مؤمن المحمدي يكتب تعليقا على حادثة كنيسة الوراق

أيا كان مين مرتكب الجريمة

بس فيه واحد هناك، شايفه وسامعه، فاشخ ضبه وفرحان باللي حصل

واحد ف دماغه تراث طويل مليان آيات جهاد، وأحاديث قتال، وتفسيرات عدائية للعالم.

واحد شايف إن دينه جه علشان يسود العالم، ويحكم الأرض، ويخضع أصحاب المعتقدات التانية، ده إذا سمح لهم بالبقاء أحياء من الأصل.

واحد لا ينسجم إلا بدم ناس ماهياش طرف في صراعه مع نفسه أولا، ومع اللي حواليه ثانيا، ومع الكوكب في الأخير.

واحد بيكره الحياة، وشايف إنها مجرد اختبار، وكل أسئلة الاختبار إجابتها تتضمن حذف الآخرين من سجلات الموجودين.

واحد لا عمره قرا قصيدة أو رواية، ولا سمع مزيكا، ولا شاف فيلم، ولا شجع فريق كورة، ولا دخل معمل، ولا حل معادلة رياضة، ولا حضر معرض فن تشكيلي، ولا حب ولا اتحب، ولا شارك البشرية غير بالسواد والغل.

واحد حاطط كل المختلفين عنه في دماغه، وبيقيس ورعه بحجم قمعه للي مش بيتفقوا معاه في الدين والجنس والأفكار.

واحد مش بيحب إلهه، ولكن بيخاف منه، وكل همه يعقد معاه صفقة تنتهي بمتعة شخصية لا تزيد عن الاكل والجنس.

واحد معندوش خيال ولا إبداع.

واحد بائس لا يتمنى سوى انتشار بؤسه في كافة أرجاء المعمورة.

ما يهمنيش الواحد ده يمثل صحيح الدين ولا غلط الدين
يهمني إن النسخة دي فيه منها ملايين

الملايين دول هم اللي ضربوا النار ع الفرح في الكنيسة
أيا كان مرتكب الجريمة

واضح إننا فعلا هييجي يوم ونموت بغيظنا