله بعيداً من الشباك...