بالله شو؟ إرهابيين بأمارة شو؟ نطوا على رئيس منتخب وحطوه بالسجن بدون ذنب ولا محاكمة ولا عقوبة؟

فاشلين مزبوط، بس مش الجيش يللي بيطلع بدون سلطة شرعية وبيتدخل، الجيش بيقعد بالثكنات والله يعطيه العافية.. فيه بالبلد شي اسمه سلطة قضائية، هي الحكم وقت النزاع مش الجيش.

بتتدخل السلطة القضائية، بيطلع مثلا سبع قضاة من المحكمة الدستورية محترمين، بيشكلوا قضية وبيحكموا فيها وبتنحل القصة.

لأن إنت حكمت على مرسي بس لأنه إسلامي، لأن عند حضرة جنابك كل إسلامي إرهابي، لكن شو رأي مرسي بالموضوع، وين دفاعه عن نفسه، بجوز أنا وإنت نكون ظالمينه.

أما بالنسبة للحشود المجتمعة يللي حضرتك تهمتها بالإرهاب، فيا ترى العالم يللي طلعت ب30 الشهر كانوا مصريين لأنه إجوا على هواك، ويللي طلعوا اليوم كانوا شراميط مثلا؟

لأ عزيزي، الطرفين مصريين، وأنا مع إقالة مرسي ومع رأي جماعة 30 الشهر، لكن ضد أن يكون العسكر طرف في أي شيء هنا، أنا ضد أن يدخل الإخوان الحكم مش حرصا عليهم، بل حرصا على مصر أولا لأن سقوط مصر يعني سقوط الجميع، وحرصا على الإسلام السياسي يللي خلى ناس مثلك ومثل صاحب الشريط يشمتوا فينا..

هلأ فيك تفهمني يا حضرة جعفر علي، أي رئيس رح يحكم مصر بعد اليوم؟
أنا رح أقلك مين رح يحكم مصر بعد اليوم، لو تم ما يريده العسكر، رح يحكم مصر رئيس من العسكر، أو رئيس ينظر دوما لجزمة العسكر لأن في اللحظة يللي بيطلع فيها عن السطر يللي محدده العسكر رح تنزل الجزمة تبع العسكر على رقبته.

الموضوع مش موضوع الرئيس مرسي، الموضوع هو دخول العسكر للحكم بحجة أو بغير حجة... لو أن الآية انقلبت والعسكر دخل لإقامة حكم إسلامي ولطرد رئيس منتخب عالماني، وبرغبة شعبية عارمة، لكنت أول المتباكين على الديمقراطية المفصلة على المقاس.

سلملي كثير على الديمقراطية والليبرالية كمان يا جعفر علي، سلملي عليها وكثر السلام، لأن بعد أحداث اليوم الثالث كثير ناس ما عادت قبضتها جد... ولما الناس ما تقبضها جد رح تصير شغلات عاطلة كثير، بقاء مرسي أهون منها.