[CENTER][SIZE=5]ما في متل كاس العرقْ
حدّوا المازات* مصفصفِي*
والبدر من نورو انسرقْ
والليل شي إنّو غفي*

*

وانتِ وأنا حب ووَفا
وكلمات قدّسها الصفا
سِكْرِتْ على همْس ودَفا
وأحلام حلوِه مهفهفي*

*

وامسك الكاس وأرفعو
واتطلع بْوجهك معو
ويْصير قلبي بْمَوضعو
يُنبض وْقلبك يسمعو
وشفافنا يكونوا وعوا
ْودَعْوِِه لبعضُن وزّعوا
وتماوجوا وتدلّعوا
تالليل يبدا يختفي

واسلموا لي
العلماني

* المازات = جمع "مازَه" أو "مزّه" (اللبنانيون يجمعونها أيضاً على "موايز" أحياناً)، وهي عبارة عن مقبلات شرقية صغيرة تؤكل مع "الكأس" مثل: التبّولة، الكبّة النيئة، الحمص، الطحينة، بعض الخضار، الزيتون، المخللات، بعض أنواع الباذنجان، السمبوسك، الصفيحة ... وغيرها الكثير.

* مصفصفي = مصطفّة

* شي إنو غفي = كاد أن يغفو

* مهفهفي = أنيقة وناعمة