عزيزي beautiful mind

للأمانة العلمية أنا عمري ماكنت أي حاجة بس مكتوب في البطاقة مسيحي لكن كل اللي أعرفه أبانا الذي في السماوات وكير كير ياليسون وترنيمة كل شوية يرددوا فيها ده يسوع أبدا ماتركني أنا مش بشوفه من ضعف إيماني ودي حفظتها وأنا في إعدادي علشان أعمل متدين قدام بنت مسيحية كنت عايز أمشي معاها-الله يخرب بيت النسوان اللي هيجنوني مره أعمل مسيحي ومره مسلم ومره يهودي ـ:lol:

ما تعتبره أنت عاطفة مني نحو الإسلام أنا برجعه لعدم تعرضي منذ الصغر للمسيحية ومدارس الأحد وكل الشغل اللي أنت عارفه ودي الحسنة الوحيدة التي أتذكرها لأبويا وأمي علاوة علي إني حرفيا متربي في الشارع وكان معظم أصحابي مسلمين وعارفهم ودخلت بيوتهم وصليت حتي في جوامعهم وكنت من نجوم الكورة الشراب في الدورات الرمضانية

الملحدين ياعزيزي نوعين في علاقتهم بدينهم الرسمي البعض بينسحب في هدوء بعد مايطفي النور ويقفل الباب براحة والبعض الأخر بيعمل فضيحة وهو ماشي زي سلمان رشدي كده ودول غالبا بيكونوا عانوا علي المستوي الشخصي بسبب دينهم وده تلاقيه بوضوح في المنتديات الأجنبية بعيدا عن شغل التلت ورقات بتاع أحمد اللي بقي جرجس وإسحاق اللي بقي محمد اللي بيحصل هنا

أنا في خلال فترة المراهقة كنت من النوع الثاني وبتطرف شديد وكنت دايما حاسس إن فيه بيني وبين الدين تار بايت لازم أخلصه ومع مرور الأيام وظروف سفري للخارج بدأت أنظر للأمور نظرة مختلفة عما سبق والحالة آخذه في التحسن

لو سألت واحد أمريكي متعلم ومثقف عن الإسلام ستندهش من طريقة كلامه عن الإسلام وحياديته وموضوعيته رغم أنهم ملحدين ومن خلفيات مسيحيةوده شفته كتير في منتدي للملحدين بالإنجليزي في حين يندر هذا الشئ في مصر لظروف كثيرة يطول شرحها

للأسف في مجتمعاتنا المغلقة الأخر هو شيطان رجيم وده شفته علي مستوي كل الدول العربية فلي صديق سوري سني لو سمعته يتكلم عن العلويين تقول دول دراكولا مش بني أدمين وقس علي هذا كل الطوائف

من الواضح لي أنك من النوع الأول الذي أنسحب بهدوء ولكنه يحمل بداخله تعاطف لدينه الأصلي

أنا نظرتي للإسلام تتلخص في الأتي
محمد بلا شك كان له تأثير ضخم وإيجابي علي مجتمعه ونجح في صنع أمة من لاشئ تقريبا وكان الإسلام في بدايته قوة إيجابية تدفع للأمام ومتفوقة علي القوي الأخري المحيطة بها ولكن مع ظهور العلمانية والليبرالية في أوروبا إنقلبت الآية وأصبح الإسلام مقارنة بها قوة رجعية

الموضوع عامل زي ماتكون رحت أشتريت عربية جديدة والبائع قال لك أن هذه العربية ممكن أن تسير 200 ألف ميل بدون مشاكل وأنت إشترتها وفعلا العربية كانت كويسة معاك طول ال200 ألف ميل ولكن بعد كده بدأت تفتح بقها وأنت مصمم علي ركوبها والعداد بقي عامل 10 مليون وأنت ولا أنت هنا وعمال تدفع علي تصليحها دم قلبك
الغلطة هنا ليست في العربية ولا البائع ولكن في صاحب العربية اللي مش عايز يفهم إنه جه الوقت إنه يخلص من العربية القديمة ويشتري واحدة جديدة


من وجهة نظري الإسلام والمسيحية آفتهم العظمي في إنهم ديانات exclusive أو بالبلدي معانا ولا علينا بداية من أنا الحق والطريق والحياة ولا أحد يأتي إلي الآب إلا بي وإنتهاءا بإن الدين عند الله الإسلام وبالتالي يجعلهم في حالة صراع دائم مع المخالفين لهم



موضوعك متشعب ويحتاج لمناقشة كل نقطة علي حده وياريت الأستاذ سواح يشرفنا ويقولنا علي من نطلق الرصاصو لكني مازلت عند رأيي بأن فريق الصليب يستحق الميدالية الذهبية في الدجل والشعوذة

تحياتي(f)