عندما رأيت هذه الصورة لم تلفت نظري التعليقات المرافقة والتي تدين "الفنان الملتزم" وجدي العربي. كثيرون أدانوه لأنه استخدم أطفال ملجأ الأيتام الذي يديره في عمل دعائي لزج وخسيس كحشد أطفال ودفعهم لحمل أكفان وتصويرهم بهذا الشكل الرخيص.
وجدي العربي وموضوعه اتفه بمراحل من الموضوع الأكبر. هاتسألني هو ايه الموضوع الأكبر هاقولك بصراحة مش عارف قوي لكن ممكن احاول اشرح لك.
ولو عندك بقايا انسانية. يعني شويه صغيرين زي حبة البيبسي اللي بتسيبهم في قعر الإزازة .. علشان أهلك علموك ما يصحش تشربها كلها وانت بتزور ناس.. (كانوا بيسموهم "حبة ذوق".. فاكر؟!)
دول بقى حبة الأخلاق اللي نفسي تسيبهم جواك وانت بتتخانق وتحاول تثبت لنفسك انك بتنتصر "للحق"، بأي تمن.. حتى لو كان التمن هو... الحق!
حبة صغيرين في قعر الإزازة عايزك تبص بيهم في عين كل واحد من الأطفال.
شوف كمية الارتباك، والتردد والقلق والخوف. دول مش أطفال بيوت.
دول غير الولد الأمور أبو جلابية اللي ماما جالها قلب تمشيه قدامها مترين وهو لابس الطاقية البيضا ومبتسم وهو شايل الكفن من غير ما يعرف هو شايل ايه. بس ماما كانت مبسوطة، لما مشيت وراه ومعاها بنتين تانيين. كانت بتبص لابنها الصغير وفخورة وهم بيصوروه شايل كفنه لإنها حاسه كده انتصرت للدين والإسلام وسيدنا محمد.
ويمكن حد قالها انه شاف الرسول في المنام وهو بيبوس الأمور اللي شايل الكفن. في الجنة انشاءالله..
ودول برضه غير الأمور اللي اكبر شوية، اللي ماما وبابا لبسوه تي شيرت أبيض عليه عبارة "مشروع شهيد" من قدام ومن ورا.
طبعا ده علشان القناصة لما ينشنوا يختاروا فقط اللي مكتوب عليهم مشروع شهيد، ويعرفوا ينشنوا عليه في وشه أو ضهره. وبرضه عشان الكاميرا.. يمكن المصور يكون واقف وراه أو قدامه. مبروك.. مقدما..
اما اللي الشخص اللي مكتوب عليه مشروع مرشد، ومشروع زعيم الأمة، ومشروع الرئيس، فقاعد يلهط فته ولحمة ورز، وجنبه المحروس ابنه اللي اخد عربيات الرئاسة المصفحة لفه مع اصحابه ولما رجعها للدولة خربها واتلف محتوياتها حتى لا تستخدم مرة أخرى لإن مصر عزبة دادي، وإقطاعية المرشد، ومنطلق مشروع الخلافة.. خلافة حمادة يا ام حمادة... مبروك برضه..
تاني... الموضوع اللي مش عارف اختصرهولك في كلمتين على السريع، ممكن تفهمة بشوية الإنسانية اللي قلت لك عليهم لما تبص في عين كل طفل في الصورة زي ما انا عملت. واحد واحد.
فيه حاجة هاتخرم قلبك زي الرصاصة. ولما ده يحصل اعرف انك قربت.
اعرف ان فيه أمل.. فيك..
فيه امل انك تبقى مشروع... مشروع إنسان..
العيال دي اطفال محتاجة. خليط من أطفال الشوارع على أطفال الملاجئ.
بص لنظرة عينية وللقلق اللي فيها لما حد مد إيده يعدل الكفن.
ده الطفل اللي منتظر حد يلطشه قلم في اي لحظة.. أي حد: الأستاذ.. المشرف.. العسكري (الشرطي)... أو حتى طفل شوارع تاني اكبر منه.
ده مش تربيه بيوت.. ما عرفش حنان ولا حب. ما يعرفش غير الخوف.
بص عليه وهو شايل الكفن وممشيينه مع اخواته.. حس بيه.. خلي قلبه جوه قلبك وشوف بيتنفض ازاي..
كل ما اشوف الصورة وداني بيرن فيها صوت الشخص اللي في الجنب. اللي مادد ايده بيعدل الكفن عشان الصورة...
- وله... امسك الكفن كويس.. اوعى يقع منك...
- كده يا استاذ احمد؟
... ما عرفش فهمتني واللا لأ لكن يا ريت يا ريت تكون حسيت.. بشوية الإنسانية اللي في قعر الإزازة.
https://www.facebook.com/photo.php?fbid=602699643095534&set=a.171606969538139.36487.100000665111323&type=1

تسجيل الدخول
اسم المستخدم:
كلمة المرور:	فقدت كلمة المرور؟
	تذكرني

المواضيع المحتمل أن تكون متشابهة…
الموضوع		الكاتب	الردود	المشاهدات	آخر رد
	بالفيديو أطفال شوارع سوريين في ميدان رمسيس في قلب القاهرة	فارس اللواء	14	1,705	12-11-2013, 02:32 PM آخر رد: Rfik_kamel
	جبهة النصرة- " الجيش الحر"-تجنيد أطفال	Rfik_kamel	7	1,074	01-19-2013, 08:20 AM آخر رد: Dr.xXxXx
	لا أخلاقية التحريض..كذبة ذبح القاشوش وقلع أظافر أطفال درعا	Rfik_kamel	13	2,733	01-09-2013, 04:43 PM آخر رد: forat
	كارثة أطفال أسيوط ...الفساد والجهل	فارس اللواء	3	987	11-18-2012, 03:03 PM آخر رد: ahmed ibrahim
	أطفال سوريا تذبح	The Holy Man	21	3,461	06-02-2012, 07:28 PM آخر رد: forat