نص الإعلان "رقم 3" .. بقلم : زياد الرحباني

<<عودة للعناوين اللي بقيت عالقة من الإعلان رقم 2 بسبب ضيق الوقت: 1 حادثة الأشرفية في 5/2/2006 سفارة الدنمارك. 2 الطموح اللامحدود، حسناته وسيئاته. 3 ظاهرة تحسن نوعية تسجيل صوت أيمن الظواهري في بياناته الأخيرة. واخيراً حزورة الإعلان:

أين هو مركز القاعدة في العالم. (موسيقى) على فكرة: إجا كثير اتصالات. وأخيراً: آخر معلومات رئاسة الجمهورية الأمنية الأستخباراتية المغلوطة، إنشالله ما يداهمنا الوقت قبل ما نوصل لها. (موسيقى)
الموضوع الأول. واحد: حادثة الأشرفية في الدنمارك. من المؤكد انو في رجعة قوية للأديان بالعالم كلو، من وقت انهيار الاتحاد السوفياتي. هلق مين وراها؟ حديث طويل مش لليوم. وإجت وتتوجت بأحداث 11 أيلول، وما تلاها من تصريحات، لسيدنا المسيح الجديد غير المهدي ولا المنتظر جورج بوش. وانكتب كثير كتب عن هالموضوع، وقبل وبعد، وأكثر واحد يمكن صار شعبي <<صراع الحضارات>>. كمان مش لليوم الدخول بهالموضوع. اللي بيهمنا من الموضوع، هالرجعة العاصفة للأديان. واللي بشهادة كبار رجال الدين بالعالم، ما الها علاقة بالدين نفسو. هلق المشكلة بتزيد بس كل واحد على دينو الله.. بيعينو! ما بعرف إذا مزبوطة هاي بس انشالله لأ. لأنو في شعوب جاهزة من دون أي إعانة، فكيف إذا هالإعانة إلهية؟ بتصير تجوّهر!
هلق إذا رجعنا للبنان، هون.. نحنا؟ دقوا ع الخشب. وع الحطب. وفيكم تدقوا ع النكل، ع الألمنيوم، ع المازونيت. حتى إذا عالبلاستيك والتنك دقيتو، نحنا السباقين بتلبية النداء. منبيّض الوجه، ومنرفع الراس، وبلا دف منرقص. يعني منعجبك، بس أنت ما بتعجبنا. لأنك عم تسترجي تحكي عن الأديان من برات الأديان.
كانت الأشرفية على موعد مع مسيرة، جربوا بعض التلفزيونات يصغروّها بالتصوير، إنما عادوا اختشوا، ووسّعوا كادر الكاميرا، لأنو انشلّ البلد، وبمناطق بعيدة عن الدنمارك اللي بالأشرفية، ونهار أحد، صار تسكير طرقات مثلاً بالحازمية وبالمنصورية. وينك ووين الأشرفية!
كانت الأشرفية على موعد مع حوالى عشر آلاف بني آدم، كلّهم الله وكيلك: سوريين وفلسطينية وحزبُ الله! إيه والقرآن. طاحمين عليهم بسبب إساءة صارت للنبي محمد بكاريكاتور بالدنمارك. هلق إصرار الدنامرك على عدم الاعتذار أو التخفيف من حدة هالرسوم المهينة، انتشرت فجأة بعد اعتراض المملكة العربية السعودية عليها، وكان مارق.. يعني صرلو تلات أشهر طالعة. هلق مش مهم. أهالي الأشرفية بأكثريتهم طبعاً، ناس من غير نوع صراع حضارات. يعني طاحمين وبلشوا يكسروا عن أبو جنب على فكرة <<أبو جنب>> هو مسؤول بالقاعدة يعني أهالي الأشرفية ما كثير فرقانة معهم إذا سنة ولا شيعة. هلق في فريق حزبي اسمو القوات اللبنانية، وبعض آل الجميّل.. قال، كان بيتمنى مش كشارع إطلاقاً، الشارع مرعوب كقيادة، يكونوا أصحاب النشاط، حزب الله. لأنو صار في قناعة انو كل تطرف عم بيرد ع تطرف، لازم يكون وشرعاً: شيعي! ع أساس ما في سنة بالبلد إلا كتلة المستقبل ودار الفتوى. وهالجماعة حفظوا <<أبانا الذي في السموات>>، وهني حفظوا الفاتحة بهالدورة المكثفة اللي عملوها على ضريح الرئيس الحريري على امتداد الألفين وخمسة. وشبكوا الهلال بالصليب، وتصوّروا، وأصروا يكونوا حاملين ولاد. يعني لدرجة ما انتبهوا ببعض اللقطات التلفزيونية <<الفتحة>>، يعني انو طلعت شبكة الهلال والصليب إذا وَلد محملينو إياهم، متل المطرقة والمنجل.. تبع شو؟ تبع أكثر شي بيكرهوه، منذ انهيار الاتحاد السوفياتي. (فاصل موسيقي)
المهم يا سيدنا، لأ، طلعوا مش شيعة. طلعوا اللي طلعوا ع الأشرفية من أهل السنة. هولي جماهير، وموجودين وبكثافة. وقللهم الوزير السابق سليمان فرنجية: طيب لاقطين 35 او 65 او 125 مواطن سوري، وعلى 45 فلسطيني، طيب وهوليك العشرة آلاف، إلا.. هول، مين بالله؟ ما هولي اهلنا ومن الشمال ومنعرفهم. ولحقو الجنرال ميشال عون قال لهم: بما انو شو ما كانوا خيي: سوري، تتري، بدوي. ما هولي عايشين بهالبلد وخاضعين لقوانينو، أيه أما لأ؟ وهيدا كلام اكثر من سليم. هيدا صار سليم الحص، لو بيسمعوه شويه اكثر الناس. بسن نحنا صايرين ما منحب انو حدا هيك معتدل وموضوعي ورايق. ما في. منحب الزعران، لأنو منحضر اميركاني.
في جملة إلو دهر بيعيدها الدكتور سليم الحص <<نحنا منحب الحرية كتير، لدرجة صار عنّا كثير حرية وقليل من الديموقراطية>>.
هلق بمحصلة أحداث الأشرفية في ملاحظتين بالنتيجة. أول واحدة: كان للقوات اللبنانية اللي تجمعت بشكل رئيسي بمنطقة <<أوتيل ديو>> نسبة انضباط وحكمة. هيّ منهم، هيّ من تكاثر عناصر الجيش اللبناني؟ يعني، بالحالتين، بيشكروا عليها. والملاحظة التانية: طلعوا كجولة اولى، السنيين المتطرفين، أقوى بتكسير الأزاز من الشيعة. هيدا لحد هلق. هلق بالمستقبل اللي هوي جزئياً لألهم هوي وأزازو خاصة السّنة اللي بكتلتو لهالمستقبل، رح نعرف ب14 آذار الجايي، وقريب صار، بس تحصل مباراة فعلية، بلشوا يعني جميع الملل يعلنوا عنها ونحنا منهم. نحنا انتبهوا لا سنة ولا شيعة.. مخلطين اجلّكم، بدكم لا تواخذونا.. متل البلا أصل يعني بس تحصل هالمباراة قريباً جداً، رح نعرف مين الأقوى بتكسير الأزاز. (موسيقى)
سوليدير ركّت كتير ع ديكورات الأزاز. يمكن إجا الأزاز مع كلمة الشفافية؟ ما بعرف، وضواحي بيروت.. ضواحي سوليدير عفواً، من جميزة لمونو.. للي بدكم، قلدتها. وصار دارج ع أساس، سبحان الله الأزاز ما بيعطي قيمتو لحدا! هلق بكرة بيعطي قيمتو لحدا؟ بيعطي قيمتو للي بدو يرجع يصلحو. هلق يمكن بكرة المباراة هيدي يربحوها الشيعة. لأنو عددياً واحد، ومتحدين أكثر من غير طوايف. هلق يمكن ما يوصلو للتصفيات، بس إذا ضلوا مدعومين من التيار الوطني الحر و<<الخونة>> الباقيين كالمردة، والحزب الشيوعي وحركة الشعب وهيدا مرجح خذوا ع لبن.. وع أزاز.
أنت متصوّر واحد، jeune  يعني، من جامعيي اليسار الديموقراطي القلال، أشّر بإيدو لشوفير سرفيس سني بيروتي مكحكح ع الخطوط كلها، ومعو طبعاً محرمة بيسفقها ع رقبتو بالصيف وبالشتي، وقللو: ع السنتر فيل . شو معقول يجاوبو او كيف معقول يتطلع فيه؟ او إذا سني معاصر الموارنة، عفواً: معاصر الموارنة عن جديد، قللو بلغة استعمارو الأم، قللو بالعربي الفصيح يعني عالداون تاون  تيهونها عليه. بعتقد على عجقة الزمامير اللي رح تصير وراه، وهوي أنجق عم يسترزق، رح يقللو: <<أطلع وبعدين منتفاهم ولو خيي>>.
أيه شي.. ساحة الحرية، ايه شي.. ساحة الأرز، ايه شي ساحة الاستقلال، ايه شي ساحة 14 آذار، ايه شي ساحة الشهيد رفيق الحريري.. ولو عيني؟ هاي كان اسمها البلد. كنا من حيالله منطقة نوقّف سرفيس يعني، من أنطلياس مثلا، نقللو: عالبلد؟ ينتع راسو صوب الشمال أنو طلاع. وهيدا البلد.. ما عاد موجود! (موسيقى)
بموضوع الطموح اللامحدود: حسنات وسيئات.
ما ممكن لأي إنسان يكون ضد إنسان عندو طموح لا محدود. بالعكس بتصور بُيعجب فيه وبيجرب يكون متلو. حلو الطموح اللامحدود. حلو يكون موجود عند إنسان. بس مش إذا كان هالإنسان معالي الوزير نايلة معوّض. بيصير هالطموح مخيف. مهول ومجهول.. العواقب. بدها تتقبل هلق معالي الوزير لغتنا وألفاظنا، لأنو إلنا فترة كمواطنين مش زغرتاوية عم نتحمل كلمات وألفاظ.. منها، ومع صوت وصورة! غير.. طريقة لفظها، وغير تصنيف نوع ذبذباتها الصوتية على الدين (الأذن)، وحتى دينان (آذان) جماعة 14 آذار نفسهم. منتمنالها هلّق، تكون بهالديموقراطية اللي ما انفكت تبل إيدها فيها ع الطالع ع زغرتا وع النازل من بكركي، وهلق بس فلّو <<السوغيية>> (السوريون) حصلت عليها بشكل.. سحري. جاكوزي.
انا برأيي طموح السيدة نايلة معوض عارم. ما بقى بالوزارة. والأرجح ما بقى برئاسة الجمهورية لأنو مضمونة هيدي.. قطّعتها. طموح مش بس جامح، الكلمة مش كفاية، انا بيتهيأ لي انها بتشعر بينها وبين نفسها، بتشعر أنو ليه لكونداليسا رايس وزيرة خارجية؟ شو فيها هيدي المرا؟ ليش مش هيه؟.
أعزائي المستمعين رح نقارن النقاط اللي لصالح السيدة نايلة معوّض وضدها، بالنقاط اللي للسيدة كونداليسا رايس وضدها، لتكون ليش هالمخلوقة تولّت هالمنصب؟
أولاً: السيدة نايلة معوّض بتحكي عربي أحسن من السيدة كونداليسا رايس. بكتير.
تانياً: مواقفها للسيدة نايلة معوّض قاطعة بشكل فاضح ويعني شاسع، بينها وبين كونداليسا رايس. اللي من نقاط ضعفها أنو كونداليسا رايس ساعة بتهدد سوريا وساعة بتغازل سوريا. الست نايلة مثلاً بالمقابل، ما عندها هالقصص. دغري..
رابعاً: الست نايلة زوجة الشهيد رينيه معوّض. ما ألها فضل يمكن بس، التاريخ حكم وهيك صار. هيديك رايس شو تاريخها والله مين بيعرف عنها شي؟ بيقولو كانت تتعاطى شوية بشركات البترول. وعيب ينحكى بالبترول بوجود إنسان عانى متل الست نايلة معوّض.
خامساً: الست نايلة معوّض كل عشر دقايق بتدعي الرئيس لحود يستقيل. او <<يحل>>، أو <<يفل>>، أو <<يخلصنا>>، أو <<يحسّ بقى>>. يعني جريئة كتير. وهيدا مش متوفر برايس. رايس اند سبايس. كونداليسا رايس بس يحكي جورج بوش بتوقف على جنب وبتحط راسها بالأرض. بعدين ظروفها.. أنو واسطة. محسوبية. الله يلعن الفساد حتى بأهم دول بالعالم. انو تعرفت عليه.. من هون لهون، جابها. أنو امراة سودا بيرضي فيها السود، وبتعرفو يعني هالحسابات الأميركانية. هيدي نايلة معوّض ما بتفوت فيها. وإلا كانت قبلت هيك منصب من زمان.
(فاصل الأخبار على صوت الشعب)
قريباً وإذا طالت الحرب على الإرهاب، والأرجح انها ستطول. رغم الصواريخ الذكية الأميركية التي يُشرح عنها وتصوّر على كل الأقنية الغربية، ليرعبونا ويكرسحونا: انو كيف بتخرق كذا طبقة أرضية بتورا بورا مثلا. وإذا صاروخ على سبيل المثال مثلا موجّه على بن لادن، وطلعلو بالغلط أيمن الظواهري او الزرقاوي بوجهه، بيمرق بكل خفة ولياقة بيناتهم، رغم وزنه وخرقه لهالكذا طبقة. بيروح صايب على بن لادن. هلق: في احتمال ما يلاقيه، بيرجع من مطرح ما إجا، بدون ما يقتل ولا أفغاني، ولا باكستاني، ولا حدا من طالبان، لأنو هيدا ذكي. بهالإطار، رح ينزل سي دي قريباً لأيمن ظواهري، إنتاج <<طالبان بيكتشرز>> مرفق ب<<دي في دي ساراوند سيستم>>، أي بإحاطة خماسية الأبعاد، <<فايف بوينت وان>>، وهو يهدد إنكلترة بمزيد من العقاب.
(فاصل موسيقى الأخبار)
بما يتعلق بموضوع: أين مركز القاعدة الرئيسي في العالم؟ صراحة إجا من 250 ل300 اتصال، رغم انو ما اعلنّا عن أرقام <<صوت الشعب>>. يعني في ناس تعذبت لتلاقي الرقم، وكان متوقع يكون عدد المتصلين أكثر. بإحصاء للأجوبة طلع معنا بشكل مفاجئ، خمسين بالمية، اللي هيه الأكثرية حددت واشنطن والبعض منهم حدد أكثر البيت الأبيض. هلق في خمسة بالمية منهم حدد <<السي آي آيه>>. في نسبة 15% حددت الرياض في السعودية. وفي أقلية تعتبر بالنسبة لهول برأيي، اللي هيه 30% تقريباً حددت انو أفغانستان أو ربما باكستان.
هلق أكثر جواب حدد عنوان محدد وغريب من نوعه قال انو مركز القاعدة الرئيسي هوي مركز اليسار الديموقراطي ع المزرعة فوق <<الهوا تشيكن>>. هيدي طبعاً الاتصالات رح نبعت منها نسخة للنائب السابق فارس سعيد ليتمم ملفه اللي بدو يبعتو على الأمم المتحدة ويتشكى فيه على المخيمات اللي عم يدربو فيهم المردة.. القاعدة بالشمال، ونسخة لوزير الداخلية بالوكالة أحمد فتفت لأنو عم يقللو: لأ يا خيي مش مزبوطة.
بلكي ربما هالمعلومات بتساعد.
كما انو على سيرة مركز اليسار الديموقراطي ع المزرعة، بدنا نتوجه للسيد الياس عطا الله، يعني مختار الرميلة السابق ونائب طرابلس، بحب ذكّرو أنو عملتو جمعة بالأسترال، بأواخر الألفين وأربعة لليسار الديموقراطي، وبتعرف أديش كان فيها.. طليعة. يعني.. شو بدي قلّك؟ وقعتّو رفيق الحريري الله يرحمو بخبرية، وأخذلكم مركز. ماشي الحال. بنفس الشهر عملنا، الحزب الشيوعي عمل بالأونيسكو ذكرى ثورة أكتوبر، وبتعرف أديش كان في ناس.
ما راح فيكم تجمعوا الناس يا الياس.